Kairake n Ikawai
Ngkana E Moantaai n Toki Am Mition, Tai Bwarannano
E maeka te tia korokaraki i Utah, USA.
E aki kerikaki kakawakim ngkai ko moantaai n okira mweengam man am mition.
Kamataata n te tamnei iroun David Green
Ngkana ko wareware n aio, ko na bae ni kaman ataa aron te rawawata ae korakora ae e na kona n reke man te moantaai n oki man te mition. Kairake n ikawai ake a beku ana rinanon te korakai n rabwataia, kaangaanga ni marurungin te iango, kaangaanga aika a karina n te aba, te raraoma ibukin te kororaoi, te aki nakoraoi ma tabeman ae moan te kaangaanga, ke aki iran nanon tuan te mition, are e a karika kitanakin te mition ni moantaai imwain te bong are e toki taina iai.
N aki tabe ma tao tera bukina, te Atua e aki tangiria bwa te kaangaanga aei e na kamwaukiua Natina ni maiun tamneia. Ngaia are a na kanga mitinare ake a moantaai n oki ni waki rake man te aeka ni bitaki aio? Ao a na kanga karo, taan kairiiri n te Ekaretia, ao ake a tangiria ni buokiia?
Te Mitinare man Ana Boki Moomon
Teuana te karaki man ana boki Aramwa e anganira aron te katooto ae e na ibuobuoki. Te burabeti ae Aramwa e kaira waakin te mwakuri ni mitinare nakoia Tioromwaite ake a bubuaka, n raonaki ma tabeman ake a onimakinaki. Temanna mai buakoia, bon natina ae Korianton are e, “ki[tana] te mwakuri ae tabu, man nakon te aba are Tiron i buakon tian abaia Reimwanaite, n rimwin te kabekaau are Itabera” (Aramwa 39:3). Ao ibukin anne, Aramwa e a anga te kaetieti ae matoatoa nakon Korianton ao e weteia bwa e na raira nanona, n taku, “I aki kan maan n taetae iaon am bure, bwa e na maraki iai tamneim, ngke arona bwa e aki raoiroi aio ibukim” (Aramwa 39:7).
E butimwaea kaetakina Korianton mai iroun tamana ma te nano ae rau, n raira nanona man ana bure, ao n oki ni beku bwa te mitinare ibuakoia Tioromwaite n “taekina te taeka ma te koaua ao taua raum” (Aramwa 42:31). Te rongorongo e reitinako n taekina bwa imwiin taetaen Aramwa ma natina mwaane, “natin Aramwa mwaane [Tiburon ao Korianton] a waaki ibuakoia aomata, n tataekina te taeka nakoia” (Aramwa 43:1).
Oki ma te Konabwai
Tera ae ti reiakinna man te rongorongo aei? Te moan, te mitinare are e moantaai n oki—e ngae ngke e kona n totokoaki—iai ana konabwai ni kakoroi nanon bwaai aika a korakora. Tao e a tia ni karaoa te kairua ae moan te korakora Korianton, ma e bon waaki nako ni kakoroa nanon te mwakuri ae korakora. Ai arona naba, e ngae ngke mitinare ake a moantaai n oki tao ibukin oin aia waaki a na riai n aki katikua irouia ae a urua aron konabwaia ni maiuia n tamnei. E reiakina ae bati Korianton mai imwiin ana kairua ao e roko ni katea abanuean te Atua n anga aika korakoa, ao te aekaki ni konabwai anne e tiku inanoia aomata ni kabane e ngae ngke iai irouia namakinan ae a tia ni kabwaka.
Te kauoua, ti reiakina kakaawakin ana mwakuri temanna inanon maiun te mitinare are e moantaai n oki ni manga kamarurungan maiuna n tamnei. Aramwa—are taman Korianton ao te tia kairiiri n te nakoanibonga—e reiakina Korianton ma te matoatoa ma ana koaua iaon ana konabwai ni kona ni kakoroa bukinakina ibukin maiun tamneina. Ao iroun Korianton, te rekenikai ibukin te aki ongotakea iaon te mition e na roko, ma te katuaeaki e na riai n airi ma te tangira, te kabwara bure, ao te akoi (taraa Reirei ao Berita aika Tabu 121:41–44).
Okirikaki ni Kamarurungaki
Te rongorongo aei ae e karekea te unga n nano nakoia mitinare ake a moantaai n oki e reitinako taekinana n taai aikai. Marshall, are e moantaai n oki ibukin kakaewenako ake a kaineti ma marurungin rabwatana ao ana iango, n tabetai e namakina te nanokawaki ibukin kaangaanga nakon marurungina ao aki konabwaina i bon irouna are e a tukia man karaoan ana mwakuri ni mitinare ae bwanin taina. Ma e ngae n anne, e namakinna bwa a bon rangin ni uaana ana mwakuri.
“Ngkai mitinare ngaira, ti bon aki kororaoi,” e taku Marshall. “Ti bon kai rootaki n te karirii, ti bon kona ni karaoa te bure. Ma aki nakoraoim bon ngaia akanne are e tangira Tatan bwa kona katurua n am iango—n namakinna bwa am anga karea a aki butimwaeaki iroun te Uea bukina bwa n taai akanne ko bon aki riki bwa te mitinare ae tamaroa.”
E kakoaua Marshall bwa te Uea e tangiriia mitinare bwa ana ataia ae E kukurei n te beku are a karaoi, e ngae ngke mwakuri akanne a aki nakoraoi karaoakiia n aron are ko rineia ke are ko mena inanona.
E a tia n reiakina Marshall ni butimwaea ao ni kamarurungaki man karaoan bwaai ake a na buokia n namakina kaaniakina nakon Tamana are i Karawa ao Iesu Kristo.
Okirikaaki n Rairannano
Temanna te mitinare, are e beku i Colorado, USA e kaokaki nakon mweengana man ana mition ibukin kaetan maiuna ao e kamaunaki arana man te Ekaretia, ma e a manga bwabetitoaki imwiina. “Okiran mweengau e bon rangi ni matoatoa,” e taku. “I namakina te bua ao akean au iango. N tabetai, te bwai ae matoatoa ni mwakoron te oki bon [ukeran] kakorakoraau bwa N a teimatoa n nanako n te taromauri, ni wareki koroboki aika tabu, ao te tataro. Bwaai aika a bebete bon ngaia aika a rangi ni matoatoa.”
Ma e kunea te korakora man aia boutoka raoraona ao ana utu ao ni mwakurian te rairannano.
“Karaoan kouru, te marooro ma au bitiobi, ao te nako n te tembora ngke I a tauraoi bon ngaai aika a rangin ni buokai ni kaaniiakiu ma Tamau are i Karawa,” e taku. “I uringi taai ngke I a aki kona ni marooro ma au bitiobi ke ni kakoroi nanon tabeua kouru; te tia kakaitara e a bon mena naba ikekei, ni kaririai.”
Kamarurungana e riki raoi man “ururingana n tainako are iai Tamau are i Karawa are e tangirai ao e tangiria bwa N na kukurei. Karekean te koaua iaon Ana Mwakuri ni Kamaiu te Tia Kamaiu ao te rairannano, ti kona ni kaniiaki ma te Atua n aki mutiakina ae tao raroara ngaira ma Ngaia.”
“N uringan au bong n tain au mition,” e reitianako, inanon namwakaina ngke e beku imwain te tai are e a kaokaki nakon mweengana, “I namakina ae kanga bon teuana te taneiai ae tamaroa are I a tia n rinanona. I reiakini bwaai aika a mwaiti, ao e ngae ngke e aki riki n aron are I kantaningaia, I a tia ni kona n nori naano aika a bitaki bwa ibukin te euangkerio. I karaoi kairua, ma au koaua e a tia n rikirake ni korakora ngkai I keiaki n raira nanou ao ni waaki nako.”
E tangiria bwa te koraki ake a oki ni moantaai ibukin aia rinerine a na ataia bwa “iai te kaantaninga ao te kawai n reitanako are imwiina. Te oki nakon mweengam bon te moan mwaneka nakon te rairannano. N te tai are ko rinanon te kawai n rairannano aei, e na rangi ni mwaiti ae ko karekea. Te rawawata are e taoniko e na tabekaki. Bon akea te namakin ae tamaroa riki nakon ae ko irii tuua.”
Tangiriia Naake a Moantaai n Oki
Mitinare aika uoman aikai ake a moantaai n okira mweengaia a katuruturua aron kakawakin aia tangira ao aia boutoka raraoia ao aia utu mitinare ake a moantaai n oki.
“Katikuia i bon irouia,” e taku Marshall. “Ma taraia bwa ko aki raroanako mai irarikiia, ibukina bwa e kona ni karekea te bwarannano. Riki bwa raoraoia.” Man te kakauongo nakon te Tamnei, ti kona n noori kainnanoia ao n ataia bwa ningai ae ti na anga iai ara ibuobuoki ao ni karinea nanoia ni kan tiku i bon irouia.
“Bon ti tangiriia,” e taku te mitinare are e beku i Colorado. “Kaungaia bwa a na aki toki n ururinga ana mwakuri ni kamaiu Iesu Kristo.”
Aron aia butimwai tabeman nakoia mitinare ake a moantaai n oki e na bon karika te bitaki irouia ake a bwaka ni kekerikaki ibukin mamaia ke ni waaki nako n te Ekaretia ma te onimaki. E rangi ni kakawaki, ngkanne, bwa ana butimwaeaki n aki motikaki taekaia.
N aron Korianton, mitinare ake a moantaai n oki iai konabwaia n eutiiarake man aroia are a kananoanga iai nakon te riki bwa tabonibain te Uea aika korakora.
Karekean te kaantaninga n Ana Babaire te Atua
Unimwaane Jeffrey R. Holland man te Kooram n Abotoro n te Tengaun ma Uoman e anga te karaunano nakoia mitinare ake a moantaai n oki. “Ngkana iai ae e titirakiniko bwa ko a tia ni beku n te mition, ao ko na kangai eng,” e taku. “… Kawakinna i inanom te ibuobuoki are ko a tia n anga. Kakaitau ibukin te tai are ko a tia ni kakoaua iai, n tia ni beku n aran te Uea, n tia n uouota te baeti are te ara ni mitinare. … Taiaoka, taiaoka teimatoa n iangoia bwa ko kanga ni moantaai n oki nakon mweengam; tai iangoia ae akea bonganam ke aki koro nanon am iango.”1
Nakoia te koraki ake a moantaai n oki ibukin te bure, uringngi taeka aikai mai iroun Titita Joy D. Jones, te Beretitenti ni Kabuta n te Moanrinan: “Ngkana ti bure, a kerikaki kororaoira, ma tiaki nanona bwa ai akea bonganara!”2 E taekinna ma te koaua bwa e na buokiira te Atua ni karikirakea onimakinara i bon iroura inanon taai ni kaangaanga ngkana ti nakoIna.
Te rongorongo man Ana Boki Moomon, mai irouia mitinare ake rimoa ake a moantaai n oki, ao mai irouia taan Kairirii n te Ekaretia bon ti tearona: Tai bwarannano, ibukina bwa iai ana babaire te Uea ibukim ae korakora riki nakon ae ko kona n iangoia. Nakoia ake a tabe ibukiia mitinare aikai, am kaeka ibukin okiran mweengaia e na karekea te bitaki ae korakora ni buokaia ni kamarurungakiia ao ni kaokan aron aia konabwai. Uringnga bwa Ana Mwakuri ni Kamaiu Iesu Kristo e kona ni kamaoi ikuaki—ni ikotaki ma ake a moantaai n oki man aia mition.