Usa ka Taxi, usa ka Estudyante, ug usa ka Tubag sa Pag-ampo
Ang tagsulat nagpuyo sa Rivers State, Nigeria.
Duna kami pag-aghat nga makit-an namo siya, busa nganong wala man kini mahitabo?
Usa ka adlaw ang akong misyonaryo nga kompanyon ug ako gihatagan og referral sa pagtudlo og tawo kinsa nagpuyo sa usa ka barangay nga gitawag og Tema, duol sa matahum nga siyudad sa Accra, Ghana. Ang numero sa mga balay niana nga barangay dili kaayo tukma, mao nga gihatagan kami og sinulat nga deskripsyon sa pagtabang namo sa pagpangita sa balay.
Sa dihang miabut mi sa barangay, gisunod namo ang direksyon apan dili namo makit-an ang tawo tungod kay daw daghan ang mga balay nga mohaum sa samang deskripsyon. Naglibug, nakahukom mi nga manuktok sa mga pultahan sa kasilinganan aron mangutana, apan daw walay usa nga nakaila sa tawo nga among gipangita. Aduna koy pag-aghat nga mangayo og tabang sa Langitnong Amahan.
Human sa among pag-ampo, akong gibati nga among makit-an ang tawo nga among gipangita, mao nga gipangusgan namo ang among paningkamot. Bisan pa, wala namo siya makit-i. Gikapoy mi ug nakahukom nga mobalik sa among proselyting area tungod kay kami duna pay laing mga appointment. Sa pag-abut namo sa parkinganan sa taxi, ang drayber sa taxi nga midala kanamo sa barangay nakakita sa among nasagmuyo nga mga nawong ug nangutana kon nakit-an ba namo ang among gipangita. Ang among tubag, siyempre, wala.
Misugyot siya nga manulod kami sa usa ka eskwelahan nga anaa sa eskina ug mangutana didto. Gisultihan namo siya nga dili kana ang deskripsyon nga gihatag kanamo, apan miinsister siya. Nanggawas mi sa taxi ug miadto sa eskwelahan—dili tungod kay nagtuo mi nga makit-an namo didto, apan aron lang malipay ang among higala nga nabalaka.
Sa pagsugod namo og lakaw padulong sa administrasyon nga gambalay sa eskwelahan, usa ka gamay nga batang lalaki midagan padulong sa among direksyon. Mipahiyom siya ug miingon nga siya ug ang iyang igsoong lalaki mao lang ang mga miyembro sa Ang Simbahan ni Jesukristo sa mga Santos sa Ulahing mga Adlaw nga nagpuyo niini nga dapit ug nga makatabang siya namo.
Ang akong kompanyon ug ako nagtinan-away nga dili makatuo. Usa kadto ka milagro. Ang bata mitabang namo nga makit-an ang tawo nga among gipangita, ug sa katapusan midawat siya sa ebanghelyo ug nabunyagan.
Kini nga kasinatian mitudlo kanako nga ang Langitnong Amahan motubag sa mga pag-ampo sa Iyang kaugalingong panahon ug sa Iyang kaugalingong paagi. Kon dili kita dayon makakuha og mga tubag sa atong mga pag-ampo, mahimo kitang mopakita og hugot nga pagtuo Kaniya ug magkat-on sa pagpailub.
Paghulagway pinaagi ni Corey Egbert