គ្រាន់តែព្យាយាមម្តងទៀត

ដោយ ម៉ូលី អកឌិន វែលច៏ ទស្សនាវដ្ដីសាសនាចក្រ

ខ្ញុំរវល់តែធ្វើរឿងល្អៗ ប៉ុន្តែទំនាក់ទំនងរបស់ខ្ញុំជាមួយនឹងព្រះអម្ចាស់មិនល្អទេ ដោយសារតែខ្ញុំបានធ្វេសប្រហែសអ្វីមួយដែលសំខាន់ជាងនេះ ។

រូបភាព

បើកព្រះគម្ពីរ

នៅពេលដែលខ្ញុំបានបញ្ចប់បេសកកម្មរបស់ខ្ញុំនៅខែ មករា ឆ្នាំ ២០១៩ ខ្ញុំបានប្រាកដថា ខ្ញុំនឹងបន្តការសិក្សាព្រះគម្ពីរប្រចាំថ្ងៃរបស់ខ្ញុំបានយ៉ាងងាយស្រួល ។ ដំបូង នោះជាការពិត ។ ក្រោយពីធ្វើការហើយ ខ្ញុំត្រឡប់មកផ្ទះវិញ ហើយអានព្រះគម្ពីរយ៉ាងទៀងទាត់ ។ ខ្ញុំរីករាយណាស់ដែលនៅតែស្មោះត្រង់ចំពោះការអានព្រះគម្ពីរ និងការរៀនអំពីព្រះអង្គសង្គ្រោះ ។

វាបានផ្លាស់ប្តូរនៅខែ មិថុនា ឆ្នាំ ២០១៩ នៅពេលដែលមិត្តប្រុសរបស់ខ្ញុំត្រឡប់មកពីបេសកកម្មរបស់គាត់វិញ ។ យើងបានចាប់ផ្តើមណាត់ដើរលេងជាមួយគ្នាភ្លាមៗ ហើយយើងក៏បានភ្ជាប់ពាក្យប្រាំមួយសប្តាហ៍ក្រោយមក ។

ក្នុងភាពដ៏មមាញឹកនៃការរៀបចំផែនការអាពាហ៍ពិពាហ៍ ការងារ ការទៅរៀននៅមហាវិទ្យាល័យ និងការចំណាយពេលជាមួយគូដណ្តឹងរបស់ខ្ញុំ នោះការសិក្សាព្រះគម្ពីររបស់ខ្ញុំបានថយចុះមកត្រឹមពីរបីដងក្នុងមួយសប្តាហ៍ ។ ដោយសារខ្ញុំរវល់ជាមួយនឹងរឿងល្អៗ ខ្ញុំបានធ្វេសប្រហែសដោយអចេតនាចំពោះទំនាក់ទំនងរបស់ខ្ញុំជាមួយនឹងព្រះអម្ចាស់ ។

ស្វាមីខ្ញុំ និងខ្ញុំបានរៀបការនៅក្នុងខែ វិច្ឆិកា ឆ្នាំ ២០១៩ ។ បន្ទាប់ពីថ្ងៃឈប់សម្រាក ខ្ញុំបានព្យាយាមចាប់ផ្ដើមអានព្រះគម្ពីរបន្តពីកន្លែងដែលខ្ញុំបានទុកចោលពីមុនឡើងវិញម្ដងទៀត ។ អស់រយៈពេលប៉ុន្មានខែ ស្វាមីខ្ញុំ និងខ្ញុំបានសិក្សាព្រះគម្ពីរជាមួយគ្នាដោយជោគជ័យ ។ រៀងរាល់ព្រឹករយៈពេលពីរបីនាទី យើងនឹងអានព្រះគម្ពីរ ហើយពិភាក្សាមេរៀន ចូរមកតាមខ្ញុំ មួយពីមុនពេលយើងប្រញាប់ប្រញាល់ចេញទៅធ្វើការ ឬទៅសាលារៀន ។

បន្ទាប់មក ជំងឺរាតត្បាតសាកលកូវីដ-១៩ បានវាយលុក ។ ដោយគ្មានកាលវិភាគការងារ និងសាលាតឹងរឹង នោះយើងបានបាត់បង់ទម្លាប់នៃការសិក្សាព្រះគម្ពីរនៅពេលព្រឹករបស់យើង ។ យើងសិក្សាតែម្តងម្កាល ហើយទំនាក់ទំនងរបស់យើងជាមួយព្រះអម្ចាស់បានមានបញ្ហា ។ សូម្បីតែបន្ទាប់ពីការរឹតបន្តឹងត្រូវបានដកចេញ ហើយយើងបានត្រឡប់ទៅព្រះវិហារវិញហើយក្តី ក៏យើងនៅតែមានបញ្ហាក្នុងការសិក្សាដដែល ។

ជារឿយៗ សមាជិកសាសនាចក្រមានពេលដែលពួកគេមានការលំបាកក្នុងការអានព្រះគម្ពីររបស់ពួកគេជាទៀងទាត់ផងដែរ ។ ជីវិតរបស់យើងគឺរវល់ណាស់ ហើយយើងប្រឈមមុខនឹងបញ្ហារៀងរាល់ថ្ងៃ ។ វាមិនដែលយឺតពេលទេដើម្បីចាប់ផ្តើមម្តងទៀតនោះ ។

ប្រធាន រ័សុល អិម ណិលសុន បានមានប្រសាសន៍ថា « ព្រះអម្ចាស់ពុំរំពឹងភាពល្អឥតខ្ចោះពីយើង អំឡុងពេលនៃការរីកចម្រើនអស់កល្បជានិច្ចរបស់យើងនេះឡើយ » ។ ប៉ុន្តែ លោកបានបន្ថែមថា « យើងទាំងអស់គ្នាអាចធ្វើបានល្អប្រសើរ ហើយជាមនុស្សល្អប្រសើរជាងពីមុន » ។^១

ស្វាមីខ្ញុំ និងខ្ញុំថ្មីៗនេះបានចាប់ផ្ដើមប្តេជ្ញាចិត្តជាថ្មីដើម្បីអានព្រះគម្ពីររបស់យើង ។ យើងនៅតែមិនទាន់ល្អឥតខ្ចោះនោះទេ ប៉ុន្តែយើងព្យាយាមរៀងរាល់ថ្ងៃដើម្បីពង្រឹងនូវទីបន្ទាល់របស់យើង ។ ខ្ញុំមានអំណរគុណចំពោះឱកាសជាច្រើនដែលព្រះអម្ចាស់បានប្រទានដល់យើងដើម្បីប្រែចិត្ត ធ្វើបានល្អប្រសើរ ហើយជាមនុស្សល្អប្រសើរជាងពីមុន ។