Ti a Tataro Irarikin te Tembora
Juan Beltrame
Buenos Aires, Argentina
Kamataata n te tamnei iroun Allen Garns
Ngke ai teniua ana ririki natira te mwaane ae Marco, Ngai ma ngaia ti rootaki n te nganga man te amwarake are ti kanna. E a rangi ni mamaara are e matu n aki namakinaaba. Ngai, ma kainnabau, ae Marianela ti biriaitua ni uotia nakon te onoaraki. N te tai are ti roko ikekei, titebo ma e a mate. N tokin te tai, tao imwiin aua te aoa, e a manga namakinaaba.
Man te tai anne, e a roroko katikitikina inanon nimaua te ririki. Ngkana ti nikiria iaon ana kainiwene ni katoa tairiki, ti miimi ngkana arona bwa inanon te nukanibong, ti na manga biriaitua naba ni uotia nakon te onaoraki. E bon kaangaanga rereken matuura n ririki ni karawawata akanne, ao ti katan iaon te tataro, te onimaki, te aki mamatam, ao ai ana kakabwaia te nakoanibonga.
Ngke tao ai onoua ana ririki Marco, e tarebooniai Marianela n au tabo ni mwakuri ao n tuangai bwa ti riai ni waekoa n nakon te onaoraki. E rootaki Marco ni korakoran te kakatikitiki ao e matu n aki namakinaaba. Ngke e tareboon, I mwakuri iaon manga kaboouan aia Tienta ni Kataneiai Mitinare i Argentina, ae e tei irarikin Temboran Buenos Aires Argentina.
Imwaain ae I nako n te onaoraki, e taku raoraou ae raou ni mwakuri, “Ngkai ti a rangi ni kaan ma ana auti te Uea, e aera ngkai ti na aki moa uaia n tataro?” E kainaki te tembora ibukin kaboouana ao karababaana, ma ti roko n ana auti te Uea, are I a tataro iai ibukin Marco.
N aki tabe ma bwaai ake ti rinanona ma Marco, I kakaitau nakon te Atua ibukin au tai ma Marianela are ti kona n tibwauaia ma ngaia. Ngke I tataro, I tuanga Tamau are i Karawa bwa ti a tia ni kataia n riki bwa kaaro aika a raraoi ao n rangi n tararua raoi Marco n ara kabanea n tamaroa are ti kona. I tuangnga naba bwa ti na butimwaea Ana kaantaninga ngkana arona bwa e na wetea Marco nakon mweengana.
Ngke I roko n te onaoraki, I aki ataia ngkana arona bwa e na kona n okira arona n namakinaaba, ngkana e tokanikai mai iai, e na kona ni manga nakonako ke n taetae n aron are mai imwaina. Imwiin te uoua n aoa ae rangi ni kakorakai, e a uti. E kua, ma bon akea ana kaangaanga. Man te tai anne, n te aro ae kamiimi, e a oki marurungina. N tokin te tai, e a toki ana bwainaoraki Marco ao e a otinako man te onaoraki.
Ngai ma Marianela ti tanrikaaki n taraa te tai ae rangi ni kaangaanga ma te kakaitau bwa e teimatoa ni mena irarikira Marco ao ni kakaitau ibukin bwaai ake ti reiakin. Ti katiteuanaaki ni kataakira ao ti kakorakoraaki n te aro n tamnei. Tao ngke akea aio, a na bon akea te bae ti na reiakinna n atai mwaitin ana kawai te Uea are e na kaoti ni Baina inanon maiura.
Ngkai e taku Marianela, “Ti noori mwaitin kakoaua ao taneiai ake ti anganaki bwa te kakoaua bwa iai te Atua irarikira, bwa E bon raoniira ao E ongora iroura. Ngkana ti teimatoa ao ni karekea te taotaonaki n nano, a kona n roko kakabwaia ngkana ti kaantaninga ae te kabanea ni uarereke.”