Ana Iteraniba te Aono
Uniki kainamwarake n te Ran
E rang n tatabetabe maiun Eritai Kateibwi are e maeka iaon Tarawa, Kiribati. Ma buokana ae e nang uarereke mairouia raraona e nang tatabetabe n ana kambwana are e tabe ma unikan kain amwarake n te ran.
Ngke e kamatebwaia te bitineti n te BYU-Hawaii e reke ana iango bwa e na buokiia iai ana aomata ni mweengana ni karikirakean amwarake aika a kai maiu ao n nakoraoi ni kabonganakin te ran ae kabongana te oxygen ao te amwarake nakon kai n amwarake n aki keniken ke ni kena aontano.
Ngkai ataein te Reirei n te BYU-Hawaii, Eritai e kairaki nakon te SWATT (Sustainable World Action Technology Team). E ira te wekitiaobu ao inanon 2016 e moanna n “Iango aika Tamaroa” te kabo iaon te bitineti n te BYU-Hawaii Willis Tienta—kaniwangana bon $3000.
E nako China Eritai ni karekei bwaai ni mwakuri ao bwaai nako ibukin katean iunite n ununiki n te ran are e ikoikoti. E kangaanga karekean te bwam ae tau ao e kawarii tebwi ma uoua taabo ni bobwai; n tokina e kunea te bwai are e bon kainnanoia. Te bwam ae maiu man korakoran taai ae uarereke are e kaburoburoa te ran inanon te boora are nnen te aroka are a katukaki iai (kamwarakeaki?). Teimatoan mwaitin te oxygen e kakoaua bwa waakan aroka nako a tiku ni maiuraoi. N rikirakem man te kabwebwe, te raoki meron ae ea matoa e kona n anaaki uaana tii inanon 30 te bong.
Teuana te kakabwaia ae korakora man te aekaki n “ununiki” aei bwa e rang uarereke te tabo are mena iai—ao akea te tano naba teutana. Te kangaanga iai bwa e kainnanoa te mwaiti n ran, are te kabanea n tamaroa i Kiribati—ma, Eritai, n aroia kain te tabo aika mwaiti, e kabongana ranin ana mwanibwa. E kawawaea naba ana karau are e bwaro nakon te tangke man te kai ni kawawa man ana auti.
E a tia Eritai ni kaoaki bwa e na tibwa ana tititem n ununiki n te ran ao rabakauna n te wekitiaobu are e karaoaki n ana tabo te Ekaretia “Te Reirei n Onaroka”. Ana Iango a rang butimwaeaki, ao kain te tabo a maroroakina te kawai ae boou ni karekean te amwarake ma te ingaingannano.
Te nutibeebwa are e katerea kinakin Eritai bwa te Tiambion ni Kairake n te Aonaaba ae tokanikai, are bon te burokuraem ibukin te enuwaromenta are e boutokaaki man Bootakin Aba. Eritai e reke irouna te tokanikai n Tebetebeke mai Atia—are bon te kamoamoa ae korakora ibukina bwa Eritai e kinaaki ibuakon karinrin aika rianako inanon 2017.
Eritai ao buuna Tebaraoi a uaia n nako ni mitinare: teuaei i Hawaii, ao neiei i St. George, Utah. A kaitibo ngke a kaai n reirei n te Moronaai High School i Kiribati. Imwiina a manga kaitibo riki i Hawaii ngke a uaia n Reirei—a mare n 27 Nobembwa 2014.