« គំរូដ៏មានអានុភាពសម្រាប់ការធ្វើជាឪពុកម្តាយ » លីអាហូណា ខែកញ្ញា ឆ្នាំ ២០២២ ។
គំរូដ៏មានអានុភាពសម្រាប់ ការធ្វើជាឪពុកម្តាយ
ដោយផ្អែកលើគោលការណ៍នៃដំណឹងល្អ និងជំនួយគាំទ្រពីការស្រាវជ្រាវ គំរូសម្រាប់ការធ្វើជាឪពុកម្តាយនេះអាចជួយដឹកនាំបងប្អូននៅក្នុងការបង្កើតទំនាក់ទំនងដ៏មានអត្ថន័យ ចិញ្ចឹមបីបាច់សេចក្តីជំនឿ និងការរីកចម្រើន ហើយនិងការស្ថាបនាសាមគ្គីភាព និងភាពអំណត់នៅក្នុងគ្រួសាររបស់បងប្អូន ។
ការធ្វើជាឪពុក ឬម្តាយមានគោលបំណងដ៏នៅអស់កល្បជានិច្ច ហើយអាចជារង្វាន់ ការបំភ្លឺ និងអំណរ ។ ប៉ុន្តែដោយសារក្រុមគ្រួសារមានគ្រប់ទម្រង់ទាំងអស់ ហើយប្រឈមមុខនឹងបញ្ហាគ្រួសារដោយឡែកពីគ្នា នោះពេលខ្លះការចិញ្ចឹមបីបាច់កូនៗក៏អាចជាគ្រាដ៏លំបាក ឬនឿយហត់ផងដែរ ។
សំណាងល្អ យើងមិនចាំបាច់ធ្វើកិច្ចការនេះតែម្នាក់ឯងនោះទេ ។
ដោយមានការណែនាំពីព្រះវរបិតាសួគ៌របស់យើង និងការគាំទ្ររបស់ព្រះអង្គសង្រ្គោះ និងដំណឹងល្អរបស់ទ្រង់ ហើយនិងការអនុវត្តតាមការប្រឹក្សាដែលបានបំផុសគំនិត នោះយើងអាចទទួលបានជំនួយ និងសេចក្តីសង្ឃឹមសម្រាប់ដំណើរក្នុងការធ្វើជាឪពុកម្តាយរបស់យើង ។
គំរូដែលបានគាំទ្រដោយដំណឹងល្អសម្រាប់ការធ្វើជាឪពុកម្តាយ
ដោយដកស្រង់ចេញពីដំណឹងល្អនៃព្រះយេស៊ូវគ្រីស្ទ និងជំនួយគាំទ្រពីការស្រាវជ្រាវស្តីពីការធ្វើជាឪពុកម្តាយ នោះយើងបានរកឃើញគោលការណ៍ណែនាំចំនួនបីសម្រាប់ការចិញ្ចឹមបីបាច់ផ្នែកសតិអារម្មណ៍ និងការអភិវឌ្ឍខាងវិញ្ញាណរបស់កុមារ ។ រួមសេចក្ដីមក ចំណុចដែលទាក់ទងគ្នាទៅវិញទៅមកទាំងនេះ បង្កើតបានជាគំរូដ៏មានឥទ្ធិពលមួយ ដែលអាចជួយក្រុមគ្រួសារជាច្រើននៅជុំវិញពិភពលោកបាន ។
គំរូនេះមានឥទ្ធិពលដោយសារវារួមបញ្ចូលសេចក្ដីពិតនៃដំណឹងល្អជាមួយនឹងគោលគំនិតសំខាន់ៗពីការស្រាវជ្រាវពីការធ្វើជាឪពុកម្តាយ និងការអភិវឌ្ឍរបស់កូន ។ ការស្វែងរកវិវរណៈផ្ទាល់ខ្លួនអំពីរបៀបដើម្បីអនុវត្តគោលការណ៍ទាំងឡាយតាមគំរូនេះអាចជួយបងប្អូនឲ្យបង្កើតភាពភាពរឹងមាំសម្រាប់គ្រួសាររបស់់បងប្អូន ហើយស្ថាបនាគេហដ្ឋានមួយដែលផ្ដោតទៅលើព្រះយេស៊ូវគ្រីស្ទ ។
គោលការណ៍ណែនាំទាំងបីនោះមាន ៖
-
បង្កើត ទំនាក់ទំនងគ្រួសារដែលពេញដោយក្ដីស្រឡាញ់
-
ចិញ្ចឹមបីបាច់ ដល់ការរៀនសូត្រ និងការរីកចម្រើន
-
ស្ថាបនា សាមគ្គីភាព និងភាពខ្លាំងតាមរយៈការបម្រើ
គំរូនេះជួយយើងឲ្យផ្ដោតលើកិច្ចការដែលសំខាន់បំផុត ។ ផ្នែកនីមួយៗនៃគំរូនេះគឺជាធាតុដ៏សំខាន់ដែលពង្រឹងក្រុមគ្រួសាររបស់យើង ។ ដោយធ្វើការរួមគ្នា វាបង្កើតឲ្យមានទំនាក់ទំនង និងបទពិសោធន៍វិជ្ជមាន វាជួយក្រុមគ្រួសារឲ្យស៊ូទ្រាំនឹងទុក្ខវេទនា ហើយស្ថាបនាសមត្ថភាព និងភាពធន់ ។
ពេលយើងរីកចម្រើនក្នងនាមជាឪពុកម្តាយ គំរូនេះអាចបម្រើជាគោលការណ៍ដ៏មានអត្ថប្រយោជន៍មួយចំពោះការរកឃើញរបៀបបង្រៀន និងចិញ្ចឹមបីបាច់ដ៏ល្អបំផុតសម្រាប់កូនម្នាក់ៗ ។
ខាងក្រោមនេះគឺជាទិដ្ឋភាពសង្ខេបមួយស្ដីពីផ្នែកនីមួយៗនៃគំរូនេះ និងគំរូមកពីព្រះជន្មរបស់ព្រះអង្គសង្គ្រោះដើម្បីដឹកនាំយើងក្នុងការអនុវត្តគំរូនេះនៅក្នុងជីវិតរបស់យើង ។ ព័ត៌មានបន្ថែមទៀតស្ដីពីការចិញ្ចឹមបីបាច់កូន ព័ត៌មានជំនួយការអនុវត្ត និងចម្លើយចំពោះសំណួរទូទៅស្ដីពីការចិញ្ចឹមបីបាច់កូនមាននៅលើគេហទំព័រ family.ChurchofJesusChrist.org ។
១. បង្កើតទំនាក់ទំនងគ្រួសារដែលពេញដោយក្ដីស្រឡាញ់
គោលការណ៍នេះរំឭកយើងឲ្យដាក់អាទិភាពលើទំនាក់ទំនងដែលពេញដោយក្ដីស្រឡាញ់ជាមួយនឹងព្រះវរបិតាសួគ៌ ព្រះអង្គសង្គ្រោះ និងកូនៗរបស់យើង ។ ទំនាក់ទំនងគ្រួសារទាំងនេះមានសារៈសំខាន់ខ្លាំងណាស់ ។ អត្តសញ្ញាណ និងទំនាក់ទំនងដ៏នៅអស់កល្បជានិច្ចរបស់កូនៗយើងរីកចម្រើនចេញពីសេចក្ដីពិតដ៏សំខាន់ដែលថា « មនុស្សម្នាក់ៗសុទ្ធតែជាបុត្រា និងបុត្រីខាងវិញ្ញាណរបស់ព្រះមាតាបិតាសួគ៌ ដូច្នេះហើយមនុស្សម្នាក់ៗមានចរិត និងគោលដៅនៃព្រះ » ។១
យើងអាចលើកទឹកចិត្តពួកគេឲ្យមកស្គាល់ព្រះ និងព្រះយេស៊ូវគ្រីស្ទតាមរយៈសេចក្ដីជំនឿ ការអធិស្ឋាន ការសិក្សាព្រះគម្ពីរ និងវិវរណៈផ្ទាល់ខ្លួនមកពីព្រះវិញ្ញាណបរិសុទ្ធ ( សូមមើល យ៉ូហាន ១៧:៣ ) ។ យើងអាចបណ្ដុះសេចក្ដីជំនឿដោយចិញ្ចឹមបីបាច់ « ការចង់ជឿ » ( អាលម៉ា ៣២:២៧ ) របស់កូនៗយើង និងដោយជួយពួកគេឲ្យទទួលអារម្មណ៍ពីសេចក្ដីស្រឡាញ់របស់ព្រះ ។ វាគឺជារឿងសំខាន់ចំពោះកូនៗរបស់យើងដើម្បីដឹងថា ព្រះវរបិតាសួគ៌ និងព្រះអង្គសង្គ្រោះយល់ពីពួកគេទាំងស្រុង ស្រឡាញ់ពួកគេយ៉ាងល្អឥតខ្ចោះ ហើយសព្វព្រះទ័យចង់ជួយពួកគេឲ្យទទួលបានជោគជ័យ ( សូមមើល រ៉ូម ៨:៣៨–៣៩ ) ។២
ក្នុងនាមជាឪពុកម្តាយ វាគឺជារឿងសំខាន់ដើម្បីបង្កើតទំនាក់ទំនងដ៏គួរឲ្យស្រឡាញ់ជាមួយនឹងកូនម្នាក់ៗដោយពោរពេញដោយភាពកក់ក្ដៅ និងការយល់ចិត្ត ។ ការយល់ដឹងពីទស្សនវិស័យរបស់កូនៗរបស់យើង និងការស្ដាប់អ្វីដែលពួកគេនិយាយដោយការគោរព វាបង្កើតទំនាក់ទំនងដ៏សុវត្ថិភាព និងពេញដោយក្ដីស្រឡាញ់ ។ កូនៗរបស់យើងចាំបាច់ត្រូវដឹងថា យើងមានចំណាប់អារម្មណ៍ចំពោះពួកគេ ខ្វល់ខ្វាយពីអារម្មណ៍របស់ពួកគេ និងនៅក្បែរដើម្បីជួយពួកគេ ។ ការប្រាស្រ័យទាក់ទងដ៏យកចិត្តទុកដាក់របស់យើងជាមួយនឹងកូនៗរបស់យើងជួយពួកគេឲ្យអភិវឌ្ឍទស្សនៈវិជ្ជមានចំពោះខ្លួនឯង ស្គាល់គុណតម្លៃដ៏នៅអស់កល្បជានិច្ចរបស់ខ្លួន និងបង្កើតទំនាក់ទំនងដ៏ស្មោះស្ម័គ្រជាមួយនឹងព្រះ និងព្រះយេស៊ូវគ្រីស្ទ ។
លើសពីនេះ សមាជិកគ្រួសារអាចជាការគាំទ្រយ៉ាងខ្លាំងដល់គ្នាទៅវិញទៅមកបាន ។ យើងអាចពង្រឹងទំនាក់ទំនងគ្រួសារ កាលដែលយើងជួបជុំគ្នាដើម្បីភ្ជាប់ទំនាក់ទំនង អធិស្ឋាន ប្រឹក្សា និងកម្សាន្តសប្បាយជាមួយគ្នា ។
មើលទៅព្រះគ្រីស្ទ
ព្រះយេស៊ូវគ្រីស្ទបានចែកចាយសេចក្តីស្រឡាញ់របស់ទ្រង់ ម្តងម្នាក់ៗ តាមរយៈទំនាក់ទំនងដែលផ្តល់ឲ្យនូវការមានចំណែក សេចក្តីសង្ឃឹម និងការព្យាបាល ។ បន្ទាប់ពីព្រះយេស៊ូវបានបញ្ចប់ការមានព្រះបន្ទូលទៅកាន់ពួកសាសន៍នីហ្វៃរួចហើយ ទ្រង់បានឈោងទៅជួយ និងផ្តល់ការងារបម្រើដោយក្តីមេត្តា និងដោយផ្ទាល់ដើម្បីព្យាបាល និងប្រទានពរដល់បុគ្គលម្នាក់ៗ ។ ទ្រង់ « បានយកកូនក្មេងរបស់ [ ពួកគេ ] ម្ដងម្នាក់ៗ ហើយបានប្រទានពរដល់ពួកវា ហើយបានអធិស្ឋានដល់ព្រះវរបិតាសម្រាប់ពួកវា » ពេញដោយក្តីស្រឡាញ់ ( នីហ្វៃទី៣ ១៧:២១ ) ។
ក្នុងនាមជាឪពុក ឬម្ដាយ បងប្អូនអាចផ្តល់ពរដល់កូនៗរបស់បងប្អូនដោយការបង្កើតទំនាក់ទំនងដ៏ពេញដោយក្តីស្រឡាញ់ជាមួយពួកគេ—ការមានទំនាក់ទំនងដ៏មានអត្ថន័យម្តងមួយៗ ។
គំនិតសម្រាប់ការបង្កើតទំនាក់ទំនងគ្រួសារដែលពេញដោយក្ដីស្រឡាញ់
-
សូមទាក់ទងជាមួយកូនៗរបស់បងប្អូនដោយការស្តាប់ដោយយកចិត្តទុកដាក់ ដោយឆ្លើយតបដោយក្តីស្រឡាញ់ និងការធ្វើតាមយោបល់របស់ពួកគេដើម្បីបំពេញតម្រូវការរបស់ពួកគេ ។
-
ពង្រឹងសេចក្តីជំនឿលើព្រះវរបិតាសួគ៌ និងព្រះយេស៊ូវគ្រីស្ទ និងលើកទឹកចិត្តឲ្យមានការអធិស្ឋាន និងវិវរណៈផ្ទាល់ខ្លួន ដើម្បីពង្រឹងទំនាក់ទំនងដ៏ទេវភាពទាំងនេះ ។
-
ថែរក្សាខ្លួនរបស់បងប្អូន និងអាពាហ៍ពិពាហ៍របស់បងប្អូន ។ ការណ៍នេះនឹងជួយបងប្អូនឲ្យមានទំនាក់ទំនងជាមួយកូនៗរបស់បងប្អូនកាន់តែប្រសើរ និងដើម្បីធ្វើជាម្តាយ ឬឪពុកជាមួយស្វាមី ឬភរិយារបស់បងប្អូនដោយសាមគ្គីភាព និងក្តីស្រឡាញ់ ក្នុងនាមជាដៃគូស្មើភាពគ្នា ។ ប្រសិនបើបងប្អូននៅលីវ សូមដឹកនាំគ្រួសាររបស់បងប្អូនដោយមានសេចក្តីជំនឿ និងទំនុកចិត្ត ។ សូមស្វែងរកការគាំទ្របន្ថែមទៀតពីអ្នកទាំងឡាយដែលបងប្អូនទុកចិត្ត ។
-
សូមពង្រឹងសុវត្ថិភាព ការមានចំណែក និងភាពរីករាយនៅក្នុងគេហដ្ឋានរបស់បងប្អូន ។
២. ចិញ្ចឹមបីបាច់ដល់ការរៀនសូត្រ និងការរីកចម្រើន
សូមចិញ្ចឹមបីបាច់ការរីកចម្រើនរបស់កូនៗរបស់បងប្អូន ដោយការវាយតម្លៃលើបុគ្គលិកលក្ខណៈពិសេសរបស់ពួកគេ ផ្តល់ក្តីស្រឡាញ់ដែលមិនប្រែប្រួលដល់ពួកគេ និងគាំទ្រដល់កិច្ចខិតខំរបស់ពួកគេ ។ ស្វែងយល់ពីចំណុចដែលកូនរបស់បងប្អូនកំពុងស្ថិតនៅក្នុងការអភិវឌ្ឍរបស់ពួកគេ ហើយរៀបចំជំនួយរបស់បងប្អូនឲ្យត្រូវទៅនឹងតម្រូវការជាក់លាក់របស់ពួកគេ ។ គំរូ ការបង្រៀន ការណែនាំ និងការលើកទឹកចិត្តគឺមានសារៈសំខាន់ ក្នុងការការចិញ្ចឹមបីបាច់នូវសមត្ថភាព និងទំនុកចិត្តកូនៗរបស់បងប្អូន ។ សូមចេះឆ្ងល់ និងមានចិត្តអាណិតអាសូរ នៅពេលកូនៗរបស់បងប្អូនរៀនតាមរយៈបទពិសោធន៍ ។
ការចិញ្ចឹមបីបាច់របស់ឪពុកម្តាយក៏ត្រូវចៀសវាងពីការទាមទារពេក ការផ្តល់សេរីភាពពេក ឬបណ្តាយពេកផងដែរ ។ ការផ្តល់នូវដែនកំណត់សមរម្យ ទម្លាប់ទៀងទាត់ និងការរំពឹងទុកដែលសមហេតុផលនឹងជំរុញឲ្យមានការលូតលាស់ដល់កូនៗរបស់បងប្អូន ។ ដូចជាព្រះវរបិតាសួគ៌របស់យើងដែរ ឪពុកម្តាយគួរតែផ្តោតទៅលើការជួយដល់ការរីកចម្រើនរបស់កូនៗពួកគេ ជាជាងផាសុកភាពរបស់ពួកគេ ( សូមមើល នីហ្វៃទី២ ២៨:៣០; គោលលទ្ធិ និងសេចក្តីសញ្ញា ៥០:២៤, ៤០ ) ។
ដឹកនាំ ណែនាំ និងដើរនៅជិតកូនៗរបស់បងប្អូនកាលដែលពួកគេរៀនធ្វើតាមព្រះយេស៊ូវគ្រីស្ទ ។៣ សូមបង្រៀនពួកគេពីរបៀបដើម្បីងាកទៅរកព្រះអង្គសង្គ្រោះ និងពឹងផ្អែកទៅលើដង្វាយធួនរបស់ទ្រង់ដើម្បីជួយពួកគេឲ្យរីកចម្រើន ។ កូនៗរបស់បងប្អូននឹងស្វែងយល់ពីគំរូរបស់បងប្អូនបន្តិចម្តងៗ និងបទពិសោធន៍របស់ពួកគេផ្ទាល់ដែលពួកគេ « អាចនឹងធ្វើគ្រប់ទាំងអស់បាន ដោយសារព្រះគ្រីស្ទ » ដែលទ្រង់ប្រទានការអភ័យទោស និងពង្រឹងដល់ពួកគេ ( ភីលីព ៤:១៣ ) ។ ការរីកចម្រើន និងការផ្លាស់ប្តូរអាចជារឿងពិបាក និងត្រូវការការអនុវត្តជាច្រើន ។ ឪពុកម្តាយសុចរិត និងដែលមានគោលបំណងខិតខំបង្រៀនកូនៗរបស់ពួកគាត់មិនត្រឹមតែពី របៀប « ឲ្យដើរតាមផ្លូវទាំងឡាយដែលពិត » ប៉ុណ្ណោះទេ ( ម៉ូសាយ ៤:១៥ ) ប៉ុន្តែក៏បង្រៀនពី មូលហេតុ ដែលពួកគេគួរតែធ្វើដូច្នោះផងដែរ ។ សូមចិញ្ចឹមបីបាច់ការយល់ដឹងរបស់ពួកគេ និងគាំទ្រការប្រើប្រាស់សិទ្ធិជ្រើសរើសសុចរិតរបស់ពួកគេនូវរាល់ជំហានដែលពួកគេដើរ ។
មើលទៅព្រះគ្រីស្ទ
ព្រះយេស៊ូវគ្រីស្ទប្រទានអំណាចដល់ការរីកចម្រើនរបស់បងប្អូន ដោយការមើលទៅលើសេចក្តីប្រាថ្នាដ៏សុចរិតនៃដួងចិត្តរបស់បងប្អូន ហើយជួយបងប្អូនឲ្យសម្រេចសេចក្តីប្រាថ្នានោះ ( សូមមើល សាំយូអែល ទី១ ១៦:៧; អេណុស ១:១២ ) ។ ព្រះអម្ចាស់បានសួរទៅពួកសិស្សរបស់ទ្រង់ « ម្ដងម្នាក់ៗ … តើអ្នករាល់គ្នាប្រាថ្នាអ្វីពីយើង ? » ( នីហ្វៃទី៣ ២៨:១; សូមមើលផងដែរ នីហ្វៃទី១ ១១:១–៣ ) ។ ការសញ្ជឹងគិតពីសំណួរនេះអាចជួយបងប្អូនឲ្យរកឃើញ និងអភិវឌ្ឍអ្វីដែលបងប្អូនឲ្យតម្លៃបំផុត ។ សូមពិចារណាអំពីរបៀបដែលព្រះអង្គសង្គ្រោះបានចិញ្ចឹមបីបាច់ការរៀនសូត្រ និងការរីកចម្រើនរបស់បងប្រុសរបស់យ៉ារេឌ ដោយការគោរពសិទ្ធិជ្រើសរើសរបស់គាត់ ហើយសួរថា « តើអ្នកចង់ឲ្យយើងធ្វើអ្វី ? » ( អេធើរ ២:២៣ ) ។ ព្រះអម្ចាស់បានគាំទ្រគាត់ដោយផ្តល់ការណែនាំដ៏ជាក់លាក់នៅពេលចាំបាច់ ប៉ុន្តែក៏ដោយការលើកទឹកចិត្តគាត់ឲ្យដោះស្រាយរឿងមួយចំនួនដោយខ្លួនគាត់ផ្ទាល់ផងដែរ ។ ព្រះអង្គសង្គ្រោះមិនបង្ខំ ឬគ្រប់គ្រងបងប្អូនទេ ប៉ុន្តែផ្ទុយទៅវិញ ទ្រង់បង្រៀន និងបញ្ចុះបញ្ចូលបងប្អូនឲ្យប្រើសិទ្ធិជ្រើសរើសរបស់បងប្អូនរៀងៗខ្លួនសម្រាប់សេចក្តីល្អ ( សូមមើល គោលលទ្ធិ និងសេចក្តីសញ្ញា ៥៨:២៦–២៨ ) ។
សូមលើកទឹកចិត្តដល់ការរីកចម្រើនរបស់កូនៗបងប្អូនដោយគាំទ្រសេចក្តីប៉ងប្រាថ្នាដ៏សុចរិតនៃដួងចិត្តរបស់ពួកគេ—សំណួរដ៏ឈ្លាសវៃម្តងមួយៗ ។
គំនិតសម្រាប់ការចិញ្ចឹមបីបាច់ដល់ការរៀនសូត្រ និងការរីកចម្រើន
-
សូមចង្អុលបង្ហាញកូនៗរបស់បងប្អូនទៅកាន់ព្រះយេស៊ូវគ្រីស្ទ ហើយបង្រៀនពួកគេពីរបៀបដើម្បីទទួលបានព្រះចេស្តានៃដង្វាយធួនរបស់ទ្រង់ ។
-
សូមធ្វើតាមព្រះយេស៊ូវគ្រីស្ទ ដោយផ្តល់នូវសេចក្តីស្រឡាញ់ ការណែនាំ ការគាំទ្រ និងសេចក្តីមេត្តាករុណា នៅពេលកូនៗរបស់បងប្អូនរៀនធ្វើតាមទ្រង់ ។
-
សូមបណ្តុះការរីកចម្រើនដោយការគាំទ្រដល់ការយល់ដឹង សមត្ថភាព សិទ្ធិជ្រើសរើស និងទំនុកចិត្តរបស់កូនបងប្អូន ។
-
សូមមករកព្រះគ្រីស្ទដោយរៀនពីដំណឹងល្អរបស់ទ្រង់ ហើយរៀនរស់នៅតាមដំណឹងល្អជាមួយគ្នា នៅពេលបងប្អូនរីកចម្រើនតាមមាគ៌ានៃសេចក្តីសញ្ញានេះ ។
៣. ស្ថាបនាសាមគ្គីភាព និងភាពខ្លាំងតាមរយៈការបម្រើ
« ព្រះយេស៊ូវគ្រីស្ទបានបង្រៀនសិស្សរបស់ទ្រង់ឲ្យ « ស្រឡាញ់គ្នា ដូចជាខ្ញុំបានស្រឡាញ់អ្នករាល់គ្នាដែរ » ( យ៉ូហាន ១៣:៣៤ ) ។ នៅពេលបងប្អូនលួងលោម លើកស្ទួយ និងបម្រើគ្នាទៅវិញទៅមក នោះបងប្អូនកំពុងផ្សព្វផ្សាយសេចក្ដីស្រឡាញ់ដ៏បរិសុទ្ធរបស់ព្រះគ្រីស្ទ ហើយក្លាយកាន់តែដូចជាទ្រង់ ។ ព្រះក៏ប្រទានឱកាសដ៏មានតម្លៃជាច្រើនសម្រាប់កូនៗរបស់បងប្អូនដើម្បីរៀន និងរីកចម្រើនដោយការចូលរួមក្នុងកិច្ចការរបស់ទ្រង់ និងបំពេញការសន្យារបស់ពួកគេក្នុងការបម្រើអ្នកដទៃផងដែរ ( សូមមើល ម៉ូសេ ១:៣៩; ម៉ូសាយ ១៨:៧–១១ ) ។ ការចែកចាយសេចក្តីស្រឡាញ់របស់ព្រះគ្រីស្ទ និងការបញ្ចេញពន្លឺរបស់ទ្រង់ ផ្លាស់ប្តូរពួកគេ និងអស់អ្នកដែលពួកគេបម្រើ ។
គ្រួសាររបស់បងប្អូនក៏ទទួលបានអត្ថប្រយោជន៍ផងដែរពីការធ្វើជាសមាជិកក្នុងវួដ ឬសាខាដែលកូនៗរបស់បងប្អូនផ្តល់ និងទទួលបានក្ដីស្រឡាញ់ និងការគាំទ្រ ។ ចងក្រងចិត្តរបស់បងប្អូន « រួមគ្នាដោយសាមគ្គី ហើយស្រឡាញ់គ្នាទៅវិញទៅមក » ( ម៉ូសាយ ១៨:២១ ) ត្បាញបណ្តាញនៃទំនាក់ទំនងគាំទ្រ និងបទពិសោធន៍វិជ្ជមានដែលពង្រឹងគ្រួសាររបស់បងប្អូន ។ ពេលបងប្អូនបម្រើអ្នកដទៃដោយសេចក្ដីស្រឡាញ់ដូចជាព្រះគ្រីស្ទ នោះបងប្អូនអាចជួយស្ថាបនាក្រុងស៊ីយ៉ូនក្នុងគ្រួសាររបស់បងប្អូន និងក្នុងសង្គមទាំងមូលផងដែរ ( សូមមើល ម៉ូសេ ៧:១៨ ) ។
សូមបង្រៀនកុមារថា ការបម្រើអាចជាការអនុវត្តប្រចាំថ្ងៃ មិនមែនជាគម្រោងដែលនៅដាច់ដោយឡែកឡើយ ។ ការខិតខំបម្រើគ្នាទៅវិញទៅមកនឹងជួយកុមារ និងយុវជនឲ្យរកឃើញជីវិតកាន់តែពេញលេញ ពេលពួកគេខ្វល់ខ្វាយពីតម្រូវការអ្នកដទៃ ជាជាងតម្រូវការផ្ទាល់ខ្លួន ។ របៀបដែលការស្ថាបនាក្រុងស៊ីយ៉ូនបង្កើតប្រជាជនក្រុងស៊ីយ៉ូន មានភាពអស្ចារ្យណាស់ ។
មើលទៅព្រះគ្រីស្ទ
ព្រះអង្គសង្គ្រោះបានអញ្ជើញយើងម្នាក់ៗឲ្យចេះស្រឡាញ់គ្នា និងបម្រើគ្នាទៅវិញទៅមក ( សូមមើល យ៉ូហាន ១៣:៣៤–៣៥ ) ។ ការចូលរួមនៅក្នុងកិច្ចការនៃសេចក្ដីសង្គ្រោះរបស់ព្រះវរបិតាសួគ៌ពង្រឹង និងផ្លាស់ប្ដូរយើង ។ ការ « នៅក្នុងកិច្ចការរបស់ព្រះវរបិតា [ ទ្រង់ ] » ( លូកា ២:៤៩ ) គឺជាផ្នែកមួយនៃការរីកចម្រើនដែលព្រះយេស៊ូវបានមានពិសោធន៍នៅក្នុងយុវវ័យរបស់ទ្រង់ កាលទ្រង់ « កាន់តែធំប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង » ( លូកា ២:៥២ ) ។
គ្រួសាររបស់បងប្អូនចូលរួមនៅក្នុងកិច្ចការនៃសេចក្ដីសង្គ្រោះ និងភាពតម្កើងឡើងរបស់ព្រះដោយការរស់នៅតាមដំណឹងល្អរបស់ព្រះយេស៊ូវគ្រីស្ទ មើលថែដល់អ្នកខ្វះខាត អញ្ជើញមនុស្សទាំងអស់ឲ្យទទួលយកដំណឹងល្អ និងបង្រួបបង្រួមក្រុមគ្រួសារសម្រាប់ភាពអស់កល្បជានិច្ច ។៤
សូមចិញ្ចឹមបីបាច់ការរីកចម្រើនរបស់កូនៗបងប្អូនដោយបង្រួបបង្រួមនៅក្នុង « កិច្ចការដ៏ធំ » របស់ព្រះ ( គោលលទ្ធិ និង សេចក្ដីសញ្ញា ៦៤:៣៣ )—គឺទង្វើនៃការបម្រើដែលពេញដោយក្ដីស្រឡាញ់ម្តងមួយៗ ។
គំនិតសម្រាប់ស្ថាបនាសាមគ្គីភាព និងភាពខ្លាំងតាមរយៈការបម្រើ
-
បង្ហាញសេចក្ដីស្រឡាញ់របស់បងប្អូនចំពោះព្រះ ហើយមកស្គាល់ទ្រង់កាន់តែប្រសើរតាមរយៈការស្រឡាញ់ និងការបម្រើដល់បុត្រាបុត្រីរបស់ទ្រង់ ។
-
ស្រឡាញ់គ្នាទៅវិញទៅមកដោយធ្វើការងារបម្រើដល់មនុស្សនៅជុំវិញខ្លួនរបស់បងប្អូន ហើយមើលថែដល់អស់អ្នកដែលខ្វះខាត ។
-
ប្រមូលផ្ដុំអ៊ីស្រាអែលដោយចែកចាយដំណឹងល្អ ស្រាវជ្រាវពង្សប្រវត្តិរបស់បងប្អូន បម្រើនៅក្នុងព្រះវិហារបរិសុទ្ធ និងជួយមនុស្សដទៃឲ្យចុះ និងរក្សាសេចក្ដីសញ្ញាដ៏ពិសិដ្ឋទាំងឡាយ ។
-
ស្ថាបនាសាមគ្គីភាព និងភាពខ្លាំងដោយការផ្ដល់សេចក្ដីស្រឡាញ់ ការបង្កើតអារម្មណ៍នៃការមានចំណែក និងការគាំទ្រគ្នាទៅវិញទៅមក ។
ការអនុវត្តគំរូនោះនៅក្នុងគេហដ្ឋានរបស់បងប្អូន
គោលការណ៍ណែនាំទាំងនេះអាចជួយឲ្យផ្ដោតលើការចិញ្ចឹមបីបាច់កូនរបស់បងប្អូនជារៀងរាល់ថ្ងៃ ។ ឧទាហរណ៍ នៅថ្ងៃនេះបងប្អូនអាចពិចារណាពីរបៀបដែលបងប្អូនអាច បង្កើត ទំនាក់ទំនងកាន់តែពេញដោយក្ដីស្រឡាញ់ដោយចេតនាពិត ចិញ្ចឹមបីបាច់ ការរៀនសូត្រ ឬ ពង្រឹង មនុស្សផ្សេងទៀត ។ ការអនុវត្តតាមគំរូនេះអាចពង្រីកការរៀនសូត្រដំណឹងល្អ បណ្ដុះការរីកចម្រើនផ្ទាល់ខ្លួនរបស់កូនៗបងប្អូន ហើយលើកទឹកចិត្តឲ្យផ្ដោតទៅលើរឿងល្អៗដែលកំពុងកើតឡើងនៅជុំវិញ ដែលនឹងលើកស្ទួយ ហើយផ្ដល់ពរដល់គ្រួសាររបស់បងប្អូន ។ ការអនុវត្តគោលការណ៍ទាំងនេះក៏អាចកែលម្អការប្រើប្រាស់ធនធានសាសនាចក្រដែលផ្ដោតទៅលើគេហដ្ឋានរបស់បងប្អូនផងដែរ ដូចជា ចូរមកតាមខ្ញុំ និងកម្មវិធីកុមារ និងយុវវ័យ ។
មានរបៀបជាច្រើនដើម្បីអនុវត្តគោលការណ៍នៃគំរូនេះ ។ សូមមានភាពបត់បែន ហើយស្វែងរកវិវរណៈផ្ទាល់ខ្លួនដើម្បីសម្របវាទៅតាមតម្រូវការនៃគ្រួសាររបស់បងប្អូន ។ គំរូ « បង្កើត ចិញ្ចឹមបីបាច់ ស្ថាបនា » នេះ មិនសំខាន់ទៅលើការធ្វើកិច្ចការច្រើននោះទេ ។ ខណៈដែលមានរឿងជាច្រើនដែលបងប្អូនទទួលបានការបំផុសគំនិតឲ្យបន្ថែមទៅនឹងអ្វីដែលបងប្អូនកំពុងធ្វើបច្ចុប្បន្ន គំរូនេះគឺមានបំណងដើម្បីជួយបងប្អូនឲ្យចំណាយពេលដែលបងប្អូនមានរួមគ្នា ឲ្យមានប្រយោជន៍បំផុត ។
នៅពេលបងប្អូនធ្វើអ្វីមួយដើម្បី បង្កើត ទំនាក់ទំនងពេញដោយក្ដីស្រឡាញ់ ចិញ្ចឹមបីបាច់ ដល់ការរៀនសូត្រ និងការរីកចម្រើន ឬ ស្ថាបនា សាមគ្គីភាព និងភាពខ្លាំងតាមរយៈការបម្រើ នោះបងប្អូនកំពុងចាក់គ្រឹះដ៏រឹងមាំចំពោះរឿងគ្រប់យ៉ាងដែលបងប្អូនធ្វើនៅក្នុងគេហដ្ឋានរបស់បងប្អូន ។
ឪពុកម្តាយល្អគឺជាមនុស្សដែលអាចទុកចិត្តបាន ប៉ុន្តែមិនល្អឥតខ្ចោះទេ
វាជាការសំខាន់ដែលត្រូវចងចាំថា បងប្អូនមិនចាំបាច់ត្រូវមានភាពល្អឥតខ្ចោះដើម្បីធ្វើជាឪពុកម្តាយល្អនោះទេ ។ ផ្ទុយទៅវិញ សូមខិតខំធ្វើជាប្រភពនៃសេចក្ដីស្រឡាញ់ និងការគាំទ្រដែលអាចទុកចិត្តបានសម្រាប់កូនៗរបស់បងប្អូន ។ ការចូលរួមយ៉ាងសាមញ្ញជាមួយនឹងកូនរបស់បងប្អូនតាមវិធីតូចតាចអាចធ្វើឲ្យមានភាពខុសប្លែកដ៏ធំមួយ ។
នៅពេលមានអារម្មណ៍បាក់ទឹកចិត្តក្នុងការចិញ្ចឹមបីបាច់កូន នោះត្រូវដកដង្ហើមមួយៗ សម្រួលឥរិយាបថ និងបន្តខិតខំតទៅទៀត ។ បងប្អូនអាចឆ្ពោះទៅមុខដោយសេចក្ដីជំនឿដោយដឹងថា ព្រះអង្គសង្គ្រោះយកព្រះទ័យទុកដាក់យ៉ាងខ្លាំងចំពោះបងប្អូន និងកូនៗរបស់បងប្អូន ហើយទ្រង់តម្កើងការខិតខំដ៏ស្មោះ និងបំណងប្រាថ្នាដ៏សុចរិតរបស់បងប្អូន ។
សេចក្ដីសង្ឃឹមនៅក្នុងព្រះគ្រីស្ទ
ពេលបងប្អូនខិតខំខ្ជាប់ខ្ជួនប្រឹងប្រែងឲ្យអស់ពីលទ្ធភាពរបស់ខ្លួនដើម្បីស្រឡាញ់ ចិញ្ចឹមបីបាច់ និងពង្រឹងកូនម្នាក់ៗ ម្ដងមួយៗ នោះបងប្អូន និងគ្រួសាររបស់បងប្អូនអាចមានសេចក្ដីសង្ឃឹមលើព្រះគ្រីស្ទ ដោយសារតែការសន្យាដ៏នៅអស់កល្បជានិច្ចរបស់ទ្រង់ចំពោះបងប្អូនថា « កុំឲ្យខ្លាចឡើយ កូនក្មេងតូចអើយ ដ្បិតអ្នករាល់គ្នាជារបស់ផងយើង ហើយយើងបានឈ្នះលើលោកិយហើយ » ( គោលលទ្ធិ និង សេចក្ដីសញ្ញា ៥០:៤១ ) ។