Toʻu Tupú
Ko ʻEku Fakatotolo ki he Tuí
ʻI hoku taʻu 13, naʻá ku kamata lau fakaʻaho ʻa e Tohi ʻa Molomoná pea kuo faitāpuekina fakaʻaho au talu mei he ʻaho ko iá.
Naʻe ʻikai ke fuʻu ʻiloa ʻa e ʻulungāanga ʻapasiá ʻi heʻemau kiʻi kalasi Lautohi Faka-Sāpate ʻo e kau taʻu 13. Kae kehe, naʻe ʻi ai haʻamau faiako lelei ʻa ia naʻá ne feinga ʻaki hono lelei tahá ke faiako ʻaki e Laumālié ʻi he lēsoni kotoa pē. Ko e taha ʻo e ngaahi lēsoni ko iá ʻa e lau folofolá.
ʻI he fakaʻosinga ʻo e lēsoní naʻá ne fakatukupaaʻi kimautolu. Naʻe fakataumuʻa ia kiate kimautolu kotoa kae mahalo naʻe ʻi ai ha ʻuhinga naʻá ne sio fakahangatonu mai ai pē kiate au mo pehē, “ ʻOku ou fakatukupaaʻi kimoutolu ke mou lau fakaʻaho ʻa e Tohi ʻa Molomoná!” Naʻá ku fakakaukau loto pē, “Te u ʻai muʻa ke ke sio ki ai. Te u fai ʻeni!”
Ne u kamata ʻi he po pē ko iá ʻi he 1 Nīfai vahe 1 peá u hoko atu ai pē ʻo lau fakaʻaho ia. Mahalo naʻe ʻikai ke mahuʻingamālie kiate au ʻi heʻeku kamata lau iá, ka naʻe faifai pē ʻo u manako ʻi he faʻahinga ongo ne u maʻu ʻi hono lau ʻo e Tohi ʻa Molomoná. Ne hoko ʻa hono lau he pō kotoá ko ha ʻulungāanga naʻá ku saiʻia ai.
Hili ha ngaahi māhina mei ai ne u aʻu ki heʻAlamā 32 pea ne u saiʻia ʻi he foʻi fakakaukau ke fakahoko ha fakatotolo ki he tuí. Naʻa mau toki ako pē ʻi he akó ʻo fekauʻaki mo hono fakahoko e ngaahi fakatotolo fakasaienisí, ko ia ne u tūʻulutui hifo ai ʻo fakahā ki he Tamai Hēvaní kuó u kiʻi kamata ʻahiʻahiʻi. Naʻá ku kole ke u ʻilo muʻa pe ʻoku moʻoni nai ʻa e Tohi ʻa Molomoná.
ʻI heʻeku toki fakakaukau ki he meʻa naʻá ku fouá, ʻoku ou ʻilo naʻe tali tā tuʻolahi ʻe he Tamai Hēvaní ʻeku ngaahi lotú. Ne ʻomi ʻe hono lau fakaʻaho ʻo e Tohi ʻa Molomoná ha ivi makehe kiate au ke u ikunaʻi ai ʻa e filí. Naʻá ku ongoʻi vāofi ange ai mo ʻeku Tamai ʻoku ʻi Hēvaní. Ne u ongoʻi ʻa e fakamālohia au ʻe he ivi ʻo e Laumālie Māʻoniʻoní ke u ikunaʻi ai e ngaahi faingataʻá. ʻOku moʻoni ʻa e lea ʻa ʻAlamā fekauʻaki mo e fekumi ki he folofola ʻa e ʻOtuá: “He ʻoku kamata ke langaki hake ʻe ia ʻa hoku laumālié; ʻio, ʻoku kamata ʻe ia ke fakamaama hoku ʻatamaí, ʻio, ʻoku fakaʻau ke melie ia kiate au.” (ʻAlamā 32:28).