Man ana Ibuobuoki Karawa

Bon te tibwanga ae onoti te kona n intawiuniia ni kabane kaain te Kooram n Abotoro n te Tengaun ma Uoman ni koroboki iaon te nakoa n abotoro ae tabu (taraa “Ngaira bon Taan Kakoaua,” iteraniba 12).

Imwiin kaitiboou ma Beretitenti M. Russell Ballard, te Bonomwi ni Beretitenti aia Kooram te Tengaun ma Uoman, I tanrikaaki n taraa nanon ana aobiti. E tekateka irarikin ana taibora, ni korea ana taetae ibukin te maungatabu ni kabuta. Boni ngaia te kabanea ni maan ni beku bwa te mataniwi ni Kabuta n te Ekaretia—e kamatoaki nakon te Moan Kooram n te Itingaun n 1976. E taraa ni kua ao ni korakora naba n te tai anne. “Ko uara?” e a tibwa titirakinai naba, n rimwiaki ma te reirei ae akoi ae: “Tai mwakuri korakora n te aro are ko a rangi ni kua iai.” E roko mairoun temanna ae e a tia ni kariaia te wewete bwa e na mwakuri inanon maiuna ni kabanea n ana mwakuri te Uea. te marooro ae kimototo aio e rangi ni kakaawaki nakoiu.

Naake Tengaun ma Uoman a weteaki bwa a na “kairi aron wakinan [te Ekaretia] n aba ni kabane” (Reirei ao Berita aika Tabu 107:33). Ma ngkana ko mena irarikiia, aia taratara e bitaki man te Ekaretia ni kabuta nakon te aomata are i mena i mataia. A roko nakon tabeia man nakoa aika a taraaki bwa a rianako kakaawakiia iroun te aonaaba, ma ngke I kitana aia aobiti, taeka ni kabwarabwaraia a titebo n taainako—a nanorinano man akoi.

“N tabetai I bon titirakinai, ‘I a kanga naba ni mena i buakoia mwaane aika a korakora aikai?’” E tuangai Beretitenti Ballard. Imwiina e kakoaua, “Man ana Ibuobuoki Karawa.” Au kaantaninga bwa ko kimwareirei n te kabwarabwara nakon nakoan te Abotoro.

Sarah Jane Weaver

Rongorongon te Ekaretia Eteta