Usa Ka Gamay nga Langgam Mipahinumdom Kanako
Laura Linton
Utah, USA
Paghulagway pinaagi ni Carolyn Vibbert
26 anyos ako sa dihang ang akong bana ug ako nawad-an sa among unang anak. Si Kennedy nahiling nga adunay tumor sa utok sa dihang 13 pa lang siya ka bulan. Human sa tulo ka operasyon, lima ka hugna sa chemotherapy, ug daghang mga tambal ug pagpatambal, namatay siya sa among mga bukton sa pangedaron nga 20 ka bulan.
Nahugno ko nga nawad-an sa akong matahum, kuryuso ug lagsik nga batang babaye. Nganong nahitabo man kini? Unsaon nako sa pagpadayon? Daghan kaayo ko og mga pangutana, apan wala koy bisan unsang tubag. Pipila ka adlaw human sa lubong, ang akong bana ug ako mibisita sa lubnganan, nga natabunan pa sa nindot nga pink nga mga bulak ug mga laso gikan sa paglubong.
Samtang naghunahuna ko sa akong anak, nakakita ko og kuyabog nga langgam, bata pa kaayo aron makalupad, naglukso-lukso sa kasagbutan. Kini nga langgam nagpahinumdom kanako ni Kennedy tungod kay ganahan siya og mga mananap. Ang langgam milukso ngadto ibabaw sa lubnganan ug nagdula-dula sa mga laso ug mga bulak. Mipahiyom ko, nasayud nga mao gayud kini ang unsay gusto ni Kennedy. Ang langgam dayon milukso padulong nako. Wala gayud ako molihok. Ang gamay nga langgam milukso tupad gayud kanako, misandig sa akong bitiis, mipiyong sa iyang mga mata, ug nakatulog.
Maglisud ko og pasabut sa akong mga pagbati nianang higayuna. Mibati ko nga mora og gigakos ko sa akong Kennedy. Dili ko makagakos sa akong anak, apan kining gamay nga langgam—usa ka nilalang sa atong Amahan sa Langit—miabut ug mipahulay sa gamayng ulo niini kanako, nagpahinumdom nako nga ang Langitnong Amahan nakasabut sa akong kasakit ug kanunay nga maanaa aron sa paghupay kanako ug pagtabang kanako agi niini nga pagsulay.
Si Elder David A. Bednar sa Korum sa Napulog Duha ka mga Apostoles miingon, “Kon ang mga pulong dili makahatag sa kahupayan nga atong gikinahanglan … , kon ang katarungan ug rason dili makahatag og igong pagsabut kalabut sa mga inhustisya ug sa walay kaangayan sa kinabuhi, … ug kon daw kita nag-inusara ra gyud, sa tinuoray gipanalanginan kita pinaagi sa malumong mga kalooy sa Ginoo” (“Ang Malumong mga Kalooy sa Ginoo,” Liahona, Mayo 2005, 100–101).
Wala pa nako makuha ang tanang tubag sa akong mga pangutana, apan kining malumo nga kalooy misiguro kanako nga si Kennedy ug ako pareho nga gihigugma sa atong Langitnong Amahan ug nga pinaagi sa maulaong sakripisyo sa Iyang Anak, si Jesukristo, aduna akoy paglaum nga si Kennedy, ang akong bana, ug ako magkahiusa pag-usab isip pamilya sa umaabut.