Tokoni ki Hono Fafanga ʻo e Fanga Lami ʻa e Fakamoʻuí

Fai ʻe Palesiteni Henry B. Eyring

Tokoni ʻUluaki ʻi he Kau Palesitenisī ʻUluakí

Mei ha lea ʻi he konifelenisi lahi ʻo ʻOkatopa 1997

President Henry B. Eyring

Naʻe tutuki e Fakamoʻuí peá Ne toetuʻu. Kuo ʻalu atu ʻEne kau ākongá ki Kāleli. Naʻa nau toutai he poó kotoa kae ʻikai maʻu ha ika. ʻI heʻenau fakaofi atu ki ʻuta he mafoa ʻa e atá, naʻe ʻikai te nau fakatokangaʻi Ia. Naʻá Ne ui kiate kinautolu ʻo fakahā ange ʻa e feituʻu ke lī ki ai ʻenau ngaahi kupengá, pea ʻi heʻenau fai iá, naʻe fonu e ngaahi kupengá. Naʻa nau lele atu ke fakafetaulaki kiate Ia ʻi he matātahí.

Naʻa nau ʻilo ai ha afi kuo tafu mo e ika kuo tunu ai mo e mā. Naʻá Ne fai leva ha fekau kiate kinautolu ʻa ia ʻoku kei ʻuhinga pē kiate kitautolu takitaha.

“Hili ʻenau kaí, pea lea ʻa Sīsū kia Saimone Pita, Saimone, ko e foha ʻo Sōnasi, ʻoku lahi hake hoʻo ʻofa kiate aú ʻiate kinautolú ni? Pea talaange ʻe ia ki ai, ʻIo, ʻEiki; ʻokú ke ʻilo ʻoku ou ʻofa kiate koe. Peá ne pehē kiate ia, Fafanga ʻeku fanga lamí” (Sione 21:15).

Kuo fakafuakavaʻi maʻu pē e Kau Māʻoniʻoni ʻa e ʻOtuá ke nau fefafangaʻaki fakalaumālie, kae fakatautefito kiate kinautolu ʻoku kei foʻou ʻi he ongoongoleleí.

ʻE lava ʻe ha kiʻi tamasiʻi ʻo fai e ngaahi meʻa ʻokú ne fafangaʻi e tui ʻa e kakaí. ʻE lava ʻe he fānaú ʻo fakaafeʻi ha tokotaha ului foʻou ke nau ō ki ha fakatahaʻanga. ʻE lava ke malimali e fānaú mo fakafeʻiloaki ki ha mēmipa foʻou ʻoku haʻu ki fale lotu pe ki ha kalasi. Pea ʻi heʻetau fai iá, ʻe hoko ʻa e Laumālie Māʻoniʻoní ko hotau takaua.

ʻE lava ʻe he foʻi lea kotoa pē ʻoku tau lea ʻaki ʻo fakamālohia pe ʻai ke vaivai ʻa e tuí. ʻOku tau fie maʻu ha tokoni mei he Laumālié ke tau lea ʻaki ʻa e ngaahi lea ko ia te ne fafangaʻi mo fakamālohiá.

Te tau lava ʻi heʻetau talangofuá ʻo tokoni ki he ʻEikí ke ʻoatu ʻa e fanga lamí, ʻa ʻEne fanga lamí, ki hono umá ia ke nau foki ki ʻapi ki heʻenau Tamaí mo ʻetau Tamaí.

ʻOku ou ʻilo ko Sīsū ʻa e Kalaisí.ʻOku ou ʻilo ʻokú Ne moʻui. Pea ʻoku ou ʻilo ʻokú Ne tataki kitautolu ʻi he ngāué ni—ʻa ʻEne ngāué—ke fakahoko ʻa e moʻui taʻengata ʻa e fānau ʻa ʻEne Tamaí.

ʻOku ʻuhinga ʻa efafangaʻí ke ʻoange ha meʻakai.

Ko Hono Tokangaʻi ʻo e Fanga Lamí

ʻOku vaivai ʻa e fanga lamí pea ʻikai ke nau lava ʻo maluʻi kinautolu. ʻOku nau fie maʻu ha tokanga makehe ka nau lava ʻo tupu moʻui lelei hake mo mālohi. Sio ki he fakatātā ʻo e ngaahi meʻa ʻoku fie maʻu ʻe he fanga lamí.

Meʻakai

Vai

Ko ha feituʻu malu ke mohe ai

Maluʻi mei he fanga ulofí mo e ngaahi faingataʻa kehe

Ko hai e Fanga Lami ʻa e Fakamoʻuí?

Naʻe kole ʻa e Fakamoʻuí ki Heʻene kau ākongá ke nau tokangaʻi makehe ʻa e kakai ʻoku ʻikai te nau mālohi ʻi he ongoongoleleí pe kau foʻou mai ki he Siasí. Naʻá ne ui ʻa e kakai ko ʻení ko e “fanga lami.” ʻOku nau fie maʻu ha taha ke tokoniʻi kinautolu kae lava ke nau tupu mālohi—ʻo mālohi ʻi he ongoongoleleí.

Valivali e fakatātā ʻo e ngaahi meʻa ko ia ʻe lava ke fai ʻe he fānaú ke tokoniʻi ʻaki e fanga lami ʻa e Fakamoʻuí. Hili iá pea tā ha fakatātā ʻe taha ʻo ha faʻahinga meʻa ʻe lava ke ke fai.

Talitali lelei ha mēmipa foʻou ʻo hoʻo kalasí

Fakaafeʻi hao kaungāmeʻa ke haʻu ki he Palaimelí

Vahevahe ʻa e Liahoná

Mei toʻohemá: Ko e Lami Naʻe Heé, tā ʻe Del Parson; tā ʻo e ulofí mo e lamí © Getty Images; tā ʻo e feleokó © Corbis; tā ʻo e meʻakaí mo e vaí naʻe fai ʻe David Stoker; ngaahi tā fakatātā ʻa Apryl Stott