Tataro ma Filip
E maeka te tia korokaraki i California, USA.
Tera ae nanonaki bwa ko na “tataro ni kakaitau”?
“Tataro n tainako” (Reirei ao Berita aika Tabu 19:38).
Bon ana moan tai Josef n roko n ana auti Filip. E rangi n roko nanoia ni karaoi aia wanikiba man te katiboti. Ao a karanii naba n aron ae e ura te ai iaona. Ngke e a wewete tinan Filip bwa a nang katairiki, e iri naba Josef nakon te umwa ni kuka.
“N na karaoa te tataro,” e taku taman Filip.
Tera ae nanonaki n anne? E miimi Josef. E matakuakiniia Filip ma ana utu ngke a kotoi ramwaia, imwiina bwabwaaia, ngkane iteraia nakon te maing, ao manga te atai. E tuai man nonora te aomata Josef ae karaoa anne mai mwaina.
E arora nako baina Filip. E taratara nako Josef ao e noria nikiraia kaain ana utu Filip bwa a taubai ao ni kabaraki atuia. Akaraoa aia tataro? Anne nanon are “tataro ni kaitau”? e miimi Josef.
E aki tangiria Josef ni karawawata nanon Filip, ngaia are e a ana bain Filip. Taman Filip e ana bain Josef are teuana ao imwiina a moana aia tataro.
“Kakabwaiaira, O te Atua …”
Imwain ae a tekateka, Filip ao a na utu a manga kotea ramwaia ao bwabwaia n aron are a karaoia mai mwaina.
Ngke e a okira ana auti Josef, e titirakina tinana ibukin ana bong.
“E nakoraoi kanoan am bong ngkai?” E titiraki tinana.
“Eng,” e kaeka Josef ni karaurau. E rangi ni kukurei ni kanoan ana bong. E rangi n nakoraoi aia wanikiba, ao te hamburger e rangi ni kangkang. Ma iai te bwai ae e tabetabe nanona iai.
E karaua ni kaniia n taraia tinana. “Ko aki taetae n ae kanga ko raoiroi. “Iai te bwai ae riki?”
“I taku …”
E tiraua ana titiraki Josef! E teimatoa n iangoa aron te tataro arei. E aera ngkai e rangi ni kaokoro ma aron aia tataro ana utu?
“Mom,” e titiraki, “e kanga aron am tataro imwain ae ko kaina te Ekaretia?” E tuanga Josef aron aia tataro ana utu Filip.
“E tara n ae bon kaain te Katorika, n arou mai imwaina,” e taku Tinau. “A karaoa katotongan tamnein te kaibangaki ma baia. Taraia bwa kanga tarakin te kaibangaki? Bon te kauring bwa e mate Iesu ibukira.”
E wingare Josef. “Ngaia are Filip e kakoaua naba Iesu?”
“E koaua anne,” e taku Tinana. “Ko uringnga bwa tera ae taekina taman Filip n tain te tataro?”
E bae ni iangoia Josef. “E karabwa te Atua ibukin te bwai n tangira are E anganiira … ao e taekina taekan Kristo!”
“Ko noria?” E kaeka tinana ma te moangare. “Ti bon aki rangi ni kaokoro. I kukurei bwa ko kona n tataro ma ana utu Filip.”
Tabeua te bong imwiina, e roko Filip bwa e na takakaro. A karauia n takakaro i tinaniku ngke e wewete Tamau bwa ti nang katairiki. E taka reburebu biroton Josef ngke a biri nakon te umwa ni kuuka.
“I a rangi ni baki!” e taku Josef.
“Ngai naba,” e taku Filip.
A bane n tekateka ni katobibia te taibora. E tekateka Filip irarikin Josef. E karaoa kanikinaean te kaibangaki Filip ao e kanakoa baina n ana bain Josef.
“Aio aron ara tataro ni mweengara,” e taku Josef. “Ti booti baira, kamatui matara, kabarakii atuura, ao ti tataro.”
“Ngaia anne arona?”
“Ngaia anne.”
“E bebete,” e taku Filip.
E kamatua matana Josef ao e ngare. I kukurei bwa e kona n tataro ma raoraona.
Iai raoraou n te reirei aika kaain te Katorika, ao te Muslim, ao bon raoraora aika a rangi n tikiraoi bwa anne bukina ae e tangiriira Iesu bwa ti na karaoia nakoia tabeman.
Elizibeth A., ana ririki 8, West Midlands, England