Dali, Sunod Kanako: Basahon ni Mormon
Unsay Kahulugan sa Pasko sa Pagkabanhaw ngari Kanako?
Marso 30–Abril 12 Pasko sa Pagkabanhaw
Sa Pasko sa Pagkabanhaw, atong gisaulog ang “labing importante nga panghitabo sa kasaysayan sa”1—ang Pagkabanhaw sa atong Manluluwas nga si Jesukristo. Kini nga panghitabo mahinungdanon sa plano sa Langitnong Amahan sa kalipay.
Sa premortal nga kinabuhi, si Jesukristo gipili nga mahimo natong Manluluwas. Misaad Siya nga mohatag sa paagi aron kita mapasaylo sa atong mga sala ug makabalik sa atong langitnong panimalay.
Nianang buntag sa unang Pasko sa Pagkabanhaw, si Jesus mituman sa Iyang saad. Gibuntog Niya ang kamatayon. Isip resulta, “Siya mao ang kahayag ug ang kinabuhi sa kalibutan; oo, usa ka kahayag nga walay katapusan, nga dili gayud mahimo nga mongitngit; oo, ug usab usa ka kinabuhi nga walay katapusan, nga wala na ang kamatayon” (Mosiah 16:9).
Unsa nga mga panalangin ang gidala sa Pagkabanhaw nganha kanimo?
Paghinulsol
Si Jesukristo nangutana sa matag usa kanato, “Dili ba kamo mobalik ngari kanako, ug maghinulsol sa inyong mga sala, ug makabig, nga aron unta Ako moayo kaninyo?” Siya misaad, “Kinsa kadto nga moduol Ako modawat kaniya” (3 Nephi 9:13–14). Unsa ang imong bation kon ikaw maghinulsol?
Pagkabanhaw
Ang kamatayon dili kapugngan, apan ang kadaugan sa Manluluwas batok sa kamatayon nagsiguro nga ang tanan mabanhaw—ang lawas ug espiritu mahiusa pag-usab sa hingpit nga porma (tan-awa sa Alma 11:43). Sa unsang paagi nga ang kahibalo sa Pagkabanhaw makahatag kanimo og paglaum?
Kinabuhing Dayon
Ang Pag-ula sa Manluluwas nakahimong posible sa kinabuhing dayon, o kahimayaan. Aron madawat kini nga panalangin, kinahanglan gayud nga motuman kita sa mga sugo. Si Presidente Russell M. Nelson mitawag sa dalan padulong sa kinabuhing dayon nga “ang dalan sa pakigsaad.”2 Unsay kinahanglan natong buhaton aron makasunod niining dalan padulong sa kinabuhing dayon?