Pagkaplag og Kalipay sa Paghimo sa Buhat sa Ginoo

Isip mga young adult, bisi ang kinabuhi. Daghan kaayong mga butang nga pwede natong buhaton: pagpalambo sa atong edukasyon, pagpangita sa atong mahangturong kapikas, pagdesisyon sa trabaho, pagsugod og pamilya. Ug uban sa tanan nianang maayo nga mga butang, kita usab giawhag nga “kanunayng makita nga naghimo sa buhat sa Ginoo.”¹

“Panahon na karon alang kanato nga mas makasabot pag-ayo sa atong tahas sa pagpadali sa buhat sa kaluwasan. Samtang mohimo kita sa misyonaryo nga buhat sa mga miyembro, … buhat sa templo ug sa family history, ug pagtudlo sa ebanghelyo isip natural nga bahin sa atong kinabuhi, kita makasinati og hingpit nga kalipay ug matugahan og espirituhanong mga gasa nga atong gikinahanglan sa pagpalig-on sa Simbahan.”²

Ania ang pipila lamang ka bisi nga mga young adult kinsa nakakaplag og kalipay diha sa paggahin og panahon alang sa buhat sa Ginoo.

Family History: Sugdi lang Karon

“Ang Pagpahiuli nakahimo og daghan nga mga butang alang kanako sa personal mismo tungod kay nahibaloan nako nga ang mga pamilya magkauban sa kahangturan,” miingon si Itumeleng Tlebere gikan sa Maseru, Lesotho. “Mahimong makakita ko pag-usab sa akong mga apohan ug akong mga katigulangan kinsa mitaliwan na. Mao kana nganong ganahan kaayo ko sa family history. Tungod kay ako ang unang henerasyon sa Simbahan, daghan kaayo ko og buhatonon para nila.”

Si Itumeleng nasayud gikan sa kasinatian nga ang pagsubay sa mga talaan ug sa impormasyon mahimong mahagiton, apan miawhag siya sa ubang mga young adult nga mahiapil sa ilang family history: “Basta sugdi lang dayon ang pagbuhat niini. … Ang family history nakapahimo kanako nga mobati nga mapasalamaton sa tanan nga anaa kanako.” Makahimo usab kini og sama niana alang kanimo.

Pagpangalagad: Tuguti nga Mahimo Kamong mga Kamot sa Dios

Si Lucy Fergeson gikan sa Utah, USA, mipakigbahin kon sa unsang paagi ang pagpangalagad nakatabang niya sa pinakangil-ad nga semana sa iyang kinabuhi—apan sa wala damha nga paagi. Semana kadto sa final nga eksam sa eskwelahan, usa ka bisi nga semana sa trabaho, ug ang iyang uyab bag-o lang nga nakigbuwag niya. Ug dayon, siya miingon, “nakalimot ko, apan ang akong kompanyon sa pagpangalagad ug ako nagplano nga maghimo og muffins alang sa mga sister nga gi-assign namo aron among pangalagaran.”

Samtang dungan sila nga nagluto, ang kompanyon ni Lucy sa pagpangalagad naminaw, namati, ug mitanyag og tambag. “Ang paghimo ug paghatud og muffins dili usa ka butang nga importante kaayo o makahimo og dakong kalainan,” namalandong si Lucy. “Apan human ang akong kompanyon mihatud nako sa balay, akong naamguhan nga kini mao gayud ang akong gikinahanglan aron mas mogaan ang akong gibati ug nga usahay ang Dios mopadala og ubang tawo aron molihok isip iyang mga kamot. Ang nindot niini para kanako mao nga ang tabang miabut gikan sa akong kompanyon sa pagpangalagad kay sa mga sister nga gi-assign nga moalagad nako. Mapasalamaton kaayo ko nga mitabang siya nako nga mobati nga wala ko mag-inusara ug nga ako gihigugma.”

Misyonaryo nga Buhat: Magpakabuhi nga usa ka Ehemplo

Dili kinahanglan nga usa ikaw ka full-time nga misyonaryo aron makasangyaw sa ebanghelyo. Si Vennela Vakapalli, gikan sa Andhra Pradesh, India, mipasabut, “Kon magsakay ko og bus, kon magsakay ko og tren, akong ablihan ang Basahon ni Mormon ug basahon kini. Ug kadaghanan sa mga tawo mangutana kanako mahitungod niini.”

Si Ashlee Dillon gikan sa Utah, USA, nagpakigbahin: “Tungod lang kay wala ko makaserbisyo og misyon wala nagpasabut nga dili ko usa ka misyonaryo. Imbis nga mobiya sa akong pamilya aron moserbisyo sa Ginoo, ako nagserbisyo sa Ginoo uban sa akong pamilya. Nagserbisyo ko sa uban, ug nagpuyo ko nga usa ka ehemplo sa usa ka disipulo ni Jesukristo.”

Pagkaginikanan: Tudloi ang mga Bata sa Ebanghelyo

Ingrid de Bastian Ortiz, gikan sa Veracruz, Mexico, usa ka 26 anyos nga inahan sa tulo ka anak. Siya mipasabut, “Isip batan-ong mga ginikanan sa gagmayng mga bata, adunay mga adlaw nga sobra ka bug-at, tungod sa walay katapusang mga buluhaton ingon man sa pagtagad nga gikinahanglan sa mga bata. Hinoon, atong bation ang usa ka dakong responsibilidad sa pagtudlo sa ebanghelyo ngadto sa atong mga anak aron sila masayud nga sila mga anak sa Dios.

“Ang akong katungdanan isip inahan mao ang pagtabang kanila nga makaamgo sa ilang kaugalingon nga ang atong Langitnong Amahan adunay plano sa kalipay alang kanila.”

Bisan kon dili pa kamo usa ka ginikanan, makasalmot gihapon kamo sa pagtabang sa pagtudlo sa mga bata. “Importante kaayo nga ang mga anak masayud mahitungod niini nga mga baruganan ug mga doktrina,” miingon si Ingrid, “nga kita sa pagkatinuod makasalmot isip batan-ong dili minyo o minyo nga hamtong sa pipila sa calling sa Primary ug sa nursery.”

Kitang tanan bisi nga mga young adult. Apan bisan unsa pa man ang inyong mga kahimtang, makakita kamo og yano nga paagi sa pagbuhat sa buluhaton sa Ginoo sa tanang dapit sa inyong kinabuhi—madako man o magamay.