E aera e aki Tuangai te Atua?
Lark Montgomery
Texas, USA
Kamataata n te tamnei iroun Tim Zeltner
Kainnabau ao ngai ti maeka n autin te kaawa n reirei n te Texas State Technical Institute ngke ai aua ao uoua aia ririki moan natira ake uoman. Bon ara moan tai i Texas hill country, ao I rangi n tangiria! Ni katoa tain te tiburing, ao e rangi ni mwaiti te uee i Texas nuuka. N taian onaroka, marae aika a mwaawa, irarikin kawai, n taabo nako ake I tarai ao e mwaiti uee ake I kona n noori.
I ririanna ma ni kokokiia natiu iaon te tituroora ni kuri ni katoa bong. Ti ukori taabo aika boou n neweabai, ao I kariaia bwa natiu a kiniki uee ni kamwaiti nakon are a tangiria. Kabanean kawaira bon te tabo are angiina te auti a kateimatoai aia onaroka n uee aika tamaroa.
N te bong teuana ao ti roko n te koona teuana ike ti a noori iai beeba aika mwaiti n raea n teuana te onaroka n uee. E baiti te ang ni kamaenakoi beeba aikai n te onaroka. I motikia bwa n na bobotii maange aikai imwain are a na maenako riki. I anai tabeua beeba ao ni karini inanon au baeki ni kimbi.
Ngke I taraa nano, ao I nooria bwa ngaia I taui tamnei aika bubuaka. Ni maaku ni baika a bubuaka aikai, I tuangia natiu bwa a na tiku n aia stroller n au tai n rikoi nikiran beeba aikai. I un ngke I noori tamnein baika I bon aki naba kan tarai. I nanou, ao I a moanna ni ngurengure, “E aera e aki Tuangai te Atua bwa n na toua te kawai nakon mwengau ae kaokoro?”
Ngkanne I ongo tangin bureikin aia bwati ataein te reirei are e kanikina. Tao tengaun ma uoman ataei ake a ruo man te bwati. A mwananga rinanon te onaroka are e a tia ni kaonaki n tamnei aika bubuaka bon tabeua naba te tai n nako.
N te tai anne, e bitaki au taratara. I a ataia ngkai bwa bukin tera I aki tuangaki bwa n na toua te kawai ae kaokoro. I karabwarabwa bwa I mena ikekei n rikoi beeba akekei bwa aonga ataei akekei n aki tarai tamnei aika a urubwai. Ngke I a oki rikaki nakon mwengau, I iango, “Tao tera ae na riki ngke arona bwa e waeremwe n roko te bwati? Tera ae na riki ngke arona bwa I aki ataa bukin te bwai are I rinanona arei? E na maanra uniu iroun te Atua?”
Man te bong anne, te tai are e anganai te Uea n noora “bukin” te bwai are I rinanona e a tia ni buokai n onimakinna bwa Ana wanawana ao ana kaantaninga a rietata riki nakoiu.
N tabetai I ataa bukin te bwai ae riki; n tabetai I aki. Ma tao tera ae riki, I ataia bwa N na riai n onimaki bwa te Uea iai ana kaantaninga ae abwabwaki are I aki nooria n tainako.