Pagkakuha sa Akong Pagtuo sa Hinay-hinay
Ang pagkakuha og pagpamatuod mogahin og panahon. Kasagaran magkinahanglan kini og gagmay nga mga kasinatian nga matigum.
Usa sa labing importante nga mga higayon sa akong kinabuhi nahitabo kanako sa edad nga 10 dihang migahin ko og duha ka semana sa pagkat-on sa doktrina sa Katoliko sa Loreto Roman Catholic Mission, mga 20 ka milya (32 km) ang gilay-on gikan sa akong panimalay sa Silobela, Zimbabwe. Nakahimo ako sa pag-ila ug pagmahal sa Manluluwas nga si Jesukristo ug sa pagsalig sa Ginoo pinaagi niining unang mga leksyon ug mga impresyon.
Samtang naa ko sa chapel sa Katoliko, nakakita ko og mga painting nga dunay mga eksena sa kinabuhi sa Manluluwas nga gipapilit sa bongbong: mga eksena sa pagkatawo ni Jesukristo, nagtudlo diha sa templo, nag-ampo sa Tanaman sa Getsemani, nagpas-an sa krus padulong sa Kalbaryo, gilansang sa krus sa Golgota, ug ang Iyang Pagkabanhaw. Nakapaguol gayud kanako nga makita kadto nga mga lansang ug mga tunok. Sa dihang miabut ko sa painting sa Paglansang sa Krus, milugmaw ang luha sa akong mga mata. Ug matag higayon mohilak ko ug moingon, “Oy, grabe gyud kaayo ang Iyang naagian, alang lamang kanako.”
Atol sa seremonya sa kumpirmasyon, usa sa mga pari mitan-aw sa akong mga mata ug miingon, “[Ikaw] mao ang kahayag sa kalibutan” (tan-awa sa Mateo 5:14). Dayon, nagtudlo sa nagsiga nga kandila, iyang gikutlo ang mga pulong sa Manluluwas, “Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16).
Samtang nagkadaghan ang akong nakat-unan mahitungod ni Jesus, misugod ko nga gustong makaserbisyo sa uban. Sama pananglit, kinahanglang sag-ubon namo ang among tubig lima ka milya (8 km) gikan sa among barangay. Kasagaran, ang mga babaye sa barangay, lakip sa akong inahan, maglukdo og 20 ka litro nga sudlanan nga puno sa tubig. Human sa akong kasinatian sa Katoliko nga seminary, kanunay ko nga magduso og 200 ka litro nga sudlanan sa tubig aron sa pagtabang sa akong inahan, ug mitabang usab ko sa laing duha ka biyuda kinsa among mga silingan. Nakahinumdom ko sa nindot nga pagbati nga akong bation sa matag higayon nga mitabang ko sa uban.
Kini nga mga kasinatian nakatabang sa pagpalambo sa akong pagtuo sa Langitnong Amahan ug ni Jesukristo ug miandam kanako sa dili direktang paagi sa pagdawat sa ebanghelyo ni Jesukristo sa dihang 22 anyos ko.
Pagdawat sa Basahon ni Mormon
Nagdako ko atol sa panahon sa kausaban sa akong nasud. Ang puti nga minoriya nga gipangulohan ni Ian Smith mipahayag og kagawasan gikan sa Britain niadtong 1965. Nakaaghat kana og silot gikan sa United Nations ug nakasugod sa daghang katuigan nga gubat sibil nga milungtad hangtud sa 1980, nga mitimaan sa pagkagawasnon sa Zimbabwe. Sa dihang nahuman na ko sa akong pag-eskwela, mibalhin ko ngadto sa usa ka siyudad aron manarbaho ug wala motambong og bisan unsa nga simbahan sulod sa daghang katuigan.
Usa ka adlaw nakigdula ko sa mga anak sa akong agalon, nuybe ug siyete anyos na ang ilang panuigon. Miingon sila, “Kahibalo ka, ang among amahan mao ang presidente sa branch sa among Simbahan.” Mipasabut sila unsa ang presidente sa branch ug, sa walay paghunahuna, miingon ko, “Dili makasulod sa langit ang inyong amahan.” Nakaamgo ko nga nakahimo ko og dakong sayop, ug naghunahuna ko pag-ayo unsay akong masulti nila aron makalimtan nila ang akong nasulti. Sa pagtapos sa adlaw, sa dihang nakita nila ang ilang amahan, midagan sila ngadto kaniya ug gisulti unsay akong nasulti. Abi nako og mawagtang ko sa akong trabaho.
Ang akong boss sa sayo pa mipakita kanako og jacket sa dihang didto pa siya sa militar nga nagpakita nga nakapatay siya. Mao nga akong nasulti ang unsay akong nasulti. Sa Kalma nga paagi, nangutana siya nako nganong nakasulti ko niadto. Miingon ko, “Boss, hinumdumi, misulti ka nako nga nakapatay ka sa gubat. Gisulti diha sa Biblia, ‘Dili ka magpatay.’”
Nangutana siya nako asa nga simbahan ko magtambongan. Giingnan nako siya nga magtambongan ko kaniadto sa Simbahang Katoliko apan wala na makasimba sulod sa pito ka tuig. Mipaambit siya og mga kasinatian diha sa Daang Tugon mahitungod sa mga gubat ug mga kagubot, ug dayon mihatag siya kanako og kopya sa Basahon ni Mormon. Nalipay kaayo ko nga wala ko mawad-i og trabaho.
Mihatag siya kanako og Basahon ni Mormon niadtong 1981, apan wala nako kini basaha o gani ablihi sulod sa duha ka tuig. Usa ka Dominggo gilaay ko sa dihang ang akong mga higala nangadto og laing lugar, mao nga akong gipunit ang basahon ug miadto sa duol nga estasyonan sa tren ug mibasa. Sa akong pagbasa nianang adlawa, nabati nako ang kadasig nga mobuhat og maayo, apan ang nakapatandog gayud kanako wala madugay sa akong pagbasa mao ang 3 Nephi 11. Nakabasa ko mahitungod sa mga Nephite kinsa misinati og gubat ug kasamok, ug dayon ang Manluluwas nga si Jesukristo mipakita kanila.
Ang akong nasud misinati sa among kaugalingong gubat sulod sa 15 ka tuig. Ang pipila sa mga tawo nga kadungan nako og tubo sa among barangay miadto sa gubat ug wala na makabalik. Ang uban mga baldado na sa tibuok kinabuhi.
Busa, samtang nagbasa mahitungod sa mga Nephite, gibati nako nga daw ang Manluluwas nga si Jesukristo namulong kanako sa dihang miingon Siya, “Tindog ug duol kamo ngari kanako, aron kamo … mobati sa mga agi sa lansang sa akong mga kamot ug sa mga tiil, nga kamo masayud nga ako mao ang Dios sa Israel, ug ang Dios sa tibuok yuta, ug gipatay tungod sa mga sala sa kalibutan” (3 Nephi 11:14).
Akong gibati nga daw personal siya nga namulong kanako, nag-imbitar kanako nga moduol Kaniya. Nakaamgo ko nga makahimo ako niini. Nakapausab kini sa tanan.
Pagkaangkon sa Akong Pagpamatuod
Mikabat og pipila ka bulan aron makaangkon og kaisug nga moadto sa simbahan. Nasayud ko kon asa ang simbahan, apan walay mga misyonaryo sa among gamay nga branch. Niadtong Pebrero 1984, misulod ko sa chapel sa Kwekwe. Gusto nakong mogawas og balik. Dili ko sigurado nga nalakip ko ug milingkod ko sa luyo, andam nga mobiya dayon. Human sa pangbukas nga tulumanon, ang presidente sa branch, si Mike Allen, mihatag sa iyang pagpamatuod mahitungod sa Manluluwas nga si Jesukristo ug sa Basahon ni Mormon. Mibati ko og koneksyon. Ang sunod nga tawo mihatag usab sa iyang pagpamatuod mahitungod sa Manluluwas ug sa Basahon ni Mormon, ug mao usab ang ikatulo nga tawo. Nalipay kaayo ko. Wala ko makakuha og kaisug nga moadto sa pulpito, mao nga mibarug ko diha sa akong nahimutangan ug miingon, “Gimahal nako si Jesus. Nagbasa ko sa Basahon ni Mormon.” Ug milingkod ko. Mao kadto ang sinugdanan sa akong pagpamatuod.
Kadto nga mga pagpamatuod mao ang paagi sa Ginoo sa pagtabang kanako tungod kay nakatabang kini kanako nga mobati nga nalakip didto. Gibati nako nga mga igsoon nako kini. Sa misunod nga mga adlaw nag-ampo ko alang kanila ug aron madawat. Nakahimamat ko didto og mga miyembro nga mabination kaayo ug kinsa mitabang kanako.
Daghan ang nahitabo nianang adlawa nga misulod ko sa chapel. Naghunahuna ko kon unsa kaha ang nahitabo kon wala mopaambit sa ilang mga pagpamatuod kadto nga mga miyembro. Wala kamo masayud kon adunay tawo nga nanglimbasug. Kon mobarug kamo ug mosulti sa unsay inyong gibati, tingali mao gayud kana ang gikinahanglang madungog sa usa ka tawo.
Ihatag ang inyong pagpamatuod kanunay. Kon inyong buhaton, inyong gilig-on ang inyong kaugalingon ug ang uban sa inyong palibut. Barugi ang unsay inyong nahibaloan. Samtang mosunod kamo sa tambag gikan sa Basahon ni Mormon, mas mapaduol kamo ngadto sa Manluluwas.
Magpaduol sa Manluluwas
Ang panahon nga akong gigahin sa Loreto Roman Catholic Mission mipahimutang kanako sa dalan padulong sa pagkahimong disipulo sa Manluluwas nga si Jesukristo. Sukad niadto akong nakat-unan nga ang pagkadisipulo usa ka proseso ug kinahanglan kitang mopadayon sa paglambo bisan pa sa atong mga kahuyang ug mga limitasyon. Kon modawat kita sa pagdapit nga: “Kamo kinahanglang magmahingpit, ingon nga hingpit ang inyong Amahan nga langitnon” (Mateo 5:48), mouswag kita padulong sa kinabuhing dayon “pagtulun-an ngadto sa lain nga pagtulun-an, lagda ngadto sa lain nga lagda” (tan-awa sa Doktrina ug mga Pakigsaad 98:12).
Nasayud kita nga ang kinabuhi dili kanunay nga sayon, ug makasinati kita og kalisdanan ug kasakit niana nga proseso, apan ang paghangad ngadto sa Ginoo mao lamang ang paagi sa pagkaplag og kalinaw diha sa atong kinabuhi.
Ang Pag-ula sa Manluluwas nga si Jesukristo mao ang tanan alang kanako. Nasayud ko nga ang Manluluwas nagtinguha sa pag-ugmad og relasyon kanato. Kinahanglan kitang mohangad, mosunod Kaniya, ug motabang sa pagbayaw sa uban samtang Siya motabang ug mobayaw kanato.
Akong nakat-unan nga ang pagkadisipulo usa ka proseso ug kinahanglan kitang mopadayon sa paglambo.
Mga paghulagway pinaagi ni Greg Newbold