« តើការសរសេររបស់អេសាយបង្រៀនខ្ញុំអ្វីខ្លះអំពីព្រះយេស៊ូវគ្រីស្ទ ? » លីអាហូណា ខែ កញ្ញា ឆ្នាំ ២០២២ ។
ចូរមកតាមខ្ញុំ
តើការសរសេររបស់អេសាយបង្រៀនខ្ញុំអ្វីខ្លះអំពីព្រះយេស៊ូវគ្រីស្ទ ?
ពាក្យពេចន៍របស់អេសាយដែលបានសរសេរប្រហែលជាជាង ២៧០០ ឆ្នាំកន្លងទៅហើយ ពេលខ្លះអាចមើលទៅហាក់ដូចជាស្មុគស្មាញ ឬមានការភាន់ច្រឡំចំពោះយើង ។ យ៉ាងណាមិញ ការអានគម្ពីរអេសាយគឺជាវិធីដ៏ល្អបំផុតមួយដែលយើងអាចរៀនបន្ថែមទៀតអំពីព្រះយេស៊ូវគ្រីស្ទ ។ នីហ្វៃបានដកស្រង់ប្រសាសន៍របស់អេសាយដើម្បីលោកអាច « បញ្ចុះបញ្ចូល [ ពួកសាសន៍នីហ្វៃ ] ឲ្យបានច្រើនថែមទៀត ឲ្យជឿដល់ព្រះអម្ចាស់ ជាព្រះដ៏ប្រោសលោះរបស់ពួកគេ » ( នីហ្វៃទី១ ១៩:២៣ ) ។ ដើម្បីយល់ពីគម្ពីរអេសាយកាន់តែច្បាស់ សូមព្យាយាមផ្តោតការសិក្សារបស់បងប្អូនទៅលើការបង្រៀនរបស់អេសាយអំពីព្រះអង្គសង្រ្គោះ ។
សូមស្វែងរកចម្លើយអំពីសំណួរដូចតទៅនេះ ពេលបងប្អូនសិក្សាជំពូកទាំងនេះ ៖
-
តើអេលាគីមតំណាងឲ្យព្រះយេស៊ូវគ្រីស្ទយ៉ាងដូចម្តេច ? ( សូមមើល អេសាយ ២២:២០–២៥ ) ។
-
តើព្រះគ្រីស្ទនឹងធ្វើអ្វីខ្លះសម្រាប់បងប្អូននៅពេលនៃការរស់ឡើងវិញ ? ( សូមមើល អេសាយ ២៥:៨ ) ។
-
តើព្រះគ្រីស្ទបង្រៀនរាស្រ្តរបស់ទ្រង់យ៉ាងដូចម្ដេច ? ( សូមមើល អេសាយ ២៨:១០ ) ។
-
តើអេសាយបានរៀបរាប់អំពីការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទនៅថ្ងៃចុងក្រោយយ៉ាងដូចម្តេច ? ( សូមមើល អេសាយ ២៩:១៤ ) ។
-
តើវានឹងមានស្ថានភាពបែបណា នៅពេលព្រះគ្រីស្ទយាងមកម្តងទៀត ? ( សូមមើល អេសាយ ៣៥:១០ ) ។
« អេសាយបានថ្លែងម្ដងហើយម្ដងទៀតអំពីព្រះចេស្ដាព្យាបាល និងលួងលោមចិត្តរបស់ព្រះអម្ចាស់ ។ … ព្រះវិញ្ញាណរបស់ទ្រង់ព្យាបាល បន្សុទ្ធ លួងលោមចិត្ត និងនាំយកជីវិតថ្មីចូលទៅក្នុងដួងចិត្តដែលអស់សង្ឃឹម ។ ព្រះវិញ្ញាណមានព្រះចេស្តាដើម្បីផ្លាស់ប្តូរអ្វីដែលអាក្រក់ និងសាហាវ ព្រមទាំងគ្មានតម្លៃនៅក្នុងជីវិត ទៅជាអ្វីមួយដែលមានភាពរុងរឿង និងឧត្តម ។ ទ្រង់មានព្រះចេស្ដាដើម្បីបង្វែរផេះផង់នៃជីវិតរមែងស្លាប់ទៅជាភាពស្រស់ស្អាតនៃភាពអស់កល្បជានិច្ច » ( ថាត អរ ខាលីស្ទើរ The Infinite Atonement [ ឆ្នាំ ២០០០ ] ទំព័រ ២០៦–៧ ) ។