“Ko Riai ni Kitana te Tabo Aei”
E maeka te tia korokaraki i Antofagasta, Chile.
N aki tabe ma maaku ibukin mwaingiu nako meangin Chile, e bitaki te rereua n riki bwa abara ni berita.
Tamnein Concepción, Chile, man Getty Images
Ngke I wareware n ana Boki Moomon n aron Nibwaai ni boboutoka tamana ae nonoori mii ni burabeti, I iangoia bwa angiina kairake n te Ekareti bon aekan raoi Nibwaai. Ma ngke a baireia au karo bwa ti riai ni mwaing nakon te rereua, I namakinna bwa ai bon Reimwan ao Remuera raoi Ngai. I aki kan kan kitana mweengau.
N aron Nibwaai ao tarina, I “a tia ni bungiaki irouia kaaro aika a tamaroa” (1 Nibwaai 1:1). Ma a uaia ni kaaina te Ekaretia ngke tebwi tabun aia ririki, ao tinau e tataninga tamau ngke e karaoa ana mwakuri ni mitinare. A kakaonimaki, bon kaain te Ekaretia aika a mwakuri korakora.
Ngke I mena n te kauarinan n reirei, e moanna n nakobuaka kaubwain mwakoron te aba ae Concepción, Chile. E tabe ni karako te mwakuri, ao e a kaangaanga reken ana mwakuri tamau. N tokin te tai, e moanna ni kakaea ana mwakuri n te kaawa teuana.
Ni kakaeakin ana mwakuri ao e a roroko i meang ni kaawan Calama, ni mwakoron aban Chile ae te tabo ni keni kooro. Bon te intinia ibukin te kateitei, ao e kunea ana mwakuri ae tamaroa ikekei. Ma bon tii ngaia ao e raroa nako. Ti bon tii nooria ngkana e kona ni kabooa mwananga iaon te bwati ae 32 te aoa nakon mweengara.
Imwiin tabeua te ririki n noorakin tamau tii uoua ke teniua te tai n te ririki, e namakinna tinau bwa e riai ni karaoaki te bitaki. A baireia au karo bwa a riai nikiraia ara utu ni mwaing nako meang.
Ti Riai ni Mena Irarikin Tamara
Akea ana kaangaanga ni mwaing tariu ae te karimwi. Ao mwaaneu ae karimoau, are e mena n te kuura, e katea te katooto ae tamaroa ibukiu.
“N na kabanea korakorau ni kamatebwai,” e taku. “Ti riai ni mena iraikin tamara.”
A bane ni boutoka te babaire te koraki ma bon tii ngai ae I aki. I kan mena naba irarikin tamau, ma I rawa ni karaoa te bitaki ao anganano aika a onoti. Iai raoraou, I ataa te tabo, I kukurei n tein maiu, ao I kan nako n reirei n te kuura i Concepción. I karaoi bwaai ni kabane ake I kona n anaa nanon tinau bwa ti aki riai n nako.
N tokin te tai, e taku, “Natiu, bon tii tamam n tiku n tii ngaia. E tangiriira bwa ti na mena iraikina. Au kaantaninga bwa ko oota, ma ko rangi n tii tabe ma ngkoe.” Ngkanne e karaua nanou, “Iai kabwaiara ae e na reke ikekei.”
I ataia raoi bwa e bon eti tinau, ma ni bon koauana e bon aki anaaki nanou. Akea au koaua n te tai anne, ma I baireia ae N na tataroakinna ngkana tao I riai n nako ma au utu. E roko te kaeka ae itiaki nakoiu: “Ko riai ni kitana te tabo aei.” I nanokawaki, ma I tuangiia au karo bwa N na nako.
A Ngaara Taian Aroka?
Concepción bon te tabo ae mangurooro aona ma aroka aika a mwaiti. E karekea 50 te inti (127 te tientemiita) te karau n te ririki. Antofagasta, te kaawa irarikin Calama are ti mwaing nako iai, e karekea tii 0.1 te inti (0.25 te tientimiita) n te ririki.
Te bwai ae rangi ni kakubanako irou n taekan te mwaing bon te mwananga. Ngkai ti a mwananga ni kawaira nako meang n te bwati, ni mamataku ni bitakin te mangurooro nakon ae buraaun e bon kananokawaki. I miimi,“A ngaara taian aroka? A ngaara taian kao inanon te kaawa?” Te bwai ae I bon tii nooria te bareka, atiibu, ao taian tabuki.
N ae teretere raoi, meangin Chile bon te rereua, ngaia are akea kantaningakina bwa N na noori bwaai ake I taneiai n noori i Concepción? I kauringaki aron aia namakin Reimwan ao Remuera ngke a kitana aban rikiia ana utu Riaai ni mwananga nakon te rereua.
E korakora maaku ngke ti a roko i Antofagasta. Tera ae e na riki ngke arona bwa akea raoraou? Tera ae e na riki ngke arona bwa I aki taneiai ma te tabo? Tera ae e na riki ngke arona bwa au kaantaninga ibukin taai aika a na roko a aki koro bukiia?
N tokina, I riai n aki raraoma. E bon eti tinau n taekan kabwaiara ake a tataningaira—ai moarara riki te kabwaia n te maiu n tamnei.
Imwaain mwaingira, e aki moanibwai te euangkerio irou. Akea iangoan te Uea inanon maiu. Ma i Antofagasta, a roko aomata inanon maiu ake a buokai n noora tamaroan te euangkerio. I karekea buokau mairouia taan kairiiri n te nakoanibonga. A reke raoraou aika a teimatoa ni kakawaki irou. Maiu n tamnei e bitaki n ae bwanin.
Mwanangan Sergio ma raoraona nakon te intitiute.
I kakaitau bwa I ongo iroun tinau. I kakaitau bwa e kaeka au tataro te Uea. I kakaitau bwa I karekea te ninikoria ni mwaing nako meang ma au utu.
Ikai inanon te rereua te tabo are I karaoi iai bitaki ake a buokai n riki bwa antai Ngai n te bong aei. Ikai te tabo are I motinnanoia bwa N na butimwaea te euangkerio, ni karaoa au mwakuri ni mitinare, ni mare n te tembora, ao n anga maiu nakon te Uea. Ikai te tabo are I baireia bwa N na aki manga oki n riki n aron Reimwan ao Remuera.
Ibukiu ma au utu, e bitaki te rereua n riki bwa abara ni berita.