Reirein te Mwakuri n Ibuobuoki

Ti na Kanga ni Karika te Katei n aki Katinanikuaki n te Ekaretia?

colorful geometrical people

Kamataata n te tamnei iroun Getty Images

Ngkana ti taratarai nako ara uoote ao mwaanga, ti noriia aomata ake a taraa n nakoraoi ma tabeman n ae bebete. Te bwai ae ti aki ataia bwa e ngae ngke iai ibuakoia ake a taraa n nakoraoi ma tabeman, iai naba aika a mwaiti ake a namakina te maroaa. Teuana te kamatebwai, te kukune ae ai tibwa ngkai naba bwa e kaniia iteraia kairake n ikawai n te United States ni ribootinna bwa, a maroaa, a mwanuokinaki, ke a kaokoroaki ma tabeman.¹

E kakawaki bwa ko na namakina te kairaki. Bon aan kainnanon te aomata, ao ngkana ti namakinna ae ti katinanikuaki, e bon kammaraki. Te katinanikuaki e karekea te namakin ae kananokawaki ke te un.² Ngkana ti namakina te maroaa, ti kataia ni kakaea te tabo are ti na mweengaraoi iai. Ti riai ni buokiia aomata nako n namakinna bwa bon ngaiia kaain te Ekaretia.

Anganakiia Tabeman Namakinan te Kairaki n aron are E Karaoia te Tia Kamaiu

Iesu bon te katooto ae tamaroa ni kakawakin ao kairakiia aomata. Ngke E rineia Ana Abotoro, E aki bane nanona iaon te nakoa, kaubwai, ke mwaitin te mwaatai. E ataa kakawakin ainen Tamaria ae e mena n te mwaniba, ni kaota nakon neienne Rikina n aki tabe ma aroia Iutaia ni kamwinibaaia I-Tamaria (taraa Ioane 4). E taraa te nano ao e aki inanonano (taraa 1 Tamuera 16:7; Reirei ao Berita aika Tabu 38:16, 26).

E taku te Tia Kamaiu:

“I anganingkami te tua nabangkai, bwa kam na itangitangiri; n ai arou ngke I tangiringkami, bwa kam na itangitangiri naba.

“Ane a na ataingkami aomata ni kabaneia bwa au reirei ngkami n aei, ngkana kam itangitangiri” (Ioane 13:34-35).

Tera Ae Ti kona ni Karaoia?

N tabeti e kaangaanga ae kona ataia ngkana e namakinna temanna bwa e katinanikuaki. Angiia aomata a aki tataekinna—a aki taekinna ae a katinanikuaki. Ma te nano ae tatangira, ana kairiiri te Tamnei ae Raoiroi, ao te konabwai n atatai, ti kona n ataia ngkana e namakinna temanna bwa e aki kairaki ni bobootakin te Ekaretia ao waaki ni kakukurei.

Tabeua Kanikinaa aika a Riki n Namakinan te Katinanikuaki:

• Inin te rabwata n teina, kakooa baim n rukum ke te mata ae noubaraaki.

• N tekateka n te ruu mai ibuki ke n tekateka ni maroaa.

• Aki nanako n taromauri ke aki bati n roroko.

• Ni moantaai ni kitana te boowi ke waaki ni kakukurei.

• N aki ira buakon te marooro ke te reirei.

Aikai bon kanikinaean naba tabeua namakin, n aron te maamaa, kakain te nano ke te aki mweengaraoi. Kaain te aro a kona n namakina “te kaokoro” ngkana kaain te aro aika a boou, kaain te aba ke te katei teuana, ke bitakin te anua ni maiu ae karawawata, n aron te raure, maten temanna kaain te utu, ke te moantaai n oki ni mitinare.

N aki tabe ma aikai, ti na riai n nako ni kawariia ni buokiia ma te tangira. Te bwai are ti taekinna ao are ti karaoia a karika te namakin are a bane ni butimwaeaki ao ni kainnanoaki.

geometrial people holding hands

Tabeua Kawai ni Kairaki ao ni Butimwaeaki

• N taai nako a kakaokoro aomata ae ko tekateka mangaiia n tain te taromauri.

• Tai katabea nanom n tarai tinanikuia aomata n nooria bwa aekakira raoi te aomata. (Ibukin rongorongon riki atuun te marooro aei, taraa “Ministering Is Seeing Others as the Savior Does,” Riaona, Tuun 2019, 8–11.)

• Kairiia tabeman n tain te marooro.

• Kaoiia tabeman ni bootakin te Ekaretia ke itinanikun bootakin te Ekaretia. Ko kona ni kairiia ni waaki ni kakukurei ake ko a tia ni bairei.

• Kakaea ao mwakuri iaon baika a tatangira ae taneiai te aba iai.

• Tai katoka am iraorao tii ibukina ngke e aki booraoi katein te aomata ma am kaantaninga.

• Ngkana iai te bwai ae onoti ae ko nooria iroun te aomata, kukurei n anne nakon ae ko na baka n aki nooria ke n totokoia.

• Kaota te tangira ao anga am taeka ae koaua.

• Karaua iangoia bwa tera nanona ae ngkana ti taekinna bwa te Ekaretia bon ibukiia aomata ni kabane, n aki tabe ma kabwakaia. Ti na kanga ni karaoa aei bwa e na koaua?

N taai nako e aki bebete namakinan te mweengaraoi ibuakoia aomata ake a kaokoro ma ngaira. Ma te kataneiai, ti kona n nakoraoi ni kunea te kakawaki n taian kabwaka ao ni kukurei n anganano aika a onoti are e uotia temanna. N aron ae taku Unimwaane Dieter F. Uchtdorf man te Kooram n Abotoro n te Tengaun ma Uoman, a kona kabwakara ni buokiira n riki bwa aomata aika a nakoraoi man kukurei: “Nakomai, buokiira ni mwakuri ao ni kakorakora te katei ni kamarurung, n akoi, ao n nanoanga nakoia natin te Atua ni kabane.”³

Kakabwaiaki man te Aki Katinanikuaki

E mwaing Christl Fechter nakon te kaawa teuana imwiin urubekean abana n te buaka. E tuai raoi bwaati te taetae aei ao akea temanna kaain rarikina ae kinaa, ngaia are n te moan tai, e namakina te tionako ao te maroaa.

Ngkai kaain te Ekaretia, e uota ninikoriana ao ni moanna n nanako n taromauri n ana uoote ae boou. E raraoma ngkai e rangi ni korakora ana ee are e na tuuka aia kan taetae aomata ma ngaia ke tao e na tiribureaki ngkai te aine ae tuai n iein.

Ma e kaitibo ma tabeman ake a aki taraa kabwakana ao ni butimwaeia nakoia raoraoia n aia kaomiuniti. A roko ma te tangira, ao n te tai ae e waekoa ni kunea bwa e a tabe n ibuobuoki n reireiniia kaain te Moanrinan. Ataei bon banna ni katooto n te butimwaeaki, ao te namakin n tangiraki ao ni kainnanoaki e kakorakora ana onimaki ao ni buokia ni kateimatoaa ana anganano nakon te Uea.

Bwaai aika a na taraaki

1. Taraa Alexa Lardieri, “Study: Many Americans Report Feeling Lonely, Younger Generations More So,” U.S. News, Meei 1, 2018, usnews.com.

2. Taraa Carly K. Peterson, Laura C. Gravens, and Eddie Harmon-Jones, “Asymmetric Frontal Cortical Activity and Negative Affective Responses to Ostracism,” Social Cognitive and Affective Neuroscience, waorium. 6, nambwa. 3 (Tuun 2011), 277–85.

3. Dieter F. Uchtdorf, “Believe, Love, Do,” Riaona, Nob. 2018, 48.

Ukoukori aika Mwaiti Riki

Ibukin iango riki tabeua, wareka “We Can Do Better: Welcoming Others into the Fold,” Riaona, Tebetembwa. 2017.

Tibwaua Am Taneiai

Kanakoa nakoira ae ko karaoia ngkai ko buokiia tabeman ke ngkai ko a tia n ibuobuoki nakoia. Nakon te liahona.lds.org ao kotea “Kanakoa te Rongorongo ke te Kukune.”

Karaoan Nanon Bwaai Ake Ko Reiakini

Titita Linda K. Burton, te Beretitenti ni Kabuta n te Bootaki n Aine ngkoa, e taku, “First observe, then serve” (Riaona, Nob. 2012, 78). Iriiran te reirei aei e kona ni buokiira ni karaoi taian uoote ao mwaanga ike a bane ni kairaki iai aomata ni kabane ao ni kainnanoaki. Aikai tabeua titiraki aika ko na iangoi:

• Ngke ti a rin n ana kateitei ara aro, ti kona n taratara nako ao n taraia naake e kairiia nakoira bwa kaain ara mronron n iraorao n te bong anne.

• N tabetai ao ti tukiia naake a kaokoro ma ngaira ke naake a rinanon te tai ae kaangaanga ibukina bwa ti maaku n taekina te bwai ae kairua. Aio e na karekea aia namakin bwa a kationakoaki, ni miimi bwa bukin tera ngkai akea ae taetae nakoia. Ntekateka irarikiia, ni kaota te tangira, ao n titiraki te titiraki ae koaua. N titirakiniia aia taneiai ma aia kaangaanga ao ko na kanga ni buokiia.

• N ara marooro ao n ara reirei n Tabati, ti kona n rineia ni kabonganai katooto ni kaotia bwa aomata n tatabemaniia ao utu n taabo aika a kakaokoro a kona ni maiuakina te euangkerio ao ni kukurei n ana kakabwaia.

• A kona kaain te kiraati ni kakabwaiaki n ae mwaiti ngkana taan reirei a kairiia kaain te aro n rinanin nako rooro, te aba, ao ana kaangaanga te utu. E mwaiti ae ti reiakinna mairouia kaain te Ekaretia aika a kakaonimaki ake a kaokoro aia taneiai ma ngaira.

• A kona taan reirei ni karekea te tabo ae mano ibukiia ni kabane bwa a na tibwauai aia taneiai ni maiuakinan te euangkerio. Ngkana iai te taeka ae tibwauaaki, e kona te tia reirei ni kaeka n te bwai are e a tia n taekinaki. Kaain te kiraati taraan ae kanga a namakinna bwa a bon onimakiniia ao ni mweengaraoi n tibwaua aia iango.