Lig-una ang Inyong Pagtuo pinaagi sa Unang Panan-awon
Nag-ampo ko nga mosunod kamo sa sundanan ni Joseph sa pag-ampo, magkat-on sa mga kamatuoran nga iyang nakat-unan, ug molig-on sa inyong pagtuo sa Langitnong Amahan ug sa Iyang Anak, si Jesukristo.
Sa dihang 16 anyos pa ko, mibiyahe ko gikan sa akong panimalay sa Idaho ngadto sa usa ka komperensya sa East Coast sa Estados Unidos, nga gitambungan sa batan-ong mga lalaki ug mga babaye nga gikan sa tanang 50 ka estado ug dul-an sa 40 ka mga nasud. Sa wala pa kini, panagsa ra kaayo nga mabutang ko og sitwasyon diin ang akong mga gituohan ug mga kombiksyon nakapalahi kanako.
Usa ka gabii sa usa ka dili pormal nga panagpundok, mitumaw ang usa ka diskusyon mahitungod sa pipila ka mga tinuohan ug binuhatan sa Ang Simbahan ni Jesukristo sa mga Santos sa Ulahing mga Adlaw. Usa ka dakong grupo sa mga estudyante kalit nga mibaling sa ilang pagtagad kanako ug misugod sa pagpangutana, ang uban niini nanghinaway sa atong mga gituohan.
Nakalitan ako niini. Apan human ako makahunahuna sa makadiyot, misugod ko sa pagpaambit og pipila ka sukaranang mga baruganan. Akong gipasabut nga aduna kitay Langitnong Amahan, nga kita Iyang mga anak, ug nga kita anaa sa yuta aron makapalambo og pagtuo diha ni Jesukristo ug pamatud-an ang atong kaugalingon pinaagi sa pagpili sa maayo batok sa dautan.
Ang pagpaambit niini nga mga baruganan migiya kanako ngadto sa pagpamatuod ni Joseph Smith. Ang ubang mga estudyante wala mangutana mahitungod ni Joseph Smith, apan nakabantay ko sa akong kaugalingon nga mipasabut sa sinugdanan nganong mituo ko sa unsay akong gituohan. Sa dihang misulti ko mahitungod sa pagpakita sa Amahan ug sa Anak diha sa Sagradong Kakahoyan, kalit nga nahilom ang tanan. Usa ka kusog nga pagbati sa pagkabalaan misulod sa kwarto, ug usa ka dakong pagbati sa espirituhanong gahum midapat kanako ug sa akong mga pulong.
Pagkahuman, pipila ka mga estudyante mipasalamat kanako tungod sa akong lig-on nga kombiksyon. Ang uban mihangyo pa gani og dugang nga impormasyon mahitungod sa Simbahan. Sa akong pagpauli sa akong kwarto nianang gabhiona, nakaamgo ko nga ang tawo nga naapektohan pag-ayo niini nga kasinatian mao ako. Akong nabati sa akong kaugalingon ang gahum sa paghatag og pagpamatuod mahitungod sa Dios nga Amahan, ni Jesukristo, ug sa Unang Panan-awon.
Sukad niana nga kasinatian sobra sa 50 ka tuig na ang milabay, nakapamatuod ko og gatusan na ka mga higayon mahitungod sa Amahan, sa Anak, ug ni Propeta Joseph Smith. Niini nga mga kasinatian, kanunay nakong gibati ang nanghimatuod nga pagsaksi sa Espiritu Santo.
Gusto kong mopaambit og lima ka baruganan nga akong nakat-unan gikan sa akong espirituhanong pagsabut sa Unang Panan-awon. Kini nga mga baruganan nakapalig-on sa akong pagtuo ug sa akong tinguha sa pagsunod sa atong Langitnong Amahan ug sa Iyang Hinigugmang Anak. Manghinaut ko nga makalig-on usab kini ninyo.
1. Ang Amahan, ang Anak, ug ang Espiritu Santo Managlahi nga mga Binuhat
Sulod sa daghang mga siglo, ang relihiyusong mga eskolar ug mga philosopher nagdebate mahitungod sa kinaiyahan sa Dios nga Amahan, si Jesukristo, ug sa Espiritu Santo. Daghan ang nagtuo nga Sila usa ka binuhat. Tungod sa kasinatian ni Joseph sa Sagradong Kakahoyan 200 ka tuig na ang milabay, nasayud kita sa hingpit nga kamatuoran mahitungod sa kinaiyahan sa Dios.
Una sa tanan, Siya buhi! Ikaduha, ang Amahan ug Anak duha ka bulag, mahimayaon, nabanhaw nga mga binuhat, lahi sa usag usa. Wala madugay, si Joseph nakat-on nga “ang Espiritu Santo walay lawas nga unod ug mga bukog, apan usa ka personahe sa Espiritu. Kon dili tungod niini, ang Espiritu Santo dili makapuyo sulod kanato” (Doktrina ug mga Pakigsaad 130:22).
2. Kita mga Anak sa Dios
Pinaagi sa Unang Panan-awon ug ubang mga kasinatian, si Propeta Joseph Smith nakakat-on nga ang Dios dili usa ka layong gahum kinsa milalang sa kalibutan ug sa mga lumulupyo niini ug dayon gikalimtan kini. Sa pagkatinuod, ang matag usa kanato “hinigugmang anak nga babaye [o anak nga lalaki] sa langitnong mga ginikanan.”1
Ang pamahayag mahitungod sa pamilya nag-ingon: “Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios.”2 Ang atong Amahan klarong mideklarar niana nga padulngan: “Kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).
Ang atong tinuod nga pagkatawo nagagikan sa Dios, ug ania kita sa yuta aron mas mahisama Kaniya. Kini nga pagsabut gikan sa Unang Panan-awon mitugot kanako sa batan-on pa nga masayud nga ako adunay personal nga Langitnong Amahan kinsa nagmahal kanako ug gusto nga mobalik ako Kaniya.
3. Mahimo Kitang Mapasaylo sa Atong mga Sala
Usa sa dakong kabalaka ni Joseph mao ang mapasaylo sa iyang mga sala. Sa usa ka istorya sa Unang Panan-awon, ang Ginoo namulong ngadto sa batan-ong tigpangita sa kamatuoran niini nga mga pulong: “Joseph, akong anak, ang imong mga sala gipasaylo na. Lakaw, magalakaw kamo sa akong kabalaoran, ug pagabantayan ninyo ang akong mga sugo, ug pagabuhaton ninyo sila. Tan-awa, Ako mao ang Ginoong Dios sa himaya. Ako gilansang sa krus alang sa kalibutan, aron kadtong tanan nga motuo sa akong ngalan mahimo nga makaangkon og kinabuhing dayon.”3
Nakat-unan ni Joseph nga pinaagi sa Pag-ula ni Jesukristo, mahimo siya nga mapasaylo sa iyang mga sala ug mahimong limpyo ug putli sa atubangan sa Dios. Gihatagan siya og sigurado nga kahibalo nga gidala ni Jesukristo sa iyang Kaugalingon ang mga sala ug mga palas-anon sa tanan kinsa nakapuyo ug mopuyo pa dinhi sa yuta.
Gikan sa Unang Panan-awon, atong nakat-unan nga tungod sa grasya sa atong Manluluwas, si Jesukristo, kita usab mahimong mapasaylo sa atong mga sala ug usa ka adlaw mobarug nga limpyo atubangan sa Amahan.
4. Ang Atong Langitnong Amahan Maminaw ug Motubag sa Atong mga Pag-ampo
Sa kakahoyan nianang adlawa sa 1820, nakat-unan ni Joseph nga ang Langitnong Amahan maminaw ug motubag sa pag-ampo. Sa kaulahian, si Joseph miingon, “Ako adunay hingpit nga pagsalig nga makabaton og balaan nga pagpadayag, ingon sa ako nang nabuhat” (Joseph Smith—Kasaysayan 1:29). Ang iyang ehemplo nagtudlo kanato nga makaduol kita sa atong Langitnong Amahan diha sa pag-ampo aron makadawat og atong kaugalingong mga tubag.
Gibalik-balik ni Joseph kini nga sundanan sa pag-ampo sa daghang higayon. Aduna siyay pagsalig nga ang Ginoo maminaw ug motubag sa iyang mga pag-ampo. Nag-ampo siya mahitungod sa mga butang nga malagmit giampo usab ninyo.
Nag-ampo siya alang sa kaalam (tan-awa sa Joseph Smith—Kasaysayan 1:12–13).
Nag-ampo siya mahitungod sa bunyag (tan-awa sa Joseph Smith—Kasaysayan 1:68).
Nag-ampo siya alang sa kaluwasan (tan-awa sa Doktrina ug mga Pakigsaad 121:1–4).
Nag-ampo siya alang sa mga misyonaryo (tan-awa sa Doktrina ug mga Pakigsaad 109:22).
Nag-ampo siya alang sa Simbahan, sa mga miyembro niini, ug sa mga lider niini (tan-awa sa Doktrina ug mga Pakigsaad 109:71–76).
Ug nag-ampo siya alang sa iyang pamilya (tan-awa sa Doktrina ug mga Pakigsaad 109:68–69).
Usa kini ka sundanan alang kanato. Gipakita ni Joseph kanato nga makahimo kitang tanan sa pagduol sa atong Amahan diha sa pag-ampo.
5. Ang Amahan ug Anak Personal nga Nakaila Kanato
Gikan sa Unang Panan-awon, atong nakat-unan nga kini nga celestial nga mga Binuhat personal nga nakaila kanato, sama nga nakaila sila ni Joseph. Ang Amahan mitawag ni Joseph sa iyang ngalan ug, “nagtudlo ngadto sa lain,” miingon, “Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17).
Ang Amahan ug Anak nasayud sa mga panginahanglan, mga kabalaka, ug mga pangandoy ni Joseph, sama nga nasayud Sila sa atoa. Nasayud usab sila sa atong mga kalampusan ug mga kasub-anan.
Sa akong kabatan-on, daghan ako og giampo. Samtang naghinumdom ko karon, ang uban niadto nga mga butang daw dili ingon niana ka importante. Apan importante kini kanako kaniadto, ug nasabtan nako sa bata pa nga edad nga aduna akoy Amahan sa Langit kinsa naminaw kanako. Dili kanunay nga makadawat ko og diha-diha nga tubag, apan gibati nako nga sa Iyang kaugalingong panahon ug sa Iyang kaugalingong paagi motubag Siya sa akong pag-ampo sa paagi nga maayo alang kanako.
Pagbaton og pagsalig ug saligi nga ang Dios mamulong kaninyo. Tuo niana nga mga pagbati nga mosulod sa inyong kasingkasing. Mituo ako sa pag-ampo ug nakasabut sa gahum niini tungod kay nahibalo ko sa mga kasinatian ni Propeta Joseph Smith. Nasayud ko nga ang Dios nahibalo sa akong ngalan ug nga Siya motubag kanako, sama nga Siya nakaila sa inyong ngalan ug motubag kaninyo.
Pagpamatuod
Sa kadaghanan sa 68 ka tuig nga nagpuyo ko dinhi sa yuta, akong gisulayan ang sundanan ni Joseph sa pag-ampo. Sama sa tanang tinuod nga mga disipulo sa Manluluwas, nakadawat usab ako og mga tubag gikan sa langit. Nasayud ko nga si Jesus mao ang Kristo. Siya ang Anak sa Dios. Siya nabanhaw ug buhi karon. Siya adunay gahum sa pagpasaylo sa atong mga sala. Pinaagi sa atong pagtuo, pagkamasulundon, ug paghinulsol, makahimo Siya sa pagdala kanato nga luwas balik sa atong langitnong panimalay.
Isip usa ka Apostol ni Ginoong Jesukristo ug isip Iyang gi-orden nga saksi, mopamatuod ko uban sa pagkasigurado ug kombiksyon nga gikumpirmar sa Balaang Espiritu nga ang Amahan ug Anak mipakita kang Joseph Smith sa Sagrado nga Kakahoyan. Nag-ampo ko nga mosunod kamo sa sundanan ni Joseph sa pag-ampo, magkat-on sa mga kamatuoran nga iyang nakat-unan, ug molig-on sa inyong pagtuo sa Langitnong Amahan ug sa Iyang Anak, si Jesukristo.
Paghulagway pinaagi ni David Malan
Paghulagway pinaagi ni Kendall Ray Johnson