Mas Bililhon Kay Sa Pilak nga Pulseras
Sylvie Houmeau
Quebec, Canada
Paghulagway pinaagi ni Emily Lui
Sa dihang gihangyo ko nga pangulohan ang diskusyon sa Relief Society mahitungod sa pagdapit sa Manluluwas sa pagpakaon sa Iyang karnero, nakahukom ko nga kon gusto nakong dasigon ang mga sister, kinahanglang duna koy buhaton alang sa usa sa Iyang mga karnero.
Nagtigum ko og kaisug ug gidapit ang usa ka dili kaayo aktibo nga sister nga motambong sa usa ka kalihokan sa Relief Society uban nako. Iyang gidawat ang akong imbitasyon ug pareho kaming nalingaw. Gibati nako nga maayo kini nga ehemplo, ug naghinam-hinam ko nga ipaambit ang akong kasinatian. Apan ang Ginoo aduna pay daghan nga itudlo kanako.
Usa ka buntag samtang nag-ilis ko, nakabantay ko nga nawala ang akong pilak nga pulseras. Kini nga pulseras gihatag kanako isip regalo sa birthday samtang mibisita ko sa France, busa kini adunay espesyal nga kahulugan kanako. Misugod ko sa pagpangita niini sa kasagarang mga dapit, apan wala nako kini makit-i. Nakaingon ko sa akong kaugalingon nga kon mag-ampo lang ko, mas paspas nakong makit-an ang akong pulseras.
Human ko mag-ampo, gipangita nako bisan asa. Sulod sa duha ka adlaw nag-ampo ko pag-ayo ug nagsiksik sa hilabihan. Nangamuyo ko sa Langitnong Amahan nga tabangan ko sa pagpangita niini, apan wala gihapon nako makit-i. Hilabihan ang akong kaguol tungod kay kini nga pulseras bililhon kanako.
Usa ka gabii ang akong anak nga lalaki miuban kanako sa pag-ampo diha sa akong higdaanan. Human sa among pag-ampo, aduna siyay gipunit ug gihatag kini kanako. Ang ako kadtong pulseras! Iya kining nakit-an ilawom sa higdaanan. Wala lang gayud nako kini makit-i sa akong pagpangita. Nakahilak ko sa kalipay nga nahibalik kini kanako.
Sa kalit lang, adunay impresyon nga miabut kanako: “Sama ba kamatinguhaon ang imong pag-ampo alang sa imong mga sister sa Simbahan? Sama ba sila ka bililhon sa imong pulseras nganha kanimo? Kumusta man ang imong mga sister gawas sa Simbahan? Nag-ampo ba usab ikaw alang kanila?”
Sa dihang gipaambit nako ang akong kasinatian sa akong nawala nga pulseras diha sa Relief Society, nindot kaayo ang among diskusyon. Gisultihan nako ang mga sister nga akong nakat-unan nga kon ang Manluluwas mosugo kanato sa pagpakaon sa Iyang karnero, kinahanglang hinumduman nato nga “ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10). Gusto Niya nga magmanggihunahunaon kita niadtong naglibut kanato ug magmahal, moamuma, ug mag-ampo uban sa tanan natong kusog alang kanila. Samtang ato kining buhaton, atong mahibaloan nga ang tanan labi pa ka bililhon kay sa usa ka pilak nga pulseras.