Sa Digital Lamang: Mga Young Adult
Ang Paggamit sa Kompleto nga Ngalan sa Simbahan Kiwaw apan May Bili Kini
Ang pagsunod sa instruksyon sa propeta ingon og yano, apan nagkinahanglan diay kini og dugang nga paningkamot kaysa akong gilauman.
Sa dihang si Presidente Nelson namulong mahitungod sa paggamit sa saktong ngalan sa Simbahan niadtong Oktubre 2018 nga kinatibuk-ang komperensya, ang iyang mensahe tin-aw kaayo ngari kanako: “Kini mao ang sugo sa Ginoo. …
“… Ang pagtangtang sa ngalan sa Ginoo gikan sa Simbahan sa Ginoo usa ka dakong kadaugan ni Satanas” (“Ang Eksakto nga Ngalan sa Simbahan,” Liahona, Nob. 2018, 87, 88).
Akong naamguhan nga kinahanglan kong maghunahuna og usab kon giunsa nako pagpakig-istorya niadtong naglibut kanako, lakip sa pihong mga kliyente sa akong trabahoan kinsa naanad na sa pagtawag nako nga usa ka “Mormon” ug usa ka miyembro sa “Mormon nga Simbahan.”
Mapasaligon sa paggamit sa kompleto nga ngalan sa Simbahan, naghulat ko sa sunod nga oportunidad sa pag-angkon sa akong pagkamiyembro sa Ang Simbahan ni Jesukristo sa mga Santos sa Ulahing mga Adlaw. Tuod man, kana nga oportunidad miabut, pag-usab sa usa ka konteksto sa negosyo. “Kamong mga Mormon mga mabination kaayo nga mga tawo,” usa ka potensyal nga kliyente miingon kanako. “Nan, salamat,” mitubag ko. “Isip mga miyembro sa Ang Simbahan ni Jesukirsto sa mga Santos sa Ulahing mga Adlaw, kami nagtuo nga kitang tanan managsoon.” Dayon nagpadayon ang pag-istoryahanay diin siya ug ang tanan naghisgot sa pagkamabination sa mga “Mormon.”
Bisan kon nakahimo ko sa akong bahin sa pagsulti sa kompleto nga ngalan sa Simbahan, gibati gihapon nako nga dunay usa ka butang nga dili eksakto. Ang akong mga higala ug kaubanan nagkonsiderar gihapon nako nga kabahin sa “Mormon nga Simbahan” ug dili isip usa ka sumusunod ni Kristo, labaw na nga dili isip usa ka miyembro sa gipahiuli nga Simbahan ni Kristo.
Angayan ba Kini sa Tanang mga Kahasol?
Sulod sa sunod na pipila ka inter-aksyon mahitungod sa akong pagtuo, akong nakaplagan ang akong kaugalingon nga nawad-an og kadasig tungod sa pagkabakikaw sa pagsulti sa kompleto, taas nga ngalan sa simbahan sa makadaghang higayon diha sa samang pag-istoryahanay . Daw ang tanan nga gikaistorya nako ingon og lain og tinan-awan nako. Ug ang pag-istoryahanay sa gihapon kanunay nga nakatutok sa mga “Mormon.”
Naningkamot ko nga ang akong pakig-inter-aksyon kanila ingon og mas natural lang. Apan nahimo kining mas lisud kaysa akong gidahum, ilabi na sa mga tawo nga dili ko gusto nga masilo. Dili ko gustong maulaw o basta lang kontento sa akong pagsunod sa akong pagtuo, apan usab dili ko gusto nga magpakagahi, kay daghan niining mga tawhana nagtawag na nako og “Mormon” sa una pa, nga ako rang gidawat. Nakadungog usab ko og daghang mga miyembro sa Simbahan nga nagtawag gihapon sa ilang mga kaugalingon ug sa ubang mga miyembro sa Simbahan nga “mga Mormon” sa nagkalain-laing mga miting ug uban pang sitwasyon.
Akong nakita ang akong kaugalingon nga nangutana kon ang paggamit sa kompleto nga ngalan sa Simbahan tinuoray ba nga ingon ana kaimportante kon ikonsiderar ang tanan. Ang “Mormon” nga ngalan, hinuon, may pagkapositibo sa mga hunahuna sa mga tawo—ang pagka “Mormon” sa kasagaran nahimong pabor ngari kanako. Apan diha sa pagbasa og usab sa pakigpulong ni Presidente Nelson, misantop sa akong hunahuna nga importante gayud kini, bisan kon kini naghatag kakiwaw sa pag-istoryahanay. Busa ako misaad og usab sa akong kaugalingon.
Usa ka Kahigayunan sa Pagpamatuod kang Kristo
Ang sunod nga higayon nga ako migamit sa tibuok nga ngalan sa Simbahan, mao kadtong mibisita ko sa usa ka higala sa simbahan sa laing tinuohan. Usa ka tawo miduol nako ug uban sa usa ka dakong pahiyum nangutana kon ako usa ba ka Mormon. “Usa ko ka miyembro sa Ang Simbahan ni Jesukristo sa mga Santos sa Ulahing mga Adlaw, oo,” miingon ko. Siya misugod sa pagpangutana nako og pipila ka mga pangutana, matag usa niini nagsugod sa: “Ang Simbahan sa Mormon nagtuo ba … ?” Ug sa matag higayon, misugod ko sa akong tubag sa mga pulong: “Diha sa gipahiuli nga Simbahan ni Kristo, kami nagtuo …”
Kining pag-inistoryahanay nagpadayon sa upat o lima ka higayon. Dihang nakamatikod siya nga dili ko modawat sa titulo nga “Mormon,” nangutana siya nako sa direkta, “Di ba Mormon ka?”
Mao nga nangutana ko niya kon nasayud ba siya kinsa si Mormon—wala siya masayud. Giingnan nako siya nga si Mormon usa ka propeta, usa ka tigsaysay, usa ka heneral sa militar, ug usa ka politiko sa karaang Amerika. Akong dungog nga napasuod sa usa ka tawo kinsa mapahinungoron kaayo sa pagserbisyo sa Dios ug sa uban.
“Apan,” mipadayon ko, “si Mormon wala magpakamatay alang sa akong mga sala. Si Mormon wala mopaagas sa iyang dugo alang kanako o nag-antus sa Getsemani o namatay sa krus. Si Mormon dili ang akong Dios. Si Jesukristo mao ang akong Dios ug ang akong Manluluwas. Siya ang akong Manunubos. Ug kini pinaagi sa Iyang ngalan nga gusto ko nga mailhan sa katapusan nga adlaw, ug kini pinaagi sa Iyang ngalan nga naglaum ko nga mailhan ko karon.”
Akong gibati ang kasiguroan sa Espiritu nga nagsuporta nako niining mubo nga pagpamatuod ngadto sa akong bag-ong kaila. Human sa pipila ka segundo sa kahilum, miingon siya, “Nan, Kristiyano diay ka?”
“Oo, usa ko ka Kristiyano,” mitubag ko, “ug usa ka sakop sa gipahiuli nga Simbahan ni Kristo.”
Ang pagtinguha sa pagsunod sa instruksyon sa propeta ingon og yano, apan sa pagkatinuod nagkinahanglan kini og dugang nga paningkamot kaysa akong gilauman. Ako sa gihapon dili pa hingpit sa pagsunod sa tanan nga gihangyo nga akong buhaton. Apan sa matag sitwasyon, ako na karong sigurohon ang paggamit sa kompleto nga ngalan sa Simbahan.
Mapasalamaton ko sa Espiritu nga akong gibati dihang ako nakapamatuod ngadto sa uban mahitungod sa akong Manluluwas ug sa akong pagkamiyembro sa Iyang Simbahan. Ug karon ako adunay talagsaong paagi sa paghatag og natural nga pagpamatuod bahin Kaniya ug sa Iyang gipahiuli nga Simbahan sa bisan unsang higayon nga pangutan-on ko mahitungod sa akong pagka “Mormon.”