Upat ka Imahe gikan sa Semana sa Pasko sa Pagkabanhaw
“Ang Akong Pagkahari Dili Iya Niining Kalibutana” (Juan 18:36).
Korona nga mga Tunok
Tan-awa sa Mateo 27:29; Marcos 15:17; Juan 19:2.
Ang mga sundalo nga Romano mibutang og korona nga mga tunok sa Manluluwas. “Tingali kining bangis nga buhat maoy usa ka hiwi nga pagsulay nga sundugon ang pagpahimutang og pang-emperador nga laurel diha sa Iyang ulo. … Sakit kaayo kining bation, tungod kay ang mga tunok nagpasabut sa kasuko sa Dios samtang gitunglo Niya ang yuta alang ni Adan nga sugod niana mopagawas kini og mga tunok. Apan pinaagi sa pagsul-ob sa korona, giusab ni Jesus ang mga tunok isip simbolo sa Iyang himaya” (Presidente James E. Faust, Abr. 1991 nga kinatibuk-ang komperensya).
Kupo nga Mapula
Tan-awa sa Mateo 27:28; Marcos 15:17; Juan 19:2.
Ang mapula harianon nga kolor, ug ang mga sundalo mabiaybiayong misul-ob niini nga kupo diha ni Jesukristo tungod kay miangkon Siya nga mao ang hari sa mga Judeo. Siyempre, sa reyalidad Siya mas labaw pa niana—Siya ang “Hari sa kaharian, ug Ginoo sa kaginoohan” (1 Timoteo 6:15; Pinadayag 19:16).
“Dugo manggawas gikan sa matag lungag sa iyang mga panit, hilabihan ka dako sa iyang kasubo” (Mosiah 3:7).
Pugaanan sa Oliba
Tan-awa sa Mateo 26:36; Marcos 14:32; Lucas 22:39–40; Juan 18:1.
“Simbolikanhon kaayo nga ang ‘dugo [migawas] gikan sa matag lungag sa panit’ [Mosiah 3:7] samtang nag-antus si Jesus sa Getsemani, sa dapit sa pugaanan sa oliba. Aron makahimo og lana niadtong panahon sa Manluluwas, ang mga oliba unahon og dugmok nga paligiran kini og dakong bato. Ang mga ‘kupog’ ibutang sa humok, dili kaayo hugot nga pagkalala nga mga basket nga ipatong-patong. Ang gibug-aton niini maoy makapagula sa una ug pinakanindot nga lana. Dayon dugangan ang pagpuga pinaagi sa pagbutang og dakong tuod o kahoy sa ibabaw sa gipatong-patong nga mga basket, aron makapagula og daghan pa nga lana. Sa katapusan, aron makuha ang pinakatapusang mga tulu, ang tuod pabug-atan pa gyud og mga bato sa isig ka tumoy aron mahimo ang kinabug-atang dat-og. Ug oo, ang lana sama og dugo sa unang pag-agas niini” (Elder D. Todd Christofferson, Okt. 2016 nga kinatibuk-ang komperensya).
“Wala Siya dinhi, kondili nabanhaw” (Lucas 24:6).
Walay Sulod nga Lubnganan
Tan-awa sa Mateo 28:1–8; Juan 20:1–18.
“Ang walay sulod nga lubnganan nianang unang buntag sa Pasko sa Pagkabanhaw mao ang tubag sa pangutana ni Job, ‘Kon ang tawo mamatay, mabuhi ba siya pag-usab?’ [Job 14:14]. Sa tanan nga makadungog sa akong tingog, akong ipahayag, Kon ang tawo mamatay, mabuhi siya pag-usab. Kita nasayud, kay kita adunay kahayag sa gipadayag nga kamatuoran” (Presidente Thomas S. Monson, “Siya Nabanhaw!” Abr. 2010 nga kinatibuk-ang komperensya).
Paghulagway sa korona nga mga tunok pinaagi ni Dilleen Marsh
Si Kristo ug si Pilato, ni Marcus Vincent, sa maayong kabubut-on sa Church History Museum
Litrato sa pugaanan sa oliba gikan sa Getty Images