Usa ka Simbahan alang ni Zulma
Tingali aduna pay daghan nga gusto sa Dios nga mahibaloan ni Zulma.
“Pangita, ug kamo makakaplag” (3 Nephi 14:7).
Si Zulma naglingkod sa usa sa mga lingkuranan sa simbahan ug mihapyod sa iyang uniporme sa eskwelahan. Ang de-kolor nga kahayag midan-ag agi sa stained glass nga bintana, ug adunay krus nga nagbarug sa atubangan sa chapel. Si Zulma nag-eskwela og eskwelahan sa simbahan, busa motambong siya sa mga tulumanon sa pagsimba kaduha sa usa ka adlaw kuyog sa ubang estudyante. Ganahan si Zulma sa iyang simbahan. Gimahal niya si Jesus ug ganahan nga makat-on mahitungod Kaniya.
Hilum siya nga milingkod samtang ang pari misugod sa pagsulti. Apan karon lahi ang iyang gibati. Sa kalit usa ka bag-ong hunahuna ang misulod sa iyang pangisip ug kasingkasing: Aduna pay dugang nga kamatuoran nga makuha sa kalibutan.
Nag-abut ang mga kilay ni Zulma. Dugang nga kamatuoran? Unsay gipasabut niana?
Nakahunahuna na usab siya niini. Adunay dugang nga kamatuoran.
Gipiyong ni Zulma ang iyang mga mata ug gihunahuna pag-ayo ang iyang gibati. Daghan siya og nakat-unan nga maayo sa simbahan. Apan karon naghunahuna siya kon duna pa bay kulang. Tingali aduna pay daghan nga gusto sa Dios nga mahibaloan niya. Pero unsaon man niya sa pagkakaplag niini?
Wala madugay nakig-istorya siya sa iyang magulang nga lalaki, si Alberto, mahitungod sa iyang mga hunahuna.
“Naghunahuna ka nga aduna pay dugang nga kamatuoran nga makuha sa kalibutan?” Nangutana si Alberto.
Mitando si Zulma. “Gusto ko nga makat-on sa ubang mga simbahan,” miingon siya.
“OK,” mitubag si Alberto. “Mokuyog ko nimo!”
Sulod sa pipila ka mga tuig, si Zulma ug Alberto mibisita og lain-laing simbahan. Human sa usa ka tulumanon sa simbahan, si Alberto miingon, “Maayo ang gipangtudlo niana nga simbahan.”
Miuyon si Zulma, apan gibati gihapon nila nga daw adunay kulang, mao nga mipadayon sila sa pagpangita.
Usa ka adlaw si Alberto nagdali sa pagsaka sa ilang balay. “Akong nakit-an ang simbahan nga atong gipangita!” Miingon si Alberto. Gigakos niya si Zulma.
Misiga ang mga mata ni Zulma. “Asa? Giunsa man?”
“Ang akong higala nakahimamat og pipila ka misyonaryo gikan sa Ang Simbahan ni Jesukristo sa mga Santos sa Ulahing mga Adlaw,” miingon si Alberto. “Naminaw ko nila, ug mituo ko sa ilang gitudlo!”
Nalipay pag-ayo si Zulma ug Alberto nga nagsayaw-sayaw sila libut sa balay. Apan nakadawat dayon si Zulma og dili maayong balita. Dili gusto ni Mamá nga makigkita siya sa mga misyonaryo. “12 pa lang ka,” miingon si Mamá. “Bata pa kaayo ka.”
Tungod kay mas magulang si Alberto, gitugutan siya nga padayong makigkita sa mga misyonaryo. Paglabay sa pipila ka semana, gibunyagan siya.
Si Zulma nagsige og hangyo ni Mamá kon mahimo ba siya nga makakat-on gikan sa mga misyonaryo. Sa katapusan, misugot si Mamá.
Sa dihang ang mga misyonaryo mitudlo ni Zulma, mibati siya og kainit sa iyang kasingkasing. Usa sa mga misyonaryo naglisud sa pagsulti og Kinatsila, apan dili kini importante. Ang importante nga maayo kaayo ang gibati ni Zulma. Sa dihang nakakat-on siya mahitungod ni Joseph Smith ug sa Basahon ni Mormon, nasayud siya nga iyang nakaplagan ang kamatuoran nga iyang gipangita!
Gusto ni Zulma nga magpabunyag. Apan unsa kaha ang isulti ni Mamá? Malipayon kaayo si Zulma sa dihang misugot si Mamá! Sa adlaw sa iyang bunyag, si Zulma nagsinina og lubos puti. Nasayud siya nga ang Dios nagmahal kaniya. Nasayud siya nga nakaila Siya kaniya. Ug nasayud siya nga mitabang Siya kaniya nga makakaplag sa Iyang gipahiuli nga Simbahan! ●
Mao kini si Zulma sa dihang gamay pa siya. Sa tuo mao ang usa ka litrato niya karon uban sa iyang bana, si Elder Walter F. González sa Seventy.
Mga paghulagway pinaagi ni Scott Wakefield