Ngaahi Ongoongo Nounou mei Māmani

Fanongonongo e Kau Palesitenisī Faka-ʻĒlia ʻo ʻIulope Hahaké

Kuo fanongonongo ʻe he Kau Palesitenisī ʻUluakí ha liliu ʻi he Kau Palesitenisī Faka-ʻĒlia ʻi ʻIulope Hahaké, ʻo kamata he taimí ni pē. Kuo hiki ʻa ʻEletā Kēvini W. Piasoni, Tokoni ʻUluaki ʻi he Kau Palesitenisī Faka-ʻĒliá, ki he hetikuota ʻo e Siasí ki ha fatongia makehe ʻi he Potungāue Ngāue Fakafaifekaú. ʻE hoko atu pē ʻa ʻEletā Ulofikengi H. Paula ko e Palesiteni ʻo e ʻēliá, pea Tokoni ʻUluaki ʻa ʻEletā Kulekilī A. Siuvaisa ʻo e Kau Fitungofulú pea mo ʻEletā ʻAlekisānita N. Manisou, ko e Tokoni Ua.

Fili ʻa e Tuʻuʻanga ʻo e Temipale Filatelafia Penisilivēnia

Naʻe fanongonongo ʻe he Kau Palesitenisī ʻUluakí ʻi Nōvema 2009 ʻe tuʻu ʻa e Temipale Filatelafia Penisilivēniá ʻi he 1739 Vine Street ʻi he loto kolo ʻo Filatelafiá. ʻOku hoko atu ʻa e feituʻú ni ki he Vine Street Expressway mo e Courts Building pea ʻoku mei fehāngaaki mo Logan Square, ko ha feituʻu ʻiloa mo fakahisitōlia ʻi Filatelafia. Naʻe fanongonongo ʻe Palesiteni Tōmasi S. Monisoni ʻa e temipalé ʻi ʻOkatopa 2008. ʻOku lolotonga ngāue ha ngaahi temipale ʻe 130 ʻi he funga māmaní, pea ʻoku toe ʻi ai ha 21 kehe kuo fanongonongo pe lolotonga langa.

Fanongonongo ʻa e Ngaahi ʻAho ʻo e Temipale Venikuvá

ʻE fakahoko ʻa e ʻoupeni hausi ʻo e Temipale Venikuva Pilītisi Kolomupiá mei he ʻaho 9 ʻo ʻEpelelí ki he ʻaho 24 ʻo ʻEpelelí 2010, tuku kehe pē ʻa e ngaahi ʻAho Sāpaté, pea fakahoko ha kātoanga faiva fakafonua ʻi he ʻaho 1 ʻo Meé. ʻE fakahoko ʻa e hūfí ʻi ha ngaahi sēsini ʻe tolu ʻi he ʻAho Sāpaté, 2 ʻo Meé, ʻi he 9:00 a.m., 12:00 p.m., mo e 3:00 p.m. ʻE fakamafola ʻa e ngaahi fakatahaʻangá ni ʻe tolu ki he ngaahi ʻiuniti kotoa ʻo e Siasí ʻi he vāhenga fakatemipalé. ʻE ʻatā ʻa e temipalé ʻi he ʻaho hono hokó ki hono fakahoko ʻo e ngaahi ouaú.