Mara te Bwaeoniia
E maeka te tia korokaraki i Texas, USA.
Okitobwa 2018, Phnom Penh, Cambodia
E kanimwa batinin ana kamumun Mara ao e tiroia n te kirati. E tara ni kamanga ae ko kunnikaiko ni kunikai n taromauri n te Kaonobong, ma bon te Kaonobong ae onoti aei. Bon tain te maungatabu ni kabuta!
“Ko rangi ni kariaria nakon aia tetere aine?” E titiraki Mak (Te Tina). E kabaitia ni komwia iran Mara, n rangi ni karaurau. “I tangiria bwa ko na rangi ni kakauongo n aron are ko kona.”
“Eng! Au kaantaninga bwa a na taekinii rongorongoia bwaeoniia!” E tangirii bwaai aikanne riki Mara.
“Tao are a na bon taekini,” e taku Mak. “Ko ataia ae tamam bon te bwaeoniia?”
E a nanououa Mara. Tamana e bon tuai man kokii taian aenika.
“E kanga n riki bwa te bwaeoniia?” e titiraki.
E katoutoua atuna Mak nakon te wintoo, ni kaitara te karaanga. “E tabe n akawa ikekei ngke e a kaitibo naba ma mitinare. Ngaia bon te moan aomata man ana utu ae e bwabetitoaki ,” e taku Mak. “Anne are e riki iai bwa te bwaeoniia! Ti a nako ni kakaea tibum.”
Yiay (te tibu te unaine) e tataningaiia n te katangaina. A bane ni maeka n ikotaki Mara ma ana utu ao tibuna. E ibuobuoki Yiay n tararua Mara imwiin te reirei ngkai a mwakuri ana karo. E a tei ngkai Yiay irarikin te rebwerebwe, te rebwerebwe n aine are a totoka iai n nakon te kaawa.
“E a bon tiba roko te Ekaretia i Cambodia inanon 25 te ririki,” e taekina anne Mak nakon Mara ngke e kauka te mataroa ao ni koka te rebwerebwe nako nanon te kawai. “Nanona ngaira ni kabane bwaeoniia. Ao ngkoe naba!”
“I kanga n riki ngai bwa te bwaeoniia?” E iango Mara ngke e tokara te rebwerebwe. E kabuta te rebwerebwe Mak, ao Yiay mai buki ao Mara i nuka. E kamatoai baina Mara inanon aia tai ni buti ni ira bwakeken te kawai ae e korakora te aomata iai.
Ngke a rirarikin te tabo ni kamwarake, e kianako boin te ii are e roko iaoia. Angiia kaain ikai a bane ni momoi n te ii. Ma Mara e bon aki momoi iai. E kawakina Tuan te Mauri. E wingare Mara. Anne teuana te kawai ae riki iai bwa te bwaeoniia!
Ngke a raibwake n aia rebwerebwe, e a noora Mara te wat, ana tembora Buta. Taubukina ae e uraura e birirake iaoni kateitei ake tabeua. Taama aika akea iran atuia ao kunikaia aika aoranti a bane n tekateka ni kamatebwai ianon te katawananga itinaniku.
E ataia Mara bwa angiia aomata i Cambodia bon kaain te Buddha. A aki kakoaua Iesu Kristo. Ma Mara e kakoaua. “Anne naba teuana te kawai ae I riki iai ni bwaeoniia,” e iango Mara. Ao ngkai e nang ongora nakon te burabeti!
Ngke e a rin aia rebwerebwe n te tabo n tei, e a noriia Mara aine aika a mwaiti bwa a bane n roko. Tabeman a nakonako ke a buti n te rebwerebwe. Tabeman a roko iaon te tuk tuks, te kaa ae e uarereke are e kokokaki n te rebwerebwe. Angiia aine a bane ni kunikainiia n te kunikai ae e mwarairai ke te kamwumwun ae akea matana, n aron Mara. Tabeman a kabongana te sampots te kamwumwun ae mwarairai ae e tikiraoi ae e karaoaki man kunikai aika a korobanaaki ae e rawata matana.
Mara, Mak ao Yiay a tekateka inanon te umantabu ma aine ake tabeman. E a tia ni boo te maungatabu inanon te wiiki ae nako i Salt Lake City, Utah, USA. Ma ngkai aomata i Cambodia a kona ni mataku n te kanakobwanaa n te taetae n Khmer. E kabongana te taetae ni Imatang ao te taetae n Khmer Mara ni mweengana, ao e reiakina naba te taetae ni Buranti n te reirei. Ma angiia kaain Cambodia a tii taetae n Khmer.
Te moan tia taetae e aki taekina rongorongoia bwaeoniia. Ma te kauoman n tia taetae e taekina te rongorongo ngke e toua te kawai i aontano ae e rangi ni kabwatete iaoni kawaina n okira mweengana man ana reirei. E aranaki bwa “kawaia ataeimwaane,” ao n tabetai e buti ana kau ao e nakonako iaoni waena. E tangiria ni karaoi bwaai aika a kaangaanga bwa e aonga n riki n aekakia bwaeoniia! E ngare Mara ngke e iangoi ni kabane kawai ake e riki iai bwa te bwaeoniia.
Te kabanea n tia taetae bon te burabeti. E tei n rangi n abwabwaki. E rangi ni kabanea ana tai n ongora Mara. “I kaoi ngkami bwa kam na wareka ana Boki Moomon imarenan ae ngkai ao n tokin te ririki,” e taku. “E na uki karawa ibukim. E na kakabwaiako te Uea.”
E ataia Mara e na aki rangi ni bebete warekan ni kabane Ana Boki Moomon. E taraiia aine ake i rarikina. Ngaiia ni kabane a atia n rineia bwa a na ririmwin Iesu Kristo. Ngaiia ni kabane a bane n roko n te tairiki aei bwa ana ongora iroun te burabeti. E na ririmwin te burabeti, n ai aroia naba. E na riki bwa te bwaeoniia!