« បានដឹកនាំដោយព្យាការីដែលនៅរស់ទាំងឡាយ » លីអាហូណា ខែ កញ្ញា ឆ្នាំ ២០២២ ។
មូលដ្ឋានគ្រឹះនៃដំណឹងល្អ
បានដឹកនាំដោយព្យាការីដែលនៅរស់ទាំងឡាយ
ពួកព្យាការីគឺជាពួកបុរសទាំងឡាយណាដែលត្រូវបានហៅដោយព្រះវរបិតាសួគ៌ដើម្បីមានប្រសាសន៍ជំនួសទ្រង់ ។ ពួកព្យាការីទាំងឡាយថ្លែងទីបន្ទាល់អំពីព្រះយេស៊ូវគ្រីស្ទ និងបង្រៀនដំណឹងល្អរបស់ទ្រង់ ។ សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជឿលើពួកព្យាការីជំនាន់បុរាណផង និងពួកព្យាការីសម័យថ្មីផង ។
ព្រះមានបន្ទូលតាមរយៈពួកព្យាការី
ពួកព្យាការីទទួលវិវរណៈមកពីព្រះ ។ នៅពេលដែលព្យាការីបានបំផុសគំនិតឲ្យបង្រៀនយើង គឺដូចជាព្រះកំពុងមានព្រះបន្ទូលមកកាន់យើងដែរ ( សូមមើល គោលលទ្ធិ និង សេចក្តីសញ្ញា ១:៣៨ ) ។ យើងអាចទុកចិត្តបានថា ពួកលោកកំពុងប្រាប់យើងពីអ្វីដែលព្រះសព្វព្រះទ័យឲ្យយើងដឹង ។
ពួកព្យាការីបង្រៀនអំពីព្រះយេស៊ូវគ្រីស្ទ
ព្យាការីទាំងអស់ថ្លែងទីបន្ទាល់អំពីព្រះយេស៊ូវគ្រីស្ទ ។ ពួកលោកបង្រៀនយើងថា ទ្រង់គឺជាព្រះរាជបុត្រានៃព្រះ ។ ពួកលោកបង្រៀនយើងអំពីព្រះជន្ម គំរូ និងដង្វាយធួនរបស់ទ្រង់ ។ ហើយពួកលោកបង្ហាញដល់យើងនូវរបៀបដើម្បីធ្វើតាមទ្រង់ ហើយគោរពតាមព្រះបញ្ញត្តិទាំងឡាយរបស់ទ្រង់ ។
ការទទួលខុសត្រូវរបស់ពួកព្យាការី
ពួកព្យាការីបង្រៀនដំណឹងល្អនៃព្រះយេស៊ូវគ្រីស្ទ ។ ពួកលោកពន្យល់ពីពរជ័យដែលយើងទទួលបាន នៅពេលយើងគោរពតាមព្រះបញ្ញត្តិទាំងឡាយ និងលទ្ធផលដែលយើងនឹងទទួល ប្រសិនបើយើងមិនធ្វើតាមទេនោះ ។ ពេលខ្លះ ពួកលោកអាចនឹងត្រូវបានបំផុសគំនិតឲ្យប្រាប់យើងពីព្រឹត្តិការណ៍នាពេលអនាគត ។
ពួកព្យាការីជំនាន់បុរាណ
ម៉ូសេ និងផ្ទាំងថ្ម ដោយជេរី ហាស្តុន
ព្រះបានបង្រៀនមនុស្សតាមរយៈពួកព្យាការីចាប់តាំងពីដំបូងមកម៉្លេះ ។ ពួកព្យាការីដែលបានរស់នៅក្នុងសម័យព្រះគម្ពីរសញ្ញាចាស់រួមមាន លោកអ័ដាម ណូអេ អ័ប្រាហាំ ម៉ូសេ អេសាយ និងព្យាការីផ្សេងៗទៀត ។ ហើយក៏មានពួកព្យាការីនៅក្នុងសម័យប្រជាជនក្នុងព្រះគម្ពីរមរមនផងដែរ ។ ព្យាការីទាំងនោះរួមមាន លីហៃ ម៉ូសាយ អាលម៉ា និងមរ៉ូណៃ ។ យើងអាចរៀនអំពីអ្វីដែលពួកលោកបានបង្រៀនតាមរយៈការអានព្រះគម្ពីរ ។
ព្យាការីសម័យថ្មី
យ៉ូសែប ស៊្មីធ គឺជាព្យាការីដំបូងក្នុងសម័យបច្ចុប្បន្ននេះ ។ លោកបានស្តារសាសនាចក្រនៃព្រះយេស៊ូវគ្រីស្ទនៅលើផែនដីនេះឡើងវិញ ។ ប្រធាន រ័សុល អិម ណិលសុន គឺជាព្យាការី និងជាប្រធាននៃសាសនាចក្រនៅសព្វថ្ងៃនេះ ។ ទីប្រឹក្សារបស់លោកក្នុងគណៈប្រធានទីមួយ និងពួកសាវកដប់ពីរនាក់ក៏ជាពួកព្យាការី ពួកអ្នកមើលឆុត និងពួកអ្នកទទួលវិវរណៈផងដែរ ។
ការស្ដាប់តាមព្យាការី
ព្យាការីមានប្រសាសន៍មកកាន់យើងនៅក្នុងសន្និសីទទូទៅ ហើយនៅពេលផ្សេងៗទៀតផងដែរ ។ លោកបង្រៀនយើងពីអ្វីដែលព្រះសព្វព្រះទ័យឲ្យយើងដឹង និងរបៀបដើម្បីធ្វើតាមព្រះយេស៊ូវគ្រីស្ទនៅសព្វថ្ងៃនេះ ។ យើងអាចរកឃើញការបង្រៀនរបស់ពួកលោកនៅក្នុងទស្សនាវដ្ដី លីអាហូណា និងនៅលើគេហទំព័រ ChurchofJesusChrist.org ។
ពរជ័យនៃការធ្វើតាមព្យាការី
យើងនឹងទទួលបានពរជ័យ ប្រសិនបើយើងធ្វើតាមការបង្រៀនទាំងឡាយរបស់ព្យាការី ។ នៅពេលយើងធ្វើតាមព្យាការី នោះយើងអាចដឹងថាយើងកំពុងធ្វើអ្វីដែលព្រះសព្វព្រះទ័យឲ្យយើងធ្វើ ។ យើងអាចមានអារម្មណ៍សុខសាន្តនៅក្នុងជីវិតរបស់យើង ហើយខិតទៅកាន់តែជិតព្រះយេស៊ូវគ្រីស្ទឡើង ។