Sa Digital Lamang: Mga Young Adult

Naghunahuna Ka ba nga Wala Kay Katuyoan isip usa ka Young Adult? Hunahunaa Pag-usab

Ni Cesar Gervacio

Ang paghunahuna mahitungod sa pagpangulo diha sa Simbahan sa umaabot nga panahon mahimong makahahadlok, apan adunay mga paagi nga ikaw makasugod sa pagpangulo karon.

Sa mga adlaw sa dili pa ang Ikaduhang Pag-anhi ni Jesukristo, adunay “mga gubat, ug mga hungihong sa mga gubat.

“… Managgubat ang nasud batok sa nasud, ug gingharian batok sa gingharian; ug mahitabo ang mga gutom ug mga linog sa nagkalainlaing mga dapit.

“Ug usab, tungod kay ang kadautan modagsang, ang gugma sa mga tawo mag-anam kabugnaw” (Joseph Smith—Mateo 1:28–30).

Taliwala sa mao nga mga kasamok, kinsa ang motabang sa pagpangulo sa atong mga kaigsoonan, sa sulod ug gawas sa panon, balik ngadto sa atong Langitnong Amahan?

Dihang dapita kita makatabang.

Unsaon Nato sa Pagpangulo

Gitawag kita nga usa sa labing bantugan nga mga henerasyon sa mga young adult. Si Presidente Russell M. Nelson naghulagway kanato isip kadtong “kinsa gisaligan sa Dios aron ipadala ngadto sa yuta atol sa labing mahinungdanong dispensasyon sa kasaysayan sa kalibutan” (“Barug isip Tinuod nga Milenyal,” Liahona, Okt. 2016, 46).

Mao nga, sa unsang paagi kita magpakabuhi subay sa atong kapasidad nga mahimong bantugan nga mga lider sa Simbahan sa Ginoo? Hinoon, kon kamo motan-aw sa palibut, tingali kamo makamatikod nga lider na kamo sa lain-laing paagi.

Mahimong mangulo kamo diha sa usa ka calling sa Simbahan. Isip usa ka misyonaryo, mahimong mangulo kamo sa usa ka diskusyon, mahimong maoy saligan sa usa ka kalihokan sa pag-proselyte, o maoy tahasan isip usa ka lider sa zone o sister nga lider. Mahimong usa kamo ka lider sa inyong pamilya o sa inyong mga higala. Makagiya kamo sa inyong mga katigulangan ngadto sa kaluwasan pinaagi sa buhat sa family history. Gani kamo tingali mahimo nga usa ka politikal nga lider, ug kanunay kamo nga makapangulo sa bisan unsang trabaho nga inyong gipili.

Apan ang pangutana mao nga, unsaon man gayud nato sa pagpangulo? Ang Manluluwas nangulo pinaagi sa Iyang ehemplo. Siya nangulo pinaagi sa “Dali, sunod kanako” kay sa “ang Akong paagi mao ang mas maayo.” Siya nagserbisyo, nagtudlo, naghigugma, ug naghunahuna alang niadtong naglibut Kaniya. Si Jesukristo mao ang pinakamaayo nga ehemplo sa usa ka lider. Ug aron mahimong usa ka bantugan nga henerasyon sa mga lider, makasugod kita pinaagi sa pagpaningkamot nga mahisama sa Manluluwas ug pinaagi sa pagbuhat niining ginagmay nga mga butang:

1. Pag-ampo alang niadtong kinsa nanlimbasug, kinsa nagkinahanglan og tabang, o si kinsa kamo responsable, ug tinguhaa nga masayud unsaon sa pagtabang kanila. Pag-ampo alang kanila pinaagi sa ngalan isip mga indibidwal, gani ingon nga ang Manluluwas nangalagad sa “tagsa-tagsa” (3 Nephi 11:15).

2. Paggahin og panahon sa pagsiksik sa mga kasulatan ilabi na gayud sa maayong mga ehemplo sa pagpangulo, ilabi na gikan sa Manluluwas Mismo.

3. Pag-ampo alang sa inyong ward, stake, ug kinatibuk-ang mga lider sa Simbahan. Pag-ampo usab alang sa mga lider sa gobyerno, nga sila unta madasig ug motrabaho diha sa espiritu sa kalinaw ug panaghiusa.

4. Ilailaha kadtong anaa sa inyong palibot. Susiha ang mahitungod sa ilang mga interes, ilang mga pamilya, ilang mga pagtuon, ug ilang mga tinguha ug mga kahinam sa kinabuhi (tan-awa sa Mga Taga-Efeso 2:19).

5. Basaha ang inyong patriyarkal nga panalangin ug pamalandungi unsaon nga makab-ot ninyo ang pinakamaayo ninyong pagkatawo.

Samtang buhaton nato ang atong pinakamaayo sa pagpangulo diha sa kamatarung, kita mahimong tinuod nga mga disipulo ug mga sumusunod ni Jesukristo ug mahimong takus sa pagpakig-uban sa Espiritu Santo. Samtang kita mohimo ug motahud sa sagradong mga pakigsaad, kita adunay katungod sa pagdawat sa gikinahanglan nga pagpangandam ug espirituhanong taming aron sa pagpakiggubat batok sa kaaway.

Makasugod na Kamo Karon

Unsa nga matang sa lider nga kamo mamahimo? O, sa pagkutlo sa Manluluwas, “Unsa nga matang sa [lider] kamo angay nga mahisama? Sa pagkatinuod Ako moingon nganha kaninyo, gani sama nga Ako mao” (3 Nephi 27:27).

Samtang kita magkaduol sa Ikaduhang Pag-anhi, ang Ginoo nagkinahanglan og mas matarung nga mga lider nga mosunod sa Iyang propeta ug moapil niini nga gubat. Siya nagkinahanglan kanato. Ania kita sa ika-11 nga takna, ug kita adunay daghang buhaton. Makasugod kita sa pag-andam nga mahimong usa ka bantugan nga henerasyon sa mga lider karon. Dili pa gayud ulahi sa pagsugod! Kon adunay mga butang nga kinahanglan ninyong ipakigsulti sa inyong bishop, siya makatabang kaninyo sa dalan sa paghinulsol. Kon nagkinahanglan kamo og direksyon kon unsaon sa pagpalambo sa inyong kaugalingon, sugdi pinaagi sa pagpalambo sa inyong relasyon uban sa Langitnong Amahan ug ni Jesukristo; Sila makapakita kaninyo kon asa mopadulong gikan dihang dapita. Kamo ug ako gitawag karon sa paghimo sa buluhaton sa Ginoo ug sa pagtabang sa atong propeta nga mangulo sa balay ni Israel ngadto sa kahilwasan, ug kon maningkamot lamang kita sa pagbuhat sa labing maayo natong mahimo, kita magmalampuson.

Si Cesar Gervacio gikan sa Missouri, USA, apan sa pagkakaron usa ka estudyante sa Brigham Young University–Hawaii. Siya miserbisyo og misyon sa Pilipinas ug may hilig sa pagluto, pagtan-aw og sine, ug pagmugna ug pagtugtog og musika.

Unsa Ang Akong Mahimo?

Sa pagpangita og dugang nga mga paagi aron mahimong mas maayo nga lider, ribyuha ang “Kalihokan kabahin sa Hiyas” sa kapitulo 6 sa Isangyaw ang Akong Ebanghelyo: Usa Ka Giya sa Misyonaryo nga Pagserbisyo, rev. ed. (2018), 152. Ikonsiderar unsa ang mga kausaban nga mahimo ninyo sa inyong kinabuhi aron mas mahisama ni Jesukristo sa kinaiya. Usab, ikonsiderar ang pagtuon sa “Pagbarug isip Tinuod nga mga Milenyal” ni Presidente Russell M. Nelson (Liahona, Okt. 2016, 46–53). Tan-awa ang nagbalik-balik nga mga tema ug mga doktrina nga makatabang kaninyo nga mahimong mas maayong mga lider ug mga disipulo.

Pagdiskobre pa og Dugang

Makakita kamo og dugang nga mga artikulo mahitungod sa pagsalmot sa nagpadayon nga Pagpahiuli diha sa seksyon sa young adult sa Abril 2020 nga Liahona.

Susiha ang YA Matag Semana, nga makita diha sa seksyon sa mga Young Adult sa Gospel Library nga app, alang sa bag-o, makapadasig nga sulod alang sa mga young adult matag semana.

Mahimo kamong mosumiter sa inyong kaugalingong mga sugilanon, mga ideya, ug feedback diha sa liahona.ChurchofJesusChrist.org. Naghinam-hinam kami nga makadungog gikan kaninyo!