« មានសេចក្ដីសង្ឃឹម » លីអាហូណា ខែ កញ្ញា ឆ្នាំ ២០២២
សូមស្វាគមន៍មកកាន់ច្បាប់នេះ
មានសេចក្ដីសង្ឃឹម !
មិនថាយើងប្រឈមមុខនឹងឧបសគ្គអ្វីនោះទេ ព្រះយេស៊ូវគ្រីស្ទគឺជាសេចក្តីសង្ឃឹមរបស់យើង ។ អែលឌើរ រ៉ូណល អេ រ៉ាសបាន នៃកូរ៉ុមនៃពួកសាវកដប់ពីរនាក់បានបង្កើតប្រធានបទសម្រាប់ច្បាប់ប្រចាំខែនេះជាមួយនឹងសេចក្តីពិតដ៏ស្រស់ស្អាតនោះនៅក្នុងអត្ថបទថ្មីរបស់លោក « សេចក្ដីសង្ឃឹម និងការលួងលោមនៅក្នុងព្រះគ្រីស្ទ » ( ទំព័រ ៤ ) ។
ចំពោះឪពុកម្តាយជាច្រើន សារលិខិតនៃសេចក្ដីសង្ឃឹមនោះគឺជាសេចក្តីត្រូវការជាពិសេសកាលដែលពួកគាត់ខិតខំអស់ពីសមត្ថភាពដើម្បីចិញ្ចឹមបីបាច់កូនៗរបស់ពួកគាត់នៅក្នុងពិភពលោកដ៏លំបាកមួយនេះ ។ ប្រធាន រ័សុល អិម ណិលសុន បានបង្រៀន ៖ « មារសត្រូវកំពុងបង្កើនការវាយប្រហាររបស់វាទៅលើសេចក្ដីជំនឿមកលើយើង និងក្រុមគ្រួសារក្នុងអត្រាដ៏លឿន ។ ដើម្បីរស់រានខាងវិញ្ញាណ យើងត្រូវការយុទ្ធសាស្ត្រវាយបក និងផែនការទុកជាមុន » ( « Opening Remarks » Liahona ខែ វិច្ឆិកា ឆ្នាំ ២០១៨ ទំព័រ ៧ ) ។ ដើម្បីជួយគាំទ្រដល់ការងារដ៏ពិសិដ្ឋរបស់ឪពុកម្តាយ សាសនាចក្របន្តខិតខំដើម្បីផ្តល់ជូននូវធនធានទាំងឡាយដែលពាក់ព័ន្ធ និងមានអត្ថប្រយោជន៍ ។
នៅក្នុងច្បាប់ខែនេះ សហនិពន្ធរបស់ខ្ញុំ និងខ្ញុំសូមចែកចាយគំរូសម្រាប់ឪពុកម្តាយដែលនាំមកនូវគោលការណ៍ដំណឹងល្អ និងយុទ្ធសាស្រ្តអនុវត្តជាក់ស្តែងដែលអាចជួយឪពុកម្តាយឲ្យបង្កើតទំនាក់ទំនងដ៏រឹងមាំជាមួយកូនៗរបស់ពួកគាត់ ចិញ្ចឹមបីបាច់សេចក្តីជំនឿរបស់ពួកគេ និងស្ថាបនាសាមគ្គីភាព ( សូមមើល « គំរូដ៏មានអានុភាពសម្រាប់ការធ្វើជាឪពុកម្តាយ » នៅលើ ទំព័រ ១០ ) ។
ព្រះវិញ្ញាណបរិសុទ្ធអាចដឹកនាំយើងទៅរកសេចក្ដីសង្ឃឹម និងជំនួយ ដែលយើងត្រូវការ ។ អែលឌើរ ហូសេ អេ តិក្សេរ៉ា នៃពួកចិតសិបនាក់បង្រៀនអំពីរបៀបដែលយើងអាចទទួលសេចក្តីណែនាំដ៏សន្ធឹកសន្ធាប់ថែមទៀតតាមរយៈព្រះវិញ្ញាណបរិសុទ្ធនៅក្នុង « ជ្រើសរើសដើម្បីមានគំនិតខាងវិញ្ញាណ » ( ទំព័រ ៤០ ) ។
ពួកយើងសង្ឃឹមថា ច្បាប់នេះជួយបងប្អូន និងគ្រួសាររបស់បងប្អូនឲ្យរកឃើញសេចក្តីសង្ឃឹម មានអារម្មណ៏នៃសេចក្តីស្រឡាញ់កាន់តែច្រើនឡើង ហើយដកពិសោធន៍នូវអំណរដ៏កាន់តែមហិមា ។
ដោយក្ដីស្មោះស្ម័គ្រ
ម៉ារីន ដេនស៍ បណ្ឌិតផ្នែកច្បាប់
អ្នកជំនាញផ្នែកគោលនយោបាយក្រុមគ្រួសារពិភពលោក និងកម្មវិធីអភិវឌ្ឍ