ចម្លើយនៅក្នុងព្រះគម្ពីរមរមនរបស់ខ្ញុំ

ដោយ អានី វ៉ុង ទីក្រុងហុងកុង ប្រទេសចិន

ខ្ញុំបានព្យាយាមយ៉ាងខ្លាំងដើម្បី « ជួយ » អ្នកម្តាយ វ៉ុង ប៉ុន្តែអ្វីដែលគាត់ត្រូវការនោះគឺព្រះបន្ទូលដ៏សាមញ្ញ និងមានឥទ្ធិពលរបស់ព្រះតែប៉ុណ្ណោះ ។

បន្ទាប់ពីខ្ញុំបានជ្រមុជទឹកនៅខែ មិថុនា ឆ្នាំ ២០០២ ខ្ញុំបានចែកចាយសេចក្តីជំនឿរបស់ខ្ញុំជាមួយម្តាយខ្ញុំ ។ ទោះបីជាអ្នកម្តាយ វ៉ុងបានទៅព្រះវិហារជាមួយខ្ញុំជាញឹកញាប់ក៏ដោយ ក៏គាត់មិនចង់រៀនបន្ថែមទៀតដែរ ។

១០ ឆ្នាំក្រោយមក នៅទីបំផុត អ្នកម្តាយ វ៉ុងបានជ្រើសរើសទទួលពិធីបុណ្យជ្រមុជទឹក ។ ខ្ញុំមានចិត្តរំភើបណាស់ ។ ពីរបីឆ្នាំក្រោយមក គួរឲ្យស្តាយណាស់ដែលគាត់បានឈប់ពង្រឹងទីបន្ទាល់របស់គាត់ ហើយបានយកលេសជាច្រើនដើម្បីមិនទៅព្រះវិហារ ។

ខ្ញុំបានជំរុញគាត់ឲ្យទៅព្រះវិហារ ប៉ុន្តែវាធ្វើឲ្យមានតែការឈ្លោះប្រកែកគ្នាប៉ុណ្ណោះ ។ នៅទីបញ្ចប់ ខ្ញុំបានឈប់បង្ខំគាត់ ដើម្បីកុំឲ្យទំនាក់ទំនងរបស់យើងមានបញ្ហា ។

នៅអំឡុងពេលសន្និសីទទូទៅ ខែ តុលា ឆ្នាំ ២០១៩ ប្រធាន រ័សុល អិម ណិលសុន បានអញ្ជើញសមាជិកឲ្យ « រៀបចំផែនការ [ របស់យើង ] ផ្ទាល់ » ដើម្បីពង្រឹងទីបន្ទាល់របស់យើងអំពីការស្តារឡើងវិញ ។^១ ពេលខ្ញុំគិតអំពីការអញ្ជើញរបស់លោក ខ្ញុំមានអារម្មណ៍ជឿជាក់ថា ខ្ញុំគួរតែធ្វើអ្វីមួយ ដើម្បីធ្វើឲ្យអ្វីៗបានប្រសើរឡើងរវាងអ្នកម្តាយ វ៉ុង និងខ្ញុំ ។

សម្រាប់ផែនការឆ្នាំថ្មីរបស់ខ្ញុំ ខ្ញុំបានប្តេជ្ញាចិត្តដើម្បីអានព្រះគម្ពីរមរមនជាមួយនឹងអ្នកម្តាយ វ៉ុង ។ នៅពេលណាដែលគាត់និយាយថា ភ្នែករបស់គាត់ឈឺ ខ្ញុំនិយាយថា « ម៉ាក់គ្រាន់តែស្តាប់ក៏បាន » ។ នៅពេលគាត់និយាយថា គាត់ត្រូវទៅលាងចាន ខ្ញុំទៅតាមគាត់ដល់ផ្ទះបាយ ហើយបន្តអានឲ្យឮៗ ។

ជាលទ្ធផលអ្នកម្តាយ វ៉ុងបានស្តាប់យ៉ាងប្រុងប្រយ័ត្ន ហើយបានចាំពីអ្វីដែលខ្ញុំបានអាន ។ យូរៗទៅ គាត់បានជ្រើសរើសដើម្បីអានដោយខ្លួនឯង ។ ក្រោយមកគាត់បានប្រាប់ខ្ញុំថា មនុស្សសាមញ្ញម្នាក់មិនអាចសរសេរព្រះគម្ពីរមរមនបានទេ ។ គាត់គ្មានការសង្ស័យសោះថា ព្រះគម្ពីរនេះគឺជាព្រះបន្ទូលនៃព្រះ ។ សម្រាប់ខ្ញុំ ការមើលឃើញគាត់ចេញពីការមិនចាប់អារម្មណ៍ទៅជាការចង់អាន ហើយថ្លែងទីបន្ទាល់អំពីព្រះគម្ពីរមរមន គឺជាអព្ភូតហេតុមួយ ។

ក្រោយពីអ្នកម្តាយ វ៉ុងបានជ្រមុជទឹកហើយ ខ្ញុំព្រួយថាគាត់ចូលសាសនាចក្រដោយសារតែខ្ញុំ ។ ប៉ុន្តែនៅពេលនេះ គាត់មានទីបន្ទាល់មួយសម្រាប់ខ្លួនឯងហើយ ។ អស់រយៈពេលជាច្រើនឆ្នាំ ខ្ញុំបានព្យាយាមដើម្បី « ជួយ » គាត់ ប៉ុន្តែអ្វីដែលគាត់ត្រូវការនោះគឺជាព្រះបន្ទូលដ៏សាមញ្ញ និងមានឥទ្ធិពលរបស់ព្រះតែប៉ុណ្ណោះ ។

ខ្ញុំមានអំណរគុណចំពោះព្យាការីនៅរស់ ដែលតែងតែផ្តល់ការណែនាំឲ្យយើងទាន់ពេលវេលា ។ ប្រសិនបើយើងធ្វើតាមអ្វីដែលលោកបានបង្រៀន នោះពរជ័យជាច្រើននឹងកើតមានឡើង ។ បទពិសោធន៏នេះបានបង្ហាញខ្ញុំពីរបៀបដែលព្រះអម្ចាស់សព្វព្រះទ័យប្រទានពរដល់យើង ។ អ្វីដែលខ្ញុំបានធ្វើនោះគឺគ្រាន់តែអានពីរបីជំពូកទៅកាន់ម្តាយរបស់ខ្ញុំចេញពីព្រះគម្ពីរមរមនប៉ុណ្ណោះ ។ បន្ទាប់មក ព្រះអម្ចាស់បានគង់នៅជាមួយនឹងគាត់ !