Boutokakiia Mitinare Ake a Moantaai n Okira Mweengaia

Iroun Kevin Theriot, PhD

Te Mwakuri n Ibuobuoki ibukin te Utu ibukiia aika a Itiaki ni Boong aika Kaitira

Kaetieti ibukin kaungaan te kamaiu irouia mitinare ake a moantaai n okira mweengaia n aron are e kantaningaaki.

Teuana te karaki ae moan te kakaongora man ana Boki Moomon bon karakinaia ana taanga ni buaka Ereman aika 200 mwaitiia ake a bwaka n ikoaki n te buaka (taraa Aramwa 57:25). I taku bwa iai baika a titebo imarenaia taanga ni buaka aika 200 aikanne ma mitinare ni boong aikai ake, ni bukina aika mwaiti, a moantaai n okira mweengaia n aron are e kantaningaaki.

E ngae ngke ake 200 a okira mwengaia ma te nano ae moan te ninikoria, a kuneia i bon irouia bwa a uotaki nako man te marae ni buaka. Au kantaninga bwa a noriia i bon irouia bwa a ninikoria, ngkai a tia ni kabanea aia kona, ma n au katautau a tia n namakina te raraoma i bon irouia n aron are ngke a titirakinaki bwa bukin tera a aki kamanoaki iroun te Uea n aroia raoia ake tabeman.

N aron ana taanga ni buaka Ereman, mitinare ake a oki ni moantaai man aia mition a tia ni mwaninga te koaua are a bon anga nanoia ao a nakon te “buaka,” ma te ninikoria n anga aia kabanea ni kona. A katauraoaki ibukin aia mition ao a kaonaki ma te onimaki ae korakora ao te nano ni kan beku ibukin te Uea. Ngke a “bwaka n ikoaki” (rinanon, te katooto, kaangaanga n te aoraki n rabwata ao n te iango ke riaoan te tua), aki toki n iangoa te bwai ae aki kakoroa bukina ao n namakina te un, te aki rau, ke te bwarannano. A kona n titiraki iaon te kairi mai ieta are e kairiia bwa a na nako ni mitinare. Mitinare aika a oki aikai a kona n raraoma n aron aia taratara aomata ibukiia ke e kanga ana taratara te Uea ibukiia. A kona n namakinna ae titebo ma a tia ni bwaka ke n aki butimwaeaki ao a kona ni bairea aroia n te aro ae aki raoiroi.

Mitinare ake a moantaai n oki n aron are e a tia ni baireaki a kainnanoa te katiteuanaaki n aia ibuobuoki utu, raao, taan kairiiri, ao kaain te uoote bwa a na buokiia ni “kamaiuia.” Aikai tabeua kaetieti ibukiia mitinare aika a oki ao aia utu, taan kairiiri n te Ekaretia, raoraoia, ao kaain te uoote.

Ibukiia Aika Mamaten Nanoia: 6 Bwaai aika Kam Kona Ni Karaoi ni Buokia Ni Kamaiuia Mitinare Aika Oki

Kawariia ma te tangira ni karau nanoia, kaungaia, ao n tabeakiniia mitinare n tatabemaniia ake a oki ao ana utu teuanne ke neienne n aron are ko na karaoia nakoia taan buaka ake a bwaka ni ikoaki n tain te buaka. Karabwaia ibukin te ibuobuoki are a tia ni karaoia, kaungaia bwa a na ti iangoa te bwai ae a tia ni karaoia, tiaki te bwai ae aki karaoia.
Taetae nakon teuanne ke neienne bwa te “mitinare ae bane ana tai” ao tiaki te “moantaai n oki” ke “te mitinare ae moantaai ni kamotirawaaki.” Taeka aika raraoi a kona n ibuobuoki ma te kamaiuaki ao te kaokaki ae kainnanoaki.
Kakauongo nakoia bwa ko aonga n ataia bwa tera te ibuobuoki ae ko kona ni karaoia.
Boutokaia aia karo. E kona n riki anne bwa teuana mai buakon bwaai aika kakawaki ni kaungaa te waaki ni kamaiu ibukin te mitinare. Karaurau n aki kamwinibaea kainnanoia kaaro n te rawawata are a rotaki iai ibukin te mitinare ae oki.
Ukoukora te reirei irouia taan rabakau ngkana e kainnanoaki. Taan rabakau iaon marurungin te iango e kona ni buokia mitinare ake a oki ni bita maiuia ni mweengaia ao ni buokiia ni kaokiia nakon aron maiuia. Ngkana e tauraoi iai, Mwakuri n Ibuobuoki n Ana Utu te LDS e anga nakon onoua te tai n reirei ae aki kaboaki ngkana e kainnanoaki ibukiia mitinare ake a moantaai n oki.
Ukora kairam n te maiu n tamnei. Tai kakeaa bonganan mwaakan te tataro. Tataro ibukin te kawai bwa ko na kanga ni karaoa te kabanea n tamaroa n ibuobuoki ibukiia ao ni kakoroi nanon kainnanoia.

Ibukiia Mitinare aika Oki: 5 Koaua Aika Ko Na Uring Ngkana Ko Kamaiu

Te Atua e tangiriko. Ngaira ni kabane ti bane n rinanon te bwaka n taai aika kakaokoro inanon kawaira ni maiura ae mamate aei. Te onimaki iroun Iesu Kristo tiaki te bwai n aoraki ni kaitaraa te kaangaanga—bon te tua are e kona ni buokiko n tokanikai iaona. Ibukin Ana angakarea ni kamaiu, iai mwaakan Kristo n aki tii kaitiakiira man ara bure ma ni katauraoa naba te rau, te mataata raoi, te kamaiuaki, ao te buokaki. (Taraa ana marooro Unimwaane Jeffrey R. Holland n te maungatabu ni kabuta, “Like a Broken Vessel.”)
E reirei taekan te kamaiuaki booki aika tabu. Te Atua e taetae rinanon te Tamnei ae Raoiroi, ao teuana te kawai ae ti kona n namakina te Tamnei ae Raoiroi bon rinanon ara kamatebwai ni koaua ao maiuakinan reirei man booki aika a tabu. Wareka taekaia ana taanga ni buaka Ereman, ao tabeman riki ake a bwaka n ikoaki inanon mwanangaia n te maiu aei, ni kakorakoraa am atatai. Tarai katooto riki tabeua bwa e kanga Tamara are i Karawa n ibuobuoki nakon ao ni kamaiuia naake a motikia bwa a na Iria n taai aika nako.
Te mwakuri n ibuobuoki e buokiko ni kamaiu. E tangiria te Atua bwa ko na “ingainga” ni kan karaoa ae raoiroi (taraa Reirei ao Berita aika Tabu 58:27) ibukina bwa anne ae na buokiko ni kamaiu. Taraia taberman ao tataro ibukin reken te tai ni buokiia tabeman.
E kona te tataro ni karabaaba am atatai. Kaota am kakaitau nakon Tamara are i Karawa. E tangiria n ibuobuoki n te kamaiu. Bubutia bwa E na kakorakorako ao ni buokiko ni kinai bwaai aika E a tia ni kaman karaoi ni kakabwaiako ao ni kamaiuko ao ibukin naba te korakora ao ni kakaai kawai ni kakabwaiaia tabeman.
Tabeman a na kona n aki oota. Tiaki ni kabane aomata aika ana ataa am kaangaanga, ao a na kona n taekin bwaai bukina bwa aki oota. Ma tai kariaia baikannebwa a na kabwaraa nanom! Ti iangoia ni kaota am kakaitau ibukiia naake a kakorakorako, ao tataro ibukin te buoka ni kabwarai aia bure tabeman ngkana aki ataa am kaangaanga.