Kairake n Ikawai
E na Aki Mwaninga Am Mwakuri
Tamnei iroun Getty Images
Tabeua te namwakaina n nako ao iai miiu ike, I tekateka n te taromauri ni kaintekateka ake mai buki n aron are I kakaraoia, ao akea nanou n ira buakon te waaki, e bitaki au taratara. I nooria bwa ibuakoia kaain te taromauri bon tabeman naba mitinare ake a oki imwain banen aia tai. I namakina te nano ni kan buokiia ngke I tarataraia. I ataia bwa tibwauaan te bwai are I rinanona e kona n riki bwa te kawai n ibuobuoki nakoia ao ni buokiia n teimatoa ni kawain te berita e ngae ngke iai te kaangaanga aio inanon te kawai.
Man te mii aio, Tamara are i Karawa e kaotia nakoiu bwa iai taben Nanona. E kakatonga n taian beku aika raoiroi ake ti anga ngke ti mitinare, n aki tabe bwa maanin ara tai ni beku. “E aki ribuaka te Atua ni mwanuokini ami mwakuri ma ami tangira are kam kaotia nakon arana” (Ebera 6:10). N au koroboki (taraa iteraniba 47), I tibwaua teuana te karaki man koroboki aika tabu ao baike a rinanona tabeman mitinare ake a oki imwain banen aia tai aika a kona ni buokiko n am tai n rinanon te kawai ae aki kantaningaaki man matoatoa aio. E kan irou aron Alex ni kabongana te karaki man ana Boki Moomon ni buokira n nooria bwa ibukiia naake a oki imwain banen aia tai ibukin kaangaanga n te aki tau, e teimatoa n iai te kaantaninga (taraa iteraniba 44).
N rongorongo man bwaai ake a ti maiu man te iti, ko na warekia bwa e kanga Emily n bita namakinan te aki rau n iango, maaku, ao akean te kaantaninga are e rinanona nakon te kimwareirei ae onoti man tabu. Ao Kevin, te kauntira ae e beeba, e anga iango bwa tera aroia kaain te utu ni boutokaia naake a rootaki ake a moantaai n oki.
E aki kakaawaki bwa tera bukin are ti oki iai imwain banen ara tai ma e kakaawaki riki bwa tera ae ti karaoia ngke ti okira mweengara. Man ana ibuobuoki te Tia Kamaiu, ti kona n kamaoaki, n rikirake, ao n teimatoa n karekea riki te kimwareirei n ara mwananga ae akea tokina.
Raomi ni Koaua,
Liahona Ficquet