Te Berita nakon te Ataei
Lluvia Paredes Cabrera
Yucatán, Mexico
Kamataata n te tamnei iroun Pascal Campion
Tabeua te ririki n nako, I rangi n taonaki n te rawawata. Tii te bwai ae I kona ni kunea n te ungannano ae bon tau bon ibukin raoraou ae tamaroa ao natina. Ti nanako n rianna n tain te wiikente, are I rangi n unga iai. N te tai ae okioki, e ngae n anne, e moanna ni karako nakonakora ao ni karako n ae ti tataneiai iai. I a moanna n ururinga raoraou ao ana utu. I ataia imwiina bwa e a moanna ni karako ara ririanna n ae ti tataneiai iai ibukina bwa raoraou ma ana utu a okira aroia are a tia ni katokia n ririki aika mwaiti mai imwaaina—te nanako n taromauri.
N te bong teuana ao a kaoai bwa N na katawanou ma ngaiia. Aron manga noorakiia e karika aron kukureiu. I tuangiia bwa I rangi n ururingiia. Natin raoraou ae te aine e baireia bwa ti na uaia n taobaraa te kaangaanga anne ni uaaia n n nanako n taromauri. Ngaia are n akea manga iangoana riki te kauatai, e a kaoai bwa N na iria n nako.
“O akea ngaira! N na kanga ni kaotaia te utu aei ae te nanako n taroamuri e bon eti ibukiia ma e rangi ni kabotu ibukiu? I bon tuai man tataromauri inanon ririki, ma N na kanga ni kangai I aki nakon te ataei? I kangai N na nako, ma ni bon te koaua akea au iango ni kawakina te berita anne.
N te Tabati anne, I nako ni kaingabong ma tamau. E tang au tareboon, ni kauringai bwa iai au berita ma te ataeinnaine ae uarereke ae N na nako n taromauri ma ngaia. I baka n aki ongo tangin au tareboon ni karokoa are e a tuangai tamau bwa bukin tera ngkai I aki kaekaa. I kaotia ae I kaoaki bwa N na nako ni kaea te bootaki n taromauri ma I aki kan nako. E moangare ao e taku, “Lluvia, tai manga oki ni karaoa am berita nakon te ataei ngkana ko aki kona ni kakoroa bukina.” I baireia bwa N na kakoroa bukin au berita.
Ngke I roko n te taromauri, iai te bwai ae I namakinna ae kaokoro, te bwai ae I aki kona ni kabwarabwara. I aki kona ni kabwarabwara bwa e kanga n riki, ma n te Tabati are imwiina, I a manga kuneai naba ikekei, ao n te Tabati are imwiina ao are imwiina, ni karokoa are I a ataa te bwai are I namakinna: te Tamnei ae Raoiroi.
I moanna n namakina te mweengaraoi irouia kaain te Ekaretia. N akea te nanououa, I kan ataa rongorongon te Ekaretia. I a moanna ni kakaitibo ma mitinare, ao I a moanna naba ni karekea au koaua. E teimatoa rorokoia mitinare, ao e a moanna n rikirake au atatai n te euangkerio ni karokoa are I a namakinna bwa e a korakora nanou ni kan bwabetitoaki. I a bwabetitoaki n te tai ae uarereke imwiina, ao ngkai I kukurei ni kakarekei kakabwaia man te euangkerio. Ibukin aei, I bon rangi ni kakaitau bwa I kawakina au berita nakon te ataeinnaine ae onoua ana ririki.