Au Bong ni Mwakuri ae te Kabanea n Tamaroa!
Iroun Unimwaane Joni L. Koch
Man te Itingaun
N te tai are ko reiakina iai tangiran ao kakaawakin te mwakuri, ko na kunea naba nnen te kimwareirei.
Tamnei iroun Getty Images
Tabeua te ririki n nako, I mena n te auditorium n te Churchhill college n ana Universtiy Cambride i Engiran ibukin ana bwabwaro te kambwana are I mwakuri iai. N te tai anne, e reke au tai ni butimwaea te kaniwanga mairoun ana beretitenti ni kabuta ao ana CEO te kambwana aio ao n tei ibukiia kaain au tiim ibukin ara mwakuri ae rianako tamaroana are ti karaoia n te ririki anne.
Ngke taan kairiiri man taabo aika a kakaokoro n te aonaaba, ake a tei ibukiia 80,000 taan mwakuri, a uboubo ma ni kamoamoa ara tiim ibukin ara tokanikai, I taku, “Au bong ni mwakuri ae te kabanea n tamaroa!” Te namakin n te tai anne e bon rangi ni kakukurei.
Kariki ae Ibuobuokaki
Ma ngkanne e oki au iango nakon au moan bong ni mwakuri 40 te ririki n nako. Iai ana tabo ni kariki tamau ao e kakariki man katokai n taian mwakete aika uarereke n ara kaawa i Brazil Maiaki. Ngke te kairake n ataei ngai, I bubutia tamau bwa e na kairai ni mwakuri. N te bong teuana n tokin te tai ao e a kairai!
Tinau e itua au nangoa n eiburon ae mainaina ae uarereke ao bwaran te tia kariki ibukiu, ao ngai ma tamau ti nako n te tabo ni karao kariki. Ngaira, ti kaboboa man katauraoa te burawa, ti kabonganai baira ni karaoi nakon tein te kariki, ao ti karini inanon ara ainumwuum ae te buriki. Ngke e a mwai te kariki, ti kabongana te kai ae abwabwaki n anaa iai te kariki. Ti tataninga tabeua te teekan, imwiina ao ti a kana teuana te mwakoro ni kariki are e bue. E rangi ni kangkang!
Ngke I uringa aio, I motikia bwa karekean te kaniwanga n te Cambridge bon au kauoua n tamaroa ni bong ni mwakuri. Te kabanea n tamaroa man kakukurei ni bong n te mwakuri e bon riki n te tabo ae mangori riki: te tabo ni kariki ae uarereke ao akea taan mataku ke aomata aika a teirake n uboubo iai. Bon ti ngai ma tamau. N te bong anne, e reireiai bwa N na tangira man ataa kakaawakin te mwakuri ao e buokai n namakina te kimwareirei man karaoan te bwai man ae uarereke rinanon au mwakuri ao korakorau n oin baiu. I reiakinna bwa te mwakuri korakora e nakoraoi nakon te rabwata ao te tamnei.
Te mwakuri bon te Kakabwaia
Ngke te Uea e tuanga Atam ao Ewa, “Ko na amwarake n te amwarake ma maononi moam” (Karikani Bwaai 3:19), e taraa n ae E katuaiia. Ma ni koauana, E anganiia aia tai n namakina te kimwareirei ao tamaroan te toronibwai, ni karekei baike a tangiri man kainnanoi.
E mwaiti iroura ae a taraa te mwakuri bwa tii te anga ni karekean kainnano n te maiu n rabwata ibukira ao ibukiia ara utu ke tao te anga ni karekea kinakira ni karekean te mwakuri ae rietata. Ma ae kakaawaki riki, Te Atua e tangirira bwa ti na mwakuri bwa ti aonga ni karekea te kukurei n ara tai ni katiai taabe, ni karaoan baika a boou, ni iango man katamaroaira man are iai ngkai, ao ni katamaroa te tabo are ti maeka iai.
N taetae n reitaki ma te maiu n tamnei, te maiu ae kabotoaki n te euangkerio e airi ma te mwakuri n taainako. E a tia n taekinna Unimwaane D. Todd Christofferson bwa, “Te Maiu ae tabu e kaonaki n te mwakuri, tabetai e okioki, n tabetai a mangori, n tabetai e aki mwannanoaki ma n tainako te mwakuri ae rikirake n tamaroa, ae karekea te rau, ae kateimatoaa, ae kaunganano, e ibubuoki, ae ukora te tamaroa riki.”1
N am tai n ataei, tao ko titirakinaki, “Tera nakoam ngkana ko ikawai?” N am tai ni kairake, te titiraki anne e na bae ni bitaki nakon, “Tera ae ko na kamatebwaia n te reirei ae rietata?”
Nanomwaaka, Karinerine, ao te Kaataninga
Tera te mwakuri are ko na rineia, tera aekakin te mwakuri ae ko na mwakuri iai, karaoa am mwakuri ma te nanomwaaka, karinerine, ao ma te kaantaninga. Ko riai ni mwakuri korakora ao ni kataia n tainako ni karekei am bwai aika a rianako tamaroaia. Karekean te anua aei nakon te mwakuri e buokiko naba ni kateimatoako ni karekea te rau n te maiu n rabwata, n te iango, ao n te tamnei. Te kona ni mwakuri bon te kakabwaia mairoun te Uea. Ngkana ko reiakinna ni kakatonga man tangira te mwakuri, ko na kunea te kukurei ao te kaataninga ae reke man te toronibwai.
I teimatoa ni kona n ongo te uboubo ao taeka ni kaunganano ae roko ma irouia taan mataku n te University of Cambridge, ma ae rangi ni kakaawaki riki irou bon uringan au bong n te tabo ni kariki ma tamau ao boin taian kariki ngke a otinako man te ainumwuum.