Bannan te Onimaki
Iona Wikaira
Kaikohe, Nu Tiran
Iona e tatangira te takakaro ae te waka ama—te taetae n Nu Tiran ibukin te waa ni kauaia. E tangiria Iona n nako tari, ni kararoa ma tabeaianga n ana tabo ni mwakuri.
E ngae ngke e kaitarai kakaewenako ngkai te tia tararuaia bure ngaia, e karekea korakorana Iona ao n teimatoa n rau rinanon onimakinan Iesu Kristo.
Christina Smith, tia rawetamnei
I a tia ni mwakuri bwa te tia taraia bure inanon itiua te ririki. I mwakuri n aia tabo bure n aine inanon teuana te ririki; ao I a manga kamwaingaki nakon te karabuti ae mwaane ni kabane kaina are I a mwakuri iai inanon onoua te ririki n nako.
Teuana mai ibuakon te rongorongo ae e riinga te nano inanon au tai ngke te tia taraia bure bon te tai are I noora te tina ae e a manga kaitibo ma natina. E tuai man noria natina inanon aua ke nimaua te ririki. Ko kona n noria man mataia ataei te ran ni mata ao te maraki man te maenako n ririki aika a bati. E rangi ni karoko nano te manga ikotaki, ma ngkai te tia tararuaia bure, ko na aki kaota ae ko rootaki iai. I kunea bwa e bon rangi ni kaangaanga. N na bae n tannako ao ni katoka nanokawakiu n aron ae akea te bwai ae riki. Ngkai bon te tina ngai, e rangi ni kaangaanga iangoana irou ae n a kitania natiu inanon ririki ao n aki kona n noriia, n taetae ma ngaiia, ke ni bon kaota au namakin nakoia.
Ngkai te tia taraia bure ngkoe, ko na riai n rangi ni korakora. Ko na riai ni kona ni kamanoko ao ni kaeti aron bwaai nako. N tabetai e kona n reke te kakaitara, ngaia are ko na riai ni matoatoa n tain am taetae nakoia tabeman. Riki inanon te tai are ko taetae ma te bure ao ni kakerikakii taian kakaewenako ao n tabetai waaki ni kaikuaki. Aio are ana noria tabeman aomata ao n taku bwa I rangi ni unun, te aomata ae I eti matoa, ma anne bon tiaki arou n tainako.
N te tabo ni mwakuri ao I namakina ae I katobibiaki n te aonaaba, ma ngkana I kitana te tabo ni mwakuri ao I mena ni mweengau ke n te taromauri, I kaokoro au namakin ibukina bwa I namakina te tamnei. Teuana te bwai ae moan te kakimwareirei ni maiuakinan te euangkerio bwa ko aki riai n riki bwa kain te aonaaba. Ko mena inanon te aonaaba, ma ko aki riai n raoniia ake tabeman n te aonaaba
I tatangiria ngkana e roko te bong ae te Tabati ibukina bwa N a bae n nako n taromauri ao ni kamwarakea maiun tamneiu ao n uringa te Uea ara Tia Kamaiu, Iesu Kristo. I tangira ae iai irou anne ni bon ti ngai. I kukurei ni beku n te Ekaretia ao bwaai ni kabane ake a reke man te euangkerio ibukira.
N te tai teuana, ao bon Ngai kain te aonaaba, ao I reiakinii reirei aika a mwaiti aika a matoatoa. I rangi ni kakaitau ngkai I a manga rangi ni kakaonimaki ao n tiku n ana euangkerio Iesu Kristo. I aki toki n iangoia bwa tera ngke arona bwa aomata n au tabo ni mwakuri a kona n namakina te kimwareirei ae I namakina ngkai I kaina te Ekaretia.
I kunea bwa ngkana a ataia aomata ake n am tabo ni mwakuri ae kaain te Ekarekia ngkoe, e na reke karineam irouia ao te Ekaretia ngkana a noria ae ko aki kakerikaka katein maium ibukina ngkai e kaokoro te tabo are ko mena iai. Ngaia anne bukina ae e kakawaki irou bwa N na keiaki ni kaota te banna ae tamaroa ngkai ngai temanna mairouia aika a Itiaki ni Boong aika Kaitira.
N aron taai aika a kakaokoro, I iango, “Tera te bwai ae e tangiria te Tia Kamaiu bwa N a karaoia?” ke “Tera aron ae e tangiria bwa N na karaoia ngkai I rinanon aei?” Inanon au tataneiai, I kataia n taraia bwa te bwai are I karaoia e katotonga aron are e na karaoia te Tia Kamaiu. Aio are e buokai n rangi n etieti ao ni iango ma te karaurau e nage ngke I mena ibuakon te kamangaongao n te tabo ni mwakuri ae matoatoa.
I rangi ni kakaitau ibukin au Tia Kamaiu ao Tamau are i Karawa ibukin taian kakaewekano ao kakatai ake I a tia n tokanikai iaoia n rinanon karekean te onimaki ao te kakoaua mai Irouiia. Ni katoa tai are I rinanon te kakatai ao I karaoa au tataro, I aki toki n namakina te rau inanou. I ataia bwa I aki kona ni maiu ngkana akea Ngaiia. I aki toki n namakina kairakiu ni baia ni bwaai ni kabane ake I karaoi.