“Ko na Roko n Au Bwabetito?”
Taan kororongorongo a maeka i Kent, Engiran, ao Utah, USA.
E tangiria Oliver n takaruaeia mai taubukin te auti bwa a aonga n ongo kaain Engiran ni kabane!
“E na tai taku temanna ba akea bongam, ma ko na riki ba aia tia kakairi aomata aika onimaki” (1 Timoteo 4:12).
E aki kona Oliver n tataningaa rokon te wiiki. N te wiiki are imwiina bon te bong ae bubura are e a kaman kakariariaa ma ngke aua ana ririki. E nang bwabetitoaki.
E rangi ni kukurei Oliver ibukin ana bwabetito are e tangiria n takaruaea mai tabukin te auti bwa a aonga n ongo kaain Engiran ni kabane! E aki kan tataninga n tuanga raoraona ae Dylan n te reirei.
“I a bon aki kakoaua. Au bong ni bwabetito n tokin te tai e a kaan roko,” e taku Oliver. “E na bon kamiimi!”
“I taku bwa a tii bwabetitoaki ataei aika a tibwa bungiaki.” E taraa ni mimi Dylan.
“A riai ataei ni koro waniua aia ririki ao a bwabetitoaki n ana Ekaretia Iesu Kristo ibukiia Aika Itiaki ni Boong aika Kaitira,” e taku Oliver. “Anne bon au Ekaretia.”
“E nakoraoi,” e taku Dylan.
N te tai ae waekoa iai ana iango Oliver. “Ko na roko n au bwabetito?”
“Eng,” e taku Dylan. “Ma I riai moa n tuangiia au karo.”
“ENG!”
E kukurei Oliver bwa e na roko Dylan n ana bwabetito. E a manga reke ana iango riki teuana. “I aki tangiria n tibwaua au bwabetito ma tii temanna raoraou. I tangiria ni kaoiia aomata aika a mwaiti n aron ae I kona!” E waekoa n nakon mweengana Oliver ao n tuanga Tinana ae iai ana iango.
N te Tabati n aki mamatam imwaain ana bwabetito, e a moana ana babaire Oliver. E tibwaua ana koaua n te tabo n taetae, ngkanne e taku, “N nang bwabetitoaki n te Tabati ae e na roko, ao I tangiri ngkami ni kabane bwa kam na roko! Taiaoka kam kona ni kaoa temanna are kam kinaa ae tiaki kaain te aro, ke are e aki roroko n taromauri, nakon au bwabetito?” Titebo ma kanga te mitinare Ngaia. E rangi n tangira te namakin anne!
Imwiin te wiiki anne, e a kaoiia raoraona Oliver, ana utu, ao taan reirei nakon ana bwabetito.
“E rangi n nano aei irou ngkana kam kona n roko!” e tuangiia.
Ngke e nang roko te Kaonobong, e moanna n iango Oliver bwa a na mwaitira aomata aika a na roko. Ngkana tao a rangi n tabetabe ke tao a aki kan roko?
E a tataro bwa e bae n tii tabeman aomata ake e kaoiia ae a na roko. Ngkanne e a toki raraomana bwa antai ae a na roko. E ataia bwa e a tia ni karaoa te bwai ae tamaroa man tii kaoakiia. Irarikna, te bwai ae te kabanea n tamaroa ibukin te bong anne bon arona ni bwabetoaki.
Ngke e nako n taromauri n ana bong ni bwabetito, se aki kakoaua te baere e nooria ni matana. A mwaiti raoraona aika a roko ni boutokaia. E nooria naba bwariko n aomata ae e aki kinaia. E kateitea baina ngke e noora Dylan n rinnako ma ana karo.
Ngke e nang bwabetitoaki, e ruo Oliver inanon te ran ae abuee. E taua baina tamana, n aron are a tia n kataneiai aron karaoana. Ngkanne e a karaoa te tataro ni bwabetito ae uarereke ao ni karuoa Oliver inanon te ran. Imwaain ae e ataia, e a manga moan teirake Oliver—e mwaimwai ao ni wingare. E ataia bwa e a iriira ana banna ni katooto Iesu.
Ngke e tia n oneia Oliver nakon kunnikaina aika a mwauu, tamana ma tabeman mwaane a kamatoa bwa kaain te Ekaretia, ao anganna te kakabwaia ae e onoti, ike a butimwaea n anganna ana bwaintituaraoi te Tamnei ae Raoiroi. Imwiina, e bubuti Oliver ngkana e kona ni kaota ana koaua.
“Kam bati n rabwa ibukn rokomi ni boutokaai n au bong ae kakawaki. E rangi ni korakora nanon aei irou,” e taku Oliver. “I kakiaitau ibukin au bwabetito, ao I kakoaua bwa aio ana Ekaretia iaon te aba.”
Imwiina, a kawara Oliver aomata bwa a na katekeraoia.
“Ko rabwa ngkai ko kaoai” E taku Dylan. “Iai te namakin ae tamaroa inanou.”
“A bane n akoi aomata” E taku tinan Dylan. “Ti namakina te butimwaeaki raoi.”
N te tairiki anne, e tekateka Tamau itabon ana kainiwene Oliver. “Bon te bong ae rangi n nakoraoi!” E taku Tamana.
E katoutoua atuuna Oliver. “I kukurei bwa I kona n tibwauaia ma raoraou.”