Aron Karaoan am Retiume e Ngae Ngke e Aki Tau Am Kataneiai n te Mwakuri

Iroun Heather White Claridge

Ana Maekatiin te Ekaretia

E karako ae ko na karin n am retiume? Iangoi taekan nakoam n te Ekaretia!

Tabeua mwakoron te retiume aika kakawaki aika aki toki n otioti bon te “Taneiai n te Mwakuri,” “te Taneiai n te Mwakuri n Anganano,” “te Reirei,” ao “te Konabwai.” E ngae ngke te rinan ae uarereke, n namakinna ae e karako am atatai iaon mwakuri aikai e kona ni kabwaranano. Ma tai kabwaraa nanom! E kona n rawata riki am atatai n aron ae ko iangoia—riki ngkai nakoam n te Ekaretia e kona n anganiko te taneiai ae kakawaki riki. Ti kakoroa nanon ao ni kataia ni kakorakorai nakoara n te Ekaretia man kaotan ara tangira ibukin te Uea ao te nano ni kan buokiia Ana ataei, ma ara taneiai aika ti karekei man karaoakiia a kona naba n ibuobuoki ni katereira n ara tai ni kakaea ara mwakuri.

Karinanin Mwioko ao Okiokiia

Tera nakoa n te Ekaretia aika ko a tia ni karekei, iai bwaai aika ko a tia ni kakoroi bukiia ao am konabwai aika ko a tia n reiakin aika ko kona ni karin inanon am retiume. Koroi mwakuri aika ko karaoi inanon nakoam n tatabeua nako ao koroi bwa maanra te tai ae ko karaoi mwakuri aikai ao mwaitira aomata aika irekereke iai.

Rongorongon Bwaai Aika Korobukiia

Imwiina, koroi “rongorongon bwaai aika a korobukiia.” Aikai bon rongorongo aika mataata raoi iaon bwaai aika ko kakoroi bukin nakoam. A oti iaon am retiume n te kanikina ae te buureti ae rinan iaan am atatai n tatabeua nako.

Moana am rongorongo n tatabeua nako ma te “weabe ni mwakuri”—weabe aika korakora n aron tararuai, nakoraoi, reirei, etc.

Banna ni katotoo

Aikai bon rongorongo aika a tia ni korobukiia aika boboto iaon tabeua aekakin wewete ao n raonaki ma mwioko, okiokiia, ao mwaitin aika a irekereke n tainako ma taian wewete:

Ngkana te tia reirei:
- E katauraoa te reirei ni katoa wiiki man reiakinan taian boki n reirei ao booki aika tabu ao ikotakin bwaai n reirei ao am taneiai bon i iroum
  - Ibukin aika a okioki, koroia bwa tao manraa ae ko karaoa iai te mwakuri—katoa wiiki, uoua n te namwakaina, etc.
- Reireiniia kaain te kiraati ae onoman kaaina ae 14- nakon 16-aia ririki ni katoa wiiki ibukin 50 te miniti.
  - Buburan te kiraati ao mwaitiia kaina ni kaineti ma nakoam.
Ngkana n te beretitentii:
- E kateaki ao ni katiaaki ni katoa namwakaina ao te kouru ae teimaan ibukin te kurubu.
- E tararuaaki ibukin mwengaraoia kaain te bootaki aika 30 mwaitiia.
- E kataneiaia taan kairiiri ao taan reirei n aia mwakuri.
- E bairea ao ni barongai waaki ni kakukurei ni katoa namwakaina ibukiia aomata aika 26 mwaitiia.
- E karaoa ao e ira te kataumwane ni katoa namwakaina.
Ngkana te taraekita n te katangitang:
- Bairea te burokuraem n te katangitang ni katoa wiiki.
- Bairei kamataku n te katangitang aika onoti aika aanga kaain te taromauri.
- Babairei burokuraem n te katangitang n taai ni motirawa ao ni bwaai aika karaoaki.
Ngkana ko beku n am mition:
- Katei ao kakoroi nanon kouru ni katoa wiiki ao anga reirei aika teimaan ao am kouru n rikirakem i bon iroum.
- Reireiniia te mwaiti ae 16 aomata ao kurubu ni katoa wiiki ao aron kanakoraoan maiuia rinanon karaoana ao am kamatebwai i bon iroun.
- Ngkana te tia kareirei: E kataneiaia ao e reireiniia mitinare aika boou n aron te anga reirei ao te bitaki nakon te kawai n anga reirei ae matoatoa.
- Ngkana te mataniwi ae te titita n te, mwakoro, ke n te tioun: E tabe ibukin kaungakiia, rinanoan, ribotinakin aron aia waaki, ao tabeakinaia mitinare aika 14 mwaitiia.
- Ngkana aban tinaniku: E maeka n [aban tinaniku] ibukin [abwakin te tai] ao ni karababa au taneiai iaon aia katei.
- Ngkana ko taetae n taetaen te aba teuana, koreia ae bane am tai n te taetae anne ao manin am tai.
- Katooto aikai a rangin ni bwabwainaki, ma ngkana e mataata riki nakon ae ko a tia ni kakoroa nanona ao reitakina nakon te mwakuri ae ko tangiria, ao e na nakoraoi riki taekan am retiume.

Karaoakin Am Retiume

Karini mwiin nakoam ao rongorongon bwaai aika korobukiia nakon am retiume. Ni buokan nakoam bwa a na tau nakon am retiume, ko na riai ni karaoi bitaki aika a onoti nakon am retiume ni kaboraoia ma kabwarabwaraan te mwakuri are ko kororeta ibukina.

N tainako ao e na iai inanona kabwarabwaraan te mwakuri taeka aika kakawaki. Taeka aika kakawaki aikai bon bwaai aika onoti are e ukoukoria te kambwana iroun te aomata are a kamwakuria, ao ko na tangiria ni kakoaua bwa ko kabonganai taeka aika kakawaki aikai n am retiume. Ko na tangiria naba ni kamatatai nakoam aika rangin n irekereke ma te kabwarabwara n te mwakuri. Ngkana ko kororeta ni bubuti bwa ko na riki bwa ana tia ibuobuoki temanna, kamatatai wewete ake a irekereke ma aron mwakuri n te bootaki anne, ke ngkana ko kororeta ni bubuti te mwakuri ni bonomwi n tia reirei, koroi wewete ake a irekereke ma te anga reirei.

Bwaai n Ibuobuoki Riki Tabeua

Koroi rinanin nakoam iaan am itera n “Taneiai n te Mwakuri n Anganano”.
Karina te bootaki bwa “Ana Ekaretia Iesu Kristo ibukiia Aika Itiaki ni Boong aika Kaitira.”
Korei rinanin nakoam bwa atuun am mwakuri.
Kabonganai riki taeka ao kibu n taeka aika rangin ni bwainaki n te aonaaba n aron bootaki n taromauri irarikin te uoote ke te mwaanga ao aia waaki ni kakukurei kairake irarikin te Miutuo.
Kabwarabwarai bootaki aika aki rangin ni kinaaki irouia aomata.
- Te katooto, kabwarabwara te Bootaki n Aine bwa te bootaki n aine n te aonaaba. Ko kona ni korea te Bootaki n Aine n am uoote ke n am mwaanga bwa te kurubu n te tabo ke mwakoron te bootaki n te iunite n te tabo anne.

Ko kona naba ni kabonganai reirei aika ieta ni kinai rabakau ao taneiai mai irouia taan anganano tabeman n te mwakuri, beeku, ao waaki ni kakukurei aika ko a tia ni karaoi. E kakawaki bwa ko na kaoti aekakin taneiai aika a kakaokoro aika a kaineti nakon te mwakuri are ko tangiria ni karekea. Ngaia, are n raonaki ma nakoam n te Ekaretia, kataia ni karin taneiai aika mwaiti aika ko konai ni karin n am retiume. Riki ngkana ko aki waekoa n ataia, e mwaiti aika ko kona n anga, ngaia are taraiko bwa ko na tamaroa n aron ae ko kona!