« បញ្ជាក់ថាអ្នកជាសាច់ញាតិនឹងគ្នា » លីអាហូណា ខែ កញ្ញា ឆ្នាំ ២០២២ ។
សំឡេងពួកបរិសុទ្ធថ្ងៃចុងក្រោយ
បញ្ជាក់ថាអ្នកជាសាច់ញាតិនឹងគ្នា
ខ្ញុំបានគិតថា ព្រះអម្ចាស់បានបង្គាប់ឲ្យធ្វើអ្វីដែលមិនអាចធ្វើបាន ប៉ុន្តែខ្ញុំបានយល់ខុស ។
អ្នកជិតខាងដែលមានវ័យចំណាស់របស់ខ្ញុំ និងកូនប្រុសរបស់គាត់រស់នៅផ្ទះល្វែងពីរបីផ្ទះពីគ្រួសាររបស់ខ្ញុំ ។ យើងស្រឡាញ់គាត់ជាខ្លាំង ។ ក្រោយពីកូនប្រុសរបស់គាត់ទទួលមរណភាពទៅ គាត់ក៏ចាប់ផ្តើមឈឺ ហើយសម្រាកនៅតែលើគ្រែ ។ យើងមើលថែគាត់រហូតទាល់តែគាត់បានទទួលមរណភាពបីខែក្រោយមក ។
ក្រោយពីពួកគេបានទទួលមរណភាពទៅ ខ្ញុំចង់ធ្វើពីធីបរិសុទ្ធនៅក្នុងព្រះវិហារបរិសុទ្ធឲ្យគ្រួសារនេះ ។ ប៉ុន្តែដោយសារតែយើងមិនមែនជាសាច់ញាតិនឹងគ្នា នោះយើងមិនអាចធ្វើអ្វីបានទេ ។ ថ្ងៃមួយគំនិតមួយយ៉ាងច្បាស់ចូលមកក្នុងចិត្តរបស់ខ្ញុំ ៖ « បញ្ជាក់ថាអ្នកជាសាច់ញាតិនឹងគ្នា ហើយអ្នកអាចធ្វើកិច្ចការព្រះវិហារបរិសុទ្ធសម្រាប់ពួកគេបាន » ។១ ខ្ញុំបានគិតថា ព្រះអម្ចាស់បានបង្គាប់ឲ្យធ្វើអ្វីដែលមិនអាចធ្វើបាន ប៉ុន្តែពាក្យ បញ្ជាក់ នៅតែមាននៅក្នុងគំនិតរបស់ខ្ញុំ ។
សាច់ញាតិរបស់អ្នកជិតខាងរបស់ខ្ញុំបានចាប់ផ្តើមផ្ទេរកម្មសិទ្ធិផ្ទះរបស់គាត់ ប៉ុន្តែពួកគេខ្វះឯកសារដើម្បីបញ្ជាក់ពីទំនាក់ទំនងរបស់ពួកគេ សូម្បីតែបន្ទាប់ពីយើងបានស្វែងរកនៅក្នុងបណ្ណាសាររបស់រដ្ឋាភិបាលហើយក្ដី ។
ព្រះវិញ្ញាណបានប្រាប់ខ្ញុំថាយើងកំពុងខ្វះអ្វីមួយ ។ ដោយមានការយល់ព្រមពីសាច់ញាតិទាំងនេះ ខ្ញុំបានពិនិត្យមើលក្នុងផ្ទះរបស់គាត់ដើម្បីរកឯកសារ ។ នៅជ្រុងមួយនៃផ្ទះ ខ្ញុំបានរកឃើញកាបូបមួយចំនួនពេញទៅដោយក្រដាសចាស់ៗជាច្រើន ។ ខ្ញុំមានអារម្មណ៍ថាកាបូបនេះសំខាន់ណាស់ ។
ខ្ញុំបានកកាយមើលកាបូបអស់ពីរ ហើយចាប់ផ្តើមកកាយមើលកាបូបទីបី ។ នៅពេលខ្ញុំកកាយជិតដល់បាតកាបូប ពេលនោះខ្ញុំមានអារម្មណ៍ថាបានប៉ះកូនសៀវភៅមួយ ។ នៅក្នុងកូនសៀវភៅនោះមានគម្របថតមួយ ហើយនៅក្នុងថតនោះខ្ញុំបានរកឃើញវិញ្ញាបនបត្រសំខាន់ៗចំនួនប្រាំ ៖ សំបុត្រកំណើតរបស់ស្ត្រីអ្នកជិតខាងរបស់ខ្ញុំ សំបុត្រមរណភាព និងសំបុត្រអាពាហ៍ពិពាហ៍របស់ម្តាយគាត់ សំបុត្រមរណភាពរបស់ជីដូនគាត់ និងសំបុត្របញ្ចុះសពឪពុករបស់គាត់ ។
ពេលសាច់ញាតិរបស់អ្នកជិតខាងរបស់យើង និងខ្ញុំពិនិត្យមើលឯកសារនោះ មានពាក្យពីរម៉ាត់ធ្វើឲ្យខ្ញុំចាប់អារម្មណ៍ ៖ « ស្រុកវ៉ាហ្គាយស្គី » នៅភាគខាងលិចស៊ីបេរី ។ នៅរំពេចនោះ ខ្ញុំមានអារម្មណ៍ថាខ្ញុំគួរតែមើលនៅក្នុងមែកធាងគ្រួសាររបស់ខ្ញុំ ។ នៅពេលខ្ញុំទៅមើល ខ្ញុំបានរកឃើញថាវ៉ាហ្គាយស្គី មាននៅលើចុងមែកនៃមែកធាងគ្រួសាររបស់ឪពុកខ្ញុំ ។ ការស្រាវជ្រាវបន្ថែមទៀតបានបង្ហាញថា អ្នកជិតខាងរបស់ខ្ញុំដែលបានទទួលមរណភាពនេះ និងខ្ញុំគឺជាសាច់ញាតិនឹងគ្នា !
ទីបំផុត ព្រះអម្ចាស់មិនបានតម្រូវឲ្យខ្ញុំធ្វើអ្វីដែលមិនអាចធ្វើទៅបាននោះទេ ។ ខ្ញុំមានសេចក្តីរីករាយយ៉ាងខ្លាំងក្រៃលែងដែលបានដឹងថា អ្នកជិតខាងរបស់ខ្ញុំគឺជាសាច់ញាតិម្នាក់នៃគ្រួសាររបស់ខ្ញុំ ។ ទំនាក់ទំនងនេះនឹងអនុញ្ញាតឲ្យខ្ញុំអាចធ្វើពិធីបរិសុទ្ធនៅក្នុងព្រះវិហារបរិសុទ្ធជូនគាត់បានយ៉ាងពិតប្រាកដនៅពេលអនាគត ។
ព្រះអម្ចាស់ស្រឡាញ់បុត្រាបុត្រីទាំងអស់របស់ទ្រង់ ។ ទ្រង់បានរៀបចំផែនការនៃសេចក្តីសង្រ្គោះសម្រាប់មនុស្សទាំងអស់ រួមទាំងអ្នកជិតខាងរបស់ខ្ញុំ និងកូនប្រុសរបស់គាត់ផងដែរ ។