Reirei man te Nu Tetemanti
Abotoro Bon Taan Kakoaua Aika Onoti ibukin Kristo—ao Ngkoe Naba Ko Kona!
Kamataata n te tamnei iroun David Stoker
Iangoia bwa angkoa are ngkoe ma raoraom kam katawanou n te reirei. E nang kauka ana kanree raoraom ngke e a keerake temanna ni kawari ngkami ao ni bukinna bwa e iraea te kanree ao e tua bwa e na “kaokaki nakon te tia bobwai.” Ko mena ma raoraom ngke e kabooa, ngaia are e ngae ngke e nako nanom, ko tuanga te tia bukibuki bwa tiaki te tia iraa raoraom.
Taan Kakoaua aika a Onoti
Taekinan te koaua n aron aei e aranaki bwa “ te tia kakoaua ae onoti.” N te katooto, ko kona n riki bwa te tia kakoaua ibukin anuan raoraom ae tamaroa. N arom naba ko kona n riki bwa te tia kakoaua ibukin raoraom, e a tia te Uea ni weteia burabeti ao abotoro n riki bwa taan kakoaua aika a onoti ibukin Natina, Iesu Kristo. Abotoro ake “a mwamwananga ma te kariaia ao te katabeaki”1 n reirei, ni kakoaua, ao ni mwakuri bwa “taan kakoaua aika a onoti ibukin aran Kristo n te aonaaba ni kabane” (Reirei ao Berita aika Tabu 107:23).
N aki maan imwiin mangautin Kristo, a weteaki Abotoro n riki bwa Ana tia kakoaua aika a onoti (taraa Makuri 1:8). Ngkai ko kamatebwaia Makuri n te Nu Tetemanti, ko kona ni wareki taekan taai ngke a kaotia Abotoro bwa Iesu bon Natin te Atua (taraa Makuri 2:36; 5:27–32; 10:36–44). Abotoro ni boong aikai a teimatoa n te mwakuri aei bwa taan kakoaua aika a onoti—tii kakauongo nakon te maungatabu ni kabuta ao ko na ongo bwa a kanga ni kaotioti ibukin Kristo.
Te Tamnei ae Raoiroi e Kaotioti ibukin Kristo
Tabeman Abotoro n te Nu Tetemamti bon raon Kristo ngke e mena iaon te aba ao a Nooria ngke e waerake nako karawa (taraa Makuri 1:9–11), ao Abotoro ni boong aikai a bae n tia n noora Kristo,2 ma tiaki noorakin Kristo n te rabwata are e na karika temanna bwa te tia kakoaua ae onoti Ibukina. E taku Beretitenti Joseph Fielding Smith (1876–1972), “[Te Tamnei ae Raoiroi] bon tii te kawai are e kona n ataia te aomata bwa Iesu bon te Kristo ao e koaua ana euangkerio.”3 Nanon aei bwa, e ngae ngke tao a tia Abotoro n noora Kristo, a ataia bwa bon Ngaia te Tia Kamaiu ibukina bwa a tuangaki iroun te Tamnei ae Raoiroi!
Ko kona n Riki bwa te Tia Kakoaua
Te bwai ae rangi ni kamiimi riki bwa aomata ake a wareka te koroboki aei a bertia naba ae ko kona n ataia bwa Iesu Kristo bon am Tia Kamaiu rinanon te Tamnei ae Raoiroi (taraa Reirei ao Berita aika Tabu 46:13). Atakina ae Iesu Kristo bon ara Tia Kamaiu tiaki te bwai ae a tii kona n ataia Abotoro! E ngae ngke ko aki weteaki bwa ko na riki bwa te tia kakoaua ae onoti ibukin Kristo, ko kona ni ukoukora am kakoaua ibukin Kristo ao n riki bwa Ana tia kakoaua nakoia aomata inanon maium. Ko kona n iriira ana taeka te Tia Kamaiu nakon Betero: “Ngkana ko a manga rairaki, ao ko na kateimatoaia [tarim ao mwaanem]” (Ruka 22:32).