2019
Mwakoro 1: Ikoikotaki ni Katea te Kambwana
Turai 2019

Mwakoro 1

Ikoikotaki ni Katea te Kambwana

Tengaa Aika Itiaki ni Boong aika Kaitira a rau n aki karongooa ngkai e eekoo bwanaan Lucy Mack Smith rinanon te tabo ni bootaki n te moan burooa i Nauvoo tembora ae e a kan tia karaoana.

Bon moaningabongin Okitobwa 8, 1845 te kateniua ao kabanean bongin ana maungatabu ana Ekaretia Iesu Iesu Kristo Ibukiia Aika Itiaki ni Boong aika Kaitira. N ataakina ae e nang aki manga reke ana tai n taetae nakoia Aika Itiaki—ai moarara riki ngkai a tia ni baireia bwa a na kitana Nauvoo ibukin mweengaia ae boou ae raroa nako maeao—e taetae Lucy ma te mwaaka ae taraan ae e na kaangaanga n rabwatana ae aki konamaki ae itibwi ana ririki.

“Ni uabwi ma uoua n Tebetembwa e kaotinakoi bwaatua mai iaantano,” e kaotioti, “ao bon te bwi ma waniua te ririki n te Moanibong ae nako ngke Iotebwa Timiti, ana burabeti te Uea—”1

E toki, n ururinga Iotebwa, natina te mwaane ae tiringaki ibukin ana koaua. A kaman ataia Aika Itiaki ake a mena inanon te ruu bwa e kanga ana anera te Uea ni kairia nakon taian bwaatua koora ake a taunaki n te tabuki i Komora. A ataia bwa e a tia Iotebwa Timiti n rairi taian bwaatua man ana bwaintituaraoi ao mwaakan te Atua ao ni boretiia te rekooti ae ana Boki Moomon. Ma iraman Aika Itiaki ake inanon te tabo ni bootaki ae a tia raoi ni kinaa?

E teimatoa n uringnga Lucy ngke Iotebwa, are n te tai anne ai uabwi ma teuana ana ririki, e moan tuangnga bwa e a tia te Atua n onmakinna ibukin taian bwaatua. E tabetabe nanona n te ingabong anne, e maaku rimwi e na oki man te tabuki ao akea te bae e uotia, n aron are e karekea aua te ririki mai imwaaina. Ma ngke e a oki, e waekoa ni kamaraua nanona. Tai karawawata nanom,” e taku. “A nakoraoi bwaai ni kabane.” Ngkanne e a anganna bwa e na anganiia taan raitaeka ake e a tia te Uea ni katauraoiia ibukin rairan taian bwaatua, ae niniria inanon te kawere, bwa te bwai ni kakoaua ae e a tia n tokanikai ni karekean te rekooti.

Bon tii tabeman taan kakoaua, ma bon angiina kaain te utu ae te Smith. Ngkai e riaon riki te bwi ma teuana te ngaa Aika Itiaki mai Amerika Meang ao Eurobe aika a maeka i Nauvoo, Illinois, te tabo are e ikotaki iai te Ekaretia inanon onoua te ririki n nako. Tabeman ibuakoia a bon boou n te Ekaretia ao e tuai reke aia tai ni kaitibo ma Iotebwa ke tarina ae Hyrum imwaain ae a katiiaki mwaane aika uoman aikai irouia taan iowawa n Tuun 1844.2 Anne bukina ngkai e kan taekina bukin te mate Lucy. E kan kakoaua ibukin wetean Iotebwa n nakoana ni burabeti ao tabeia ana utu ni Kaokan te euangkerio imwaain mwaingiia nako Aika Itiaki.

Ae riaon teuana namwakaina, taan karaoa te kakiriwe aika taan iowawa a tia ni kaurarakei mweengaia ma aia bitineti Aika Itiaki n taabo ni kamaeka aika a uakaan. Ibukin maakuia ni maiuia, angiina utu a birinako ni kamanoia i Nauvoo. Ma a rikirake taan iowawa ni korakora ao ni barongai aroia inanon wiiki n nako, ao n te tai ae waekoa ao e a riki te un ni kakiriwe imarenaia ma Aika a itiaki. Te aba ma te tautaeka, n te tai ae uarereke, akea te bwai ae a karaoia ni kamanoi inaomataia Aika Itiaki.3

N tii kakoauana inanon te tai ae riki aei imwaain ae a kakiriwea Nauvoo taan iowawa aikai, taan kairiiri n te Ekaretia a tia ni boraraoiakina taekan te rau ni kariaia kamwaingakiia Aika Itiaki man te tabo n tain te tiburing.4

Ni kairaki man te kaotioti mai ieta, Brigham Young ao tabeman kaain te Kooram n te Tengaun ma Uoman a baireia bwa a na kamwaingiia Aika Itiaki n ae riaon teuana te ngaa onobubua te kiromiita nako maeao, nako aon Rocky Mountains, itinanikun tian te United States. Ngkai te kooram n tararua n te Ekaretia, a tia kaain te Kooram n Abotoro ake Tengaun ma Uoman ni katanoata te babaire aei nakoia Aika Itiak ni moan bongin te maungatabu n tain te bwaka.

“Te Uea e bairea ana mwakuri ni kairiira nakon te tabo ae ti kona n inaomata riki ni mwakuri n ae rababa riki,” e katanoata te abotoro ae Parley Pratt, “ike ti kona ni kakukureira n reirei aika a itiaki ibukin te inaomata ao te katitebooaki.”5

E ataia Lucy bwa Aika Itiaki a na buokia ni kakoroa nanon te mwananga ngkana e rineia bwa e na nako. N te kaotioti ao a tuangaki Aika Itiki bwa a na bane n ikotaki n te tabo teuana, ao a baireia te Tengaun ma Uoman bwa a na kakoroa nanon ana kantaninga te Uea. Ma e a kara Lucy ao e kakoaua bwa e na aki teimaan maiuna. Ngke e mate, e tangiria bwa e na taunaki i Nauvoo irarikin Iotebwa, Hyrum, ao tabeman kaain ana utu ake a kaman mate, n raonaki ma buuna, ae Joseph Smith Sr.

Irarikin aei, angiia ana utu aika a maiu a maeka i Nauvoo. Tii nikiran natina te mwaane ae maiu, ae William, e a tia n riki bwa kaain te Kooram n te Tengaun ma Uoman, ma e aki butimwaea aia kairiiri ao n aki nako maeao. Natina teniman aika aine—aika Sophronia, Katharine, ao Lucy—a tiku naba imwiia. Ao ai aron naba ai natina te aine ae Emma, bun te burabeti ae e a mate buuna.

Ngkai e taetae Lucy nakoia kaain te taromauri, e kaumakiia taan ongora bwa a na aki raraoma ibukin te mwananga. “Tai bwarannano ao n taku bwa e aki kona n reke am waekon ao bwaai,” e taku. N aki tabe ma te maiu ni kainnano ao te bwainikirinaki, a tia oin ana utu ni kakoroa nanon ana tua te Atua ni boretia ana Boki Moomon. E kaungaiia bwa a na kakauongo nakoia aia tia kairiiri ao ni karinerine imarenaia.

“N aron ae taeku Brigham Young, kam riai ni bane ni kokoaua bwa rimwi ao kam na aki roko ikekei,” e taku. “Ngkana tao kam namakina te rawawata, kam na karekea te kaangaanga.”

E kabatiaa angiin ana marooro Lucy iaon taekan te utu, aron bwainikirinakiia ae moan te korakora i Missouri ao Illinois, ao kakatai ake a na roko ibukiia Aika Itiaki. “I tataro bwa e na kakabwaiaia ana taan kairiiri te Ekaretia te Uea, e taku te Tari Brigham ao ni kabane,” e taku. “Ngkana I a mate, I tangiria ni kaitibo ma ngkami ni kabane.”6

N Tianuare 1846, Brigham e kakaitibo n angin te tai ma kaain te Kooram n te Tengaun ma Uoman ao Kauntira aika Nimangaun, te bootaki are e tararuai taian tabeianga ibukin abanuean te Atua iaon te aba, n iangoa te kabanea n tamaroa ao ni waekoa ni kitana Nauvoo ao ni katea te tabo n ikotaki ae boou ibukiia Aika Itiaki. Heber Kimball, raoraona ae te abotoro, e tua bwa a na kaira te kambwana ae uarereke ibukiia Aika Itiaki nako maeao n te tai ae waekoa.

“Ikoikotaki ni katea te kambwana ibukiia naake a kona n tauraoi,” e anga ana kaetieti “bwa a na tatauraoi n te tai naba are a weteaki bwa a na mwananga nako ao ni katauraoa te tabo ibukiia aia utu ao ibukiia aika a kainnano.”

“Ngkana iai te kambwana ae moantaai n nako ao n ununiki n te tiburing aei,” e anga ana ota Orson, “e riai ni waakinaki man moan Beberuare.” E iangoia ngkana tao e na tamaroa te maeka n taabo tabeua ae e uakaan riki, are e na kariaiia bwa a na ununiki n te tai ae waekoa.

E aki kukurei Brigham n te iango anne. E a kaman tia n anga ana kaetieti te Uea nakoia Aika Itiaki bwa a na maeka irarikin Great Salt Lake. Te nei bon mwakoron te Great Basin, te boora ae bubura ni mwakoron te aba ae katobibiaki n taian maunga. Angiin te betin bon te aba ae mwauu man rereua ao bon te kakaewenako ibukin ribanaakina, are e a karika aki kukurein nanoia kaain Amerika ni mwaing nako maeao.

“Ngkana ti nako imarenan taian maunga nakon te tabo are e a tia ni baireaki,” e kamatata bukina Brigham, “a na bon akea te bakantang man aaba nako.” E ota Brigham bwa e a kaman maekanaki te mwakoro n aba irouia aika boon kain te a aba. Ma iai ana kantaninga bwa a na kona Aika Itiaki ni maeka ma te rau ibuakoia.7

Bwaai aika a na taraaki

  1. Historian’s Office, General Church Minutes, Okitobwa. 8, 1845; “Conference Minutes,” Times and Seasons, Nob. 1, 1845, 6:1013–14. Bwaninin ana ribooti Lucy n Okitobwa 1845 te kabwarabwara n te maungatabu, ma reitan taeka ni marooro, e tauraoi n Reeder ao Holbrook, N te Tabo n Taetae, 21–26. Atuun te marooro: Lucy Mack Smith

  2. Lucy Mack Smith, Rongorongon, 1844–45, book 5, [7]; Aika Itiaki, waorium 1, mwakoro 4 ao 44; Roroo, “Mwaitira te Botanaomata i Nauvoo?” 92–93. Atuun te marooro: Maten Iotebwa ao Hyrum Smith

  3. Solomon Hancock ao Alanson Ripley nakon Brigham Young, Tebetembwa. 11, 1845, Brigham Young Office Files, CHL; “Mobbing Again in Hancock!” and “Proclamation,” Nauvoo Neighbor, Sept. 10, 1845, [2]; Gates, Journal, volume 2, Tebetembwa. 13, 1845; Glines, Reminiscences and Diary, Tebetembwa. 12, 1845; “The Crisis,” and “The War,” Warsaw Signal, Tebetembwa. 17, 1845, [2]; “The Mormon War,” American Penny Magazine, Okitobwa. 11, 1845, 570–71; Jacob B. Backenstos to Brigham Young, Tebetembwa. 18, 1845, Brigham Young Office Files, CHL; Orson Spencer to Thomas Ford, Okitobwa. 23, 1845; Thomas Ford to George Miller, Okitobwa. 30, 1845, Brigham Young History Documents, CHL; taraa naba Leonard, Nauvoo, 525–42.

  4. To the Anti-Mormon Citizens of Hancock and Surrounding Counties (Warsaw, IL: Oct. 4, 1845), Chicago Historical Society, Collection of Manuscripts about Mormons, CHL; taraa naba Leonard, Nauvoo, 536–42.

  5. Kauntira aika Nimangaun, “Rekooti,” Tebetembwa. 9, 1845, n JSP, CFM:471–72; “Conference Minutes,” Times and Seasons, Nob. 1, 1845, 6:1008–11.

  6. Reirei ao Berita aika Tabu 29:8 (Te Kaotioti, Tebetembwa. 1830–A, at josephsmithpapers.org); Reirei ao Berita aika Tabu 125:2 (Revelation, circa Early Maati. 1841, at josephsmithpapers.org); Historian’s Office, General Church Minutes, Okitobwa. 8, 1845; “Conference Minutes,” Times and Seasons, Nob. 1, 1845, 6:1013–14.

  7. Kauntira aika Nimangaun, “Rekooti,” Tianuare. 11, 1846, n JSP, CFM:514, 515, 518. Atuun te marooro: Kauntira aika NImangaun