Panalangin Lamang ang Akong Mahatag
Jonathan Mafra Sena de Santana
Santa Catarina, Brazil
Paghulagway pinaagi ni Allen Garns
Nahuman ko sa abogasiya sa panahon sa unang birthday sa akong anak nga babaye. Ang akong asawa ug ako mahinamon nga mosaulog sa akong gradwasyon, sa birthday sa among anak, ug sa bag-ong mga oportunidad nga moabut kanamo, apan walay nahitabo sumala sa plano.
Wala koy trabaho human nako makompleto ang akong degree ug naglisud sa pagpangita og trabaho. Wala madugay, miabut ang pinansyal nga kalisud. Bisan ang pagpahigayon og yano nga selebrasyon sa birthday mahimong lisud.
Human sa daghang pag-istoryahanay uban sa akong asawa, among gidawat ang among sitwasyon. Dili kadto sayon alang kanako isip amahan nga dili makahimo sa pagpalit og bisan usa ka simpleng regalo alang sa akong anak ug makita ang akong asawa nga mibati og kasagmuyo.
Wala ko makasabut sa nahitabo. Nag-ampo ko ug nangamuyo sa Langitnong Amahan sa pagtabang kanako nga makasabut unsay Iyang gipaabut nako. Sa kalit, nga morag adunay tingog nga namulong sa akong hunahuna, akong nadungog ang mosunod nga mga pulong: “Ikaw adunay gihuptan nga mas bililhon pa kay sa bisan unsang materyal nga bahandi dinhi sa yuta. Naghupot ka sa pagkapari. Unsa may mas maayo pa nga gasa nga mahimo nimong mahatag sa imong anak kay sa usa ka panalangin sa pagkapari?”
Nakahilak ko samtang naghunahuna ko kon unsay kahulugan sa pagkapari ngari nako. Ang akong kasingkasing napuno sa pasalamat sa dihang akong gihunahuna nga ang pagkapari mao ang gahum nga makahiusa sa akong pamilya alang sa tanang kahangturan.
Akong gipaambit ang akong mga pagbati ngadto sa akong asawa. Giingnan nako siya nga ang paghatag og panalangin sa among anak mao lamang ang akong mahatag. Nakahukom mi nga makahatag kini og kalipay ug kalinaw ngadto kaniya, ug kana igo na.
Sa adlaw sa birthday sa among anak, ang mga higala, mga paryente, ug mga silingan midala og cake ug yano nga mga dekorasyon. Mapasalamaton kami nga magsaulog niining espesyal nga adlaw uban niadtong among gimahal. Nianang gabhiona, akong gipatong ang akong mga kamot sa ulo sa akong anak ug mihatag kaniya og panalangin. Ako siyang gipanalanginan sa tanan nga giaghat sa Espiritu sa Ginoo nga akong isulti.
Nagsinati gihapon kami og panahon sa mga kausaban ug mga hagit kalabut sa pagkawalay trabaho ug panalapi. Apan bisan diha sa kasubo ug kasagmuyo, ang kalinaw ug kahupayan miabut kanamo pinaagi sa atong Manluluwas, si Jesukristo. Wala akoy pagduha-duha nga ang pagkahimong miyembro sa Ang Simbahan ni Jesukristo sa mga Santos sa Ulahing mga Adlaw nga makagamit sa gahum sa pagkapari usa ka panalangin. Mao lamang kadto ang akong mahatag sa birthday sa akong anak, ug sobra na kini.