2019
Kamatebwai, Warekia Riki, Tataro. Kaokia Riki.
Turai 2019

Kamatebwai, Warekia Riki, Tataro. Kaokia Riki.

Iroun Mario Días Alonso

E maeka te tia korokaraki i Cautín Province, Chile.

N akean te scholarship, I aki kona n reirei n te College.

Tamnei
study, read, review, pray

Kamatataaki n te Tamnei iroun Adam Howling

I Chile, ngkana ko na reirei n te college, ko riai ni karaoa te ukeuke ibukin te karinrin nakon te iniwetiri. I tangiria n anaa te intiniia n te kuura n reirei ae rietata ae raroa ma te tabo are I maeka iai. E na bon bobuaka, ngaia are au kouru bon karekean te bwii are mai ieta ae kona n reke n te ukeuke ibukin te karinrin bwa I aonga ni karekea te tikaoratibu n te bwi ae rianako raoiroina.

I ataia bwa te tabo raa ao tera ae N na kamatebwaia, ao I ataia bwa tera ae N na karaoia bwa e reke irou aio. I moana au katauraoi imwain te ukeuke. I kamatebwai, wareware, ao ni manga rinanoa riki au bwai n reirei, ma tain te kataneiai n ukeuke, ao I aki karekea te bwii are I kainnanoia. I rairaki nakon Tamara are i Karawa n te tataro ao ni bubuti nako Ina ibukin te rabakau ae rietata riki ao bwa e na karababa au ataibwai bwa I aonga n roko n au kouru. I tataro ibukin aei ni katoa bong ao e kaania teuana te ririki aio. I nako n ira te kiraati ibukin te katauraoi ae onoti, ao I kabaeara n te reirei are e buokia aomata n aia katauraoi imwain te ukeuke.

I kakaonimaki n au kamatebwai ni koroboki aika tabu ni katoa bong, ao E aki bwaka au bong ni kaean te tiemenari. I karaoi ni kabane tabeu n te nakoanibonga ae te Aaron ao I aki kakamatebwai n te tabati, n aki taraia bwa mwaitira are I kamatebwaia n te wiki anne. I ataia bwa te Tabati bon ana bong te Uea, ao I tangiria ni karinea n te kawai are a reireinai au karo. I ataia bwa I aki kan kabuaa ana kakabwaia Tamara are i Karawa ibuku, riki n te tai are I bon rangi ni kainnanoia iai. E ngae n anne, E aki roko au bwii n are I kainnanoia n au ukeuke ni kataneiai.

Au utu ao ngai ti tataro man aki mamatam, ao tamau e anganai te kakabwaia. Ma te katauraoi n te tamnei aio ao au katauraoi ake tabeua, I karaoa te ukeuke. I aki ti karekea te bwii are I kainnanoia, ma e riaon are au kouru, au bwii bon teuana mai ibuakon bwii aika rietata n te numera. I karekea te tikaoratibu ao bwaai ake I kainnanoi, ao e reke au tai ni kamatebwai n te reirei ae rietata are I rineia.

Ma ngke I uarereke, I reiakinna bwa ngkana I karaoi bwaai ni kabane are I kona ao ni katabea moa nanou n tabeu n te aro, ngkanne Tamara are i Karawa e na kakabwaiai. Bwaai a na aki riki n aron are ti kantaningaia iai, ma E na tabeakinira te Atua. I ataia bwa ti man Ana ibuobuoki are a koro iai nanon bwaai ni kabane.