Sa Digital Lamang: Mga Young Adult
Pagtukod sa Gingharian Didto sa New Caledonia
Mga young adult sa New Caledonia ug sa tibuok kalibutan nagsanong sa tawag sa pagserbisyo ug sa pagkahimong mga lider sa Simbahan.
“Ang kahigayunan sa pagserbisyo maoy usa sa dagkong mga panalangin sa pagkamiyembro sa Simbahan.”1 Isip usa ka young adult, ang pagserbisyo sa Simbahan mahimo nga usa ka makahinam nga oportunidad sa pagtubo, pagpangulo, ug paglig-on sa espirituhanon ninyong kaugalingon. Apan sa tanang uban pa nga mga responsibilidad nga moabut sa usa ka hamtong nga batan-on, ang pagserbisyo usahay mahimong mahagiton—ilabi na sa mga dapit diin ang Simbahan adunay gamay pa kaayong presensya. Sama pananglit, unsay inyong buhaton kon tawagon mo nga mahimong presidente sa Young Women sa stake, naningkamot ka nga maandam sa pagserbisyo og misyon samtang nag-eskwela usab sa kolehiyo ug nagtabang sa paghan-ay sa institute, ug, oo, 21 anyos ka pa lang?
Sa daghang mga dapit sa Simbahan, usa kini ka komon nga sitwasyon. Sa New Caledonia, usa ka gamayng tabok sa dagat nga teritoryo sa France nga adunay mga 2,400 ka mga miyembro sa Simbahan, ang mga miyembro nga young adult sa kasagaran hatagan og dagku nga mga responsibilidad sa pagtukod sa gingharian sa Ginoo. Si Presidente Russell M. Nelson sa makausa miingon ngadto sa mga young adult,: “Kamo ang umaabut nga mga lider sa Simbahan sa Ginoo! Andam na ba kamo sa pagbaton sa responibilidad sa pagpangulo?”2 Tungod sa panginahanglan ug gikan sa ilang gugma sa Manluluwas, ang mga young adult sa tibuok kalibutan andam na nga moserbisyo ug mangulo sa Simbahan.
Sa Iyang Pagserbisyo sa tibuok Kinabuhi
Alang sa daghang mga young adult sa New Caledonia, ang ilang mga misyon nakatabang sa pag-andam kanila alang sa tibuok kinabuhi nga pagserbisyo sa Simbahan. Si Syoelanne (Syo) Ulivaka nakadawat og tawag sa pagserbisyo isip ikaduhang magtatambag sa bishopric usa lamang ka semana human sa pagka-release gikan sa iyang full-time nga misyon. “Bag-o lang kong nakahuman sa akong misyon,” miingon si Syo. “Gikapoy ko, ug ako nang gisultihan ang akong kaugalingon, karon mopahulay ko.” Apan gidawat gihapon niya ang tawag. “Nakaamgo ko nga moadto kon asa ang gusto sa Ginoo nga ako moadto. Anaa ko sa pagserbisyo Niya—dili lang sa duha ka tuig, apan sa tibuok kinabuhi.”
Sukad sa iyang pagserbisyo sa bishopric, si Syo karon naminyo na, adunay anak, ug mibalhin na sa lain nga ward. Apan nagpadayon siya sa pagserbisyo ug pagtuman sa iyang mga calling sa Simbahan.
Si Elder Earl C. Tingey, emeritus nga General Authority Seventy, misulti sa mga young adult: “Ang calling sa Simbahan maoy usa sa labing talagsaong panalangin nga inyong matagamtam sa inyong panahon sa kinabuhi. Daghan kaayo mo og matampo sa inyong ward ug branch diin kamo nagpuyo. Ang inyong mga talento ug kahanas gikinahanglan sa usa ka nagtubo nga Simbahan.”3 Si Syo dili lang ang nag-inusara nga young-adult sa mga isla kansang mga kahanas gigamit aron makatabang sa nagtubo nga Simbahan—ang ubang mga young adult nagserbisyo halos sa matag kapasidad diha sa ward ug stake level. Si Syo miingon, “Among gisulayan nga dalhon sa among pag-uli ang mga butang nga among nakat-onan sa among mga misyon aron mapalig-on ang among stake ug ang among mga ward.” Kining mga young adult naghimo og daghang mga sakripisyo aron sa pagpalig-on sa gingharian diha sa ilang kaugalingong nasud, apan sama sa gisulti ni Syo, “ang among gisakripisyo sa kasagaran mao ang among panahon.”
Ang ubang mga young adult adunay duha o gani tulo ka mga calling. “Mahimong panalangin kana alang kanila, apan kana mahimo usab nga usa ka palas-anon,” miingon si Syo, kay daghan ang nanglimbasug sa pagbalanse sa mga gikinahanglan sa kinabuhing pagka young adult uban sa ilang mga responsibilidad sa Simbahan. “Malisud ang pagbuhat sa tanang butang sa samang higayon.” Apan nadiskubrehan ni Syo nga kon iyang unahon ang Ginoo, ang uban sayon ra nga buhaton. Siya miingon, “Ang Ginoo mitabang ra sa tanang ubang mga butang—eskwela, pagpangita og asawa—ang tanan anaa ra sa mga kamot sa Ginoo.”
Ang Kaugmaon sa Simbahan
Ang mga propeta ug mga apostoles dunay lig-ong mga opinyon mahitungod sa mga abilidad ug mga serbisyo nga mahatag sa mga young adult sa Simbahan: “Kami nagkinahanglan sa tibuok ninyong kasingkasing ug kalag. Nagkinahanglang kita og madasigon, utokan, manggiloy-on nga mga young adult kinsa makamaong maminaw, ug mosanong sa mga paghunghong sa Balaang Espiritu.”4
Ang mga young adult sa tibuok kalibutan ug sa New Caledonia nagpatalinghug niining apostolikanhong tawag. Nakaamgo sila nga sila ang kaugmaon sa Simbahan, ug sila mipili sa pagserbisyo sa bisan unsa nga paagi nga makaya nila. Sila nagdinasigay sa usag usa sa ilang mga calling. Nakigtambayayong sila sa mga misyonaryo. Sila nagpaambit sa ebanghelyo ug nagdapit sa ilang mga higala sa simbahan. Sila naghatag og tambag ngadto sa mga kabatan-onan sa ilang mga ward ug nagdasig kanila sa pagserbisyo og mga misyon. Nagbiyahe og lagyo aron makatambong sa templo. Nagtudlo sila sa dili mga miyembro sa ilang pamilya. Ug tanan niining mga paningkamot nakapalig-on sa gingharian.
Si Syo nakamatikud nga, kon kabahin na sa pagserbisyo sa Ginoo, “Kita ang Iyang mga himan.” Niining mga panahon sa paglambo sa Simbahan, ang Ginoo motawag sa mga Santos sa tanang pangidaron, bisan asa, sa pagdawat sa responsibilidad sa pagtukod ug paglig-on sa Iyang gingharian. Andam ba kitang motubag niana nga tawag?