Ko e Ngāue ʻi he Siasí
Ko e Mahuʻinga ʻo ha Faiako
Mei he “Only a Teacher,” Tambuli, ʻOkatopa 1990, 3–8.
ʻI ha ngaahi taʻu ki muʻa atú naʻe talanoa ha tamaiki tangata iiki ʻe toko tolu ʻo kau ki heʻenau tamaí. Naʻe pehē ʻe he toko taha, “ ʻOku sino lahi ange ʻeku tamaí ʻi hoʻo tamaí,” pea tali mai ʻe he toko taha, “ ʻIo, ka ʻoku poto ange ʻeku tamaí ʻi hoʻo tamaí.” Naʻe pehē leva ʻe he fika tolú, “Ko ʻeku tamaí ko e toketā.” Pea ʻi heʻene tafoki ki he taha ʻo e ongo tamaikí, naʻá ne manuki ʻo pehē, “Ka ko hoʻo tamaí ʻau ko e faiako pē.”
Ka ʻoku ʻi ai ha faiako ʻe taha ʻoku mahulu hake ʻene moʻuí ʻi ha toe taha. Naʻá Ne moʻui ke ʻoua naʻa tokoniʻi Ia ka ke Ne tokoni [ki he niʻihi kehé], ke ʻoua naʻa maʻu ha meʻa kae foaki, ke ʻoua naʻa fakahaofi ʻEne moʻuí kae feilaulauʻi ia maʻá e niʻihi kehé. Naʻá Ne fakamatala ki ha ʻofa ʻoku mahulu hake ʻi he holi fakakakanó, ha masiva ʻoku koloaʻia ange ʻi he maka koloá. Naʻá Ne akonaki ʻi he mafai ʻo ʻikai hange ko ia ne fai ʻe he kau tangata tohí. ʻOku ou lea kau ki he Faiako tuʻukimuʻá ʻa Sīsū Kalaisi, ko e ʻAlo ʻo e ʻOtuá, ko e Fakamoʻui mo e Huhuʻi ʻo e faʻahinga kotoa pē ʻo e tangatá.
ʻI he taimi ʻoku tali ai ʻe he kau faiako ngāue mateakí ʻa ʻEne fakaafe ke “Haʻu ʻo ako ʻiate aú,” ʻoku nau hoko ko e konga ʻo Hono mālohi fakalangí.
Ko e meʻa ia naʻá ku aʻusia ʻi heʻeku kei tamasiʻí ʻa hono tākiekina au ʻe ha faiako pehē. ʻI heʻemau kalasi Lautohi Faka-Sapaté naʻá ne akoʻi kiate kimautolu fekauʻaki mo hono Fakatupu ʻo e māmaní, Hinga ʻa ʻĀtamá pea mo e feilaulau huhuʻi ʻa Sīsuú. ʻI hono loki akó naʻá ne faiako fekauʻaki mo Mōsese, Sosiua, Pita, Tōmasi, Paula, pehē foki kia Sīsū. Neongo naʻe ʻikai ke mau mamata kiate kinautolu, ka naʻá mau ako ke ʻofa, fakalāngilangiʻi mo muimui kiate kinautolu.
ʻI he fanongo ʻa e tamasiʻí ki he manuki: “ ʻOku tupu lahi ange ʻeku tamaí ʻi hoʻo tamaí,” “ ʻOku poto ange ʻeku tamaí ʻi hoʻo tamaí,” “Ko ʻeku tamaí ko e tōketa,” naʻá ne mei lava pē ʻo tali ange, “Mahalo ʻoku sino lahi ange hoʻo tamaí heʻeku tamaí; mahalo ʻoku poto ange hoʻo tamaí ʻi heʻeku tamaí; mahalo naʻa ko ha pailate, ʻenisinia, pe ko ha tōketa; ka ko ʻeku tamaí ʻaʻaku ko e faiako.”
Fakatauange ke tau takitaha mahuʻingaʻia ʻi ha faʻahinga fakavīkiviki moʻoni mo taau pehē!
Ko e Malanga ʻi he Moʻungá, tā ʻe Carl Heinrich Bloch, fakaʻaongaʻi ʻi hono fakangofua ʻe he Musiume Hisitōlia Fakafonua ʻi Feletilikisipeeki ʻi Hililoite ʻi Tenimaʻake, ʻoua naʻa hiki hano tatau.