Ko e Ongoʻi ʻa e Laumālie ʻo e Temipalé

Cristian Robles, Silei

ʻI he taimi naʻe ui ai au ko e mēmipa ʻo e fakataha alēleaʻanga māʻolungá, naʻe fakahā ʻe he palesiteni fakasiteikí ʻa ʻene fakaʻamu ke tokolahi ange ʻa e kāingalotu ʻoku ō ki he temipalé ʻi he ngaahi ʻaho kuo vahe maʻa homau siteikí. Naʻe ʻi ai e palopalema fakameʻalele pea ko e meʻa ʻuluaki naʻá ne faí ko hano aleaʻi ha pasi ke ne tānaki ʻa e kāingalotú mei he ngaahi uooti takitaha ʻo e siteikí pea toe fakafoki kinautolu hili ʻene lava ʻa e ʻaho ko iá.

Naʻe toe ʻi ai foki mo ha palopalema ʻe taha. Naʻe tokolahi ha ngaahi faʻē naʻe ʻikai lava ke nau ʻalu koeʻuhí naʻe ʻikai ha taha ke nofo mo e fānaú. ʻI heʻemau aleaʻi ko ia pe ʻe malava ʻe he kau finemui ʻa e siteikí ke tokangaʻi ʻa e fānaú, naʻá ku fakakaukau ai mahalo naʻá ʻoku totonu ke ui ha taki nēsili fakasiteiki. Naʻá ku fokotuʻu ʻa e foʻi fakakaukaú ki he palesiteni fakasiteikí. Naʻá ne fokotuʻu mai ke ui ʻa e kau papi uluí ko e kau tokoni ki he taki nēsilí koeʻuhí ke nau ongoʻi ʻa e laumālie ʻo e temipalé. ʻI he taimi ne fakahoko ai e ngaahi fakakaukau ko ʻení, naʻe tokolahi ange ai ʻa e kau ō ki he temipalé mei he siteikí.