Aduna Silay Paglaum sa Pag-anhi ni Kristo—ug Makalaum Usab Kita
Ang mga propeta sa Basahon ni Mormon adunay paglaum nga si Kristo moanhi. Diha sa pagbasa sa ilang mga pulong, makaangkon kita nianang sama nga paglaum alang sa Iyang pag-anhi pag-usab.
ANG TALAN-AWON NI JORGE COCCO SANTÁNGELO
Unsa nga mga pulong ang mosulod sa hunahuna kon maghunahuna ka sa Basahon ni Mormon?
Mga Nephite, mga Lamanite, ubang -ite?
Gubat, kamingawan, kaalaot?
Paghinulsol, katubsanan, pagkamatarung?
Si Jesukristo?
Paglaum?
Ang Pasko sa Pagkabanhaw mao ang hingpit nga panahon sa pagpamalandong pag-usab sa mensahe sa Basahon ni Mormon. Labing importante, ang mensahe nga si Jesus mao ang Kristo, ang atong Manluluwas ug Manunubos. Tungod Kaniya, kita sa katapusan mahimong gawasnon gikan sa mga kasakit sa lawas ug kalag. Gikan sa kamatayon ug sala. Makabuntog kita sa matag dili maayo nga butang nga mahitabo kanato sa kalibutan.
Sa ato pa, makaangkon kita og paglaum.
Paglaum—tinuod nga paglaum, nakasentro kang Jesukristo—midasig sa karaang mga propeta sa pagtipig og mga rekord diha sa bulawang mga palid nga mahimong Basahon ni Mormon. Si Jacob misulti kanato, “Kay, alang niini nga katuyoan kami nakahimo sa pagsulat niini nga mga butang, nga sila unta masayud nga kami nasayud kang Kristo, ug kami adunay usa ka paglaum sa iyang himaya sa daghan nga gatusan ka mga tuig sa wala pa siya moanhi” (Jacob 4:4).
Gusto ni Jacob nga mahibaloan nato nga siya—ug ang ubang mga propeta nga nagtipig og rekord—nasayud sa pag-anhi ni Kristo. Daghang gatusan ka tuig sa wala pa Siya moanhi! Ug nadasig sila nga makaangkon niana nga paglaum gikan sa mga pulong sa mga propeta nga ilang nabasa. Si Jacob mipasabut, “ug dili lamang kay kami ang adunay paglaum sa iyang himaya, apan usab ang tanan nga balaan nga mga propeta nga una pa kanamo.
“Tan-awa, sila mituo kang Kristo ug nagsimba sa Amahan sa iyang ngalan, ug usab kami nagsimba sa Amahan sa iyang ngalan. …
“Busa, kami nangita sa mga propeta, ug kami adunay daghan nga mga pagpadayag ug sa espiritu sa pagpanagna; ug ingon nga aduna sa tanan niini nga mga saksi kami nakaangkon og usa ka paglaum, ug ang among hugot nga pagtuo nahimo nga dili matarug” (Jacob 4:4–6; tan-awa usab sa 1 Nephi 19:21; Jacob 7:11; Mosiah 3:13; Helaman 8:16).
Ang paglaum nga ilang naangkon gikan sa ilang kaugalingong mga kasinatian ug mga panagna samtang nagbasa sila sa mga kasulatan miandam kanila alang sa adlaw nga si Kristo moabut. Sa samang paagi, ang mga propeta karon nag-awhag kanato sa pagpangandam alang sa panahon nga si Kristo moanhi pag-usab. Kon gusto nato nga makaangkon nianang sama nga paglaum, kita usab kinahanglang “mangita sa mga propeta, ug [magtinguha nga] adunay daghan nga mga pagpadayag ug sa espiritu sa panagna.” Ang ilang mga pagpamatuod ni Jesukristo dili lang makapalig-on sa atong pagpamatuod apan makatabang usab kanato nga maandam alang sa Iyang pag-anhi.
Lehi
“Busa, unsa ka dako ang pagkamahinungdanon sa paghimo niini nga mga butang nga masayran ngadto sa mga lumulupyo sa yuta, aron sila masayud nga walay tawo nga makapuyo nga buhi atubangan sa Dios, gawas pinaagi sa mga maayo nga buhat, kalooy, ug grasya sa Balaang Mesiyas, kinsa mitugyan sa iyang kinabuhi sumala sa unod, ug gikuha pag-usab pinaagi sa gahum sa Espiritu, nga siya unta makapahinabo sa pagkabanhaw sa mga patay, ingon nga mao ang unang mabanhaw.”
Nephi
“Ug kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala.”
Haring Benjamin
“Ug siya pagatawgon og Jesukristo, ang Anak sa Dios. …
“Ug sud-onga, siya mianhi nganhi sa iyang kaugalingon nga mga katawhan, nga ang kaluwasan unta modangat ngadto sa mga katawhan gani pinaagi sa hugot nga pagtuo sa iyang ngalan; …
“Ug siya mabanhaw sa ikatulo nga adlaw gikan sa patay. …
“Kay tan-awa, ug usab ang iyang dugo giula sa mga sala niadto kinsa napukan pinaagi sa kalapasan ni Adan, kinsa namatay nga walay kasayuran sa kabubut-on sa Dios mahitungod kanila, o kinsa sa walay kasayuran nakasala.”
Alma
“Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.
“Ug siya modala diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang.”
Amulek
“Ug kana nga mahinungdanon ug katapusan nga sakripisyo mao ang Anak sa Dios, oo, walay kinutuban ug walay katapusan.
“Ug sa ingon siya modala sa kaluwasan ngadto sa tanan kinsa motuo diha sa iyang ngalan; kini ingon mao ang katuyoan sa katapusan nga sakripisyo, aron sa pagpagawas sa mga kasingkasing sa kalooy, diin mobuntog sa kaangayan, ug modala og mga kahigayunan ngadto sa mga tawo nga sila mahimo nga makabaton og hugot nga pagtuo ngadto sa paghinulsol.
“Ug sa ingon ang kalooy motagbaw sa mga gipangayo sa kaangayan, ug gakson sila diha sa mga bukton sa kaluwasan, samtang siya nga walay hugot nga pagtuo ngadto sa paghinulsol walay panalipod sa tibuok balaod nga gipangayo sa kaangayan; busa ngadto lamang kaniya nga adunay hugot nga pagtuo sa paghinulsol mapahinabo ang mahinungdanon ug walay katapusan nga laraw sa katubsanan.”
Gethsemane, by Jorge Cocco Santangelo
Samuel ang Lamanite
“Kay tan-awa, siya sa pagkamatuod mamatay nga ang kaluwasan moabut; oo, kini angay kaniya ug kinahanglan gayud nga siya mamatay, aron mopahinabo sa pagkabanhaw sa mga patay, nga sa ingon ang mga tawo mahimo nga dad-on sa atubangan sa Ginoo.
“Oo, tan-awa, kini nga kamatayon magpahinabo sa pagkabanhaw, ug magtubos sa tanan nga mga katawhan gikan sa unang kamatayon—nga espirituhanon nga kamatayon; sa tanan nga mga katawhan, pinaagi sa pagkapukan ni Adan nga nahimulag gikan sa atubangan sa Ginoo, giila nga patay, ngadto sa mga butang nga temporal ug sa mga butang nga espirituhanon.
“Apan tan-awa, ang pagkabanhaw ni Kristo motubos sa katawhan, oo, gani sa tanan nga mga katawhan, ug modala kanila balik sa atubangan sa Ginoo.”
Blessing the Children, by Jorge Cocco Santangelo
Mormon
“Hibaloi ninyo nga kamo kinahanglan makaangkon og kasayuran sa inyong mga amahan, ug maghinulsol sa tanan ninyong mga sala ug mga kadautan, ug motuo diha kang Jesukristo, nga siya mao ang Anak sa Dios, ug nga siya gipatay pinaagi sa mga Judeo, ug pinaagi sa gahum sa Amahan siya nabuhi pag-usab, diin siya nakaangkon og kadaugan sa lubnganan; ug usab diha kaniya ang kahapdos sa kamatayon nabuntog.
“Ug siya mipahinabo sa pagkabanhaw sa mga patay, diin ang tawo mabanhaw aron mobarug sa atubangan sa iyang hukmanan.
“Ug siya mipahinabo sa katubsanan sa kalibutan, tungod niini siya nga hikaplagan nga walay kasaypanan sa iyang atubangan sa adlaw sa paghukom kini ihatag ngadto kaniya sa pagpuyo sa atubangan sa Dios didto sa iyang gingharian, aron pag-awit sa walay hunong nga mga pagdayeg uban sa koro sa kahitas-an, ngadto sa Amahan, ug ngadto sa Anak, ug ngadto sa Espiritu Santo, nga usa ka Dios, diha sa usa ka kahimtang sa kalipay nga walay katapusan.”