“Fafanga ʻEku Fanga Sipí”
“Muimui ʻiate au, pea fafanga ʻa ʻeku fanga sipí” (T&F 112:14).
“Naʻe fakahā ʻe Sīsū kia Pita ke fafanga ʻEne fanga sipí. Ko e founga ia naʻe lava ai ʻe Pita ʻo fakahā ʻokú ne ʻofa ʻiate Íá.”
“Fineʻeiki, naʻe ʻi ai ha fanga sipi ʻa Sīsū?”
“ ʻIkai. ʻOku faʻa ui ʻa Sīsū he taimi ʻe niʻihi ko e Tauhisipi Leleí, pea ʻoku tau hangē kitautolu ko haʻane fanga sipí. Naʻe akoʻi ange ʻe Sīsū kia Pita kapau ʻoku tau fie fakahaaʻi kia Sīsū ʻoku tau ʻofa ʻiate Ia, pea ʻoku totonu ke tau tokoni ki he niʻihi kehé.”
“Ko hono ʻuhinga ia te tau ʻave ai e foʻi paí kia Sisitā Sēkope he ʻosi ʻa e efiafi fakafāmili ʻi ʻapí?”
“ ʻIo, ko ia. Ka ʻe lelei kapau te ke fakakaukauʻi ha faʻahinga meʻa ʻe lava ke ke fai ke fakahā ʻaki kia Sisitā Sēkope ʻokú ke ʻofa ʻiate ia.”
Naʻe fakakaukauʻi ʻe ʻOlivia ha meʻa ʻe lava ke ne fai. Naʻá ne manatuʻi hake ʻoku fakaʻofoʻofaʻia ʻaupito ʻene faʻeé mo e kui fefiné ʻi he ngaahi fakatātā ʻokú ne taá.
“ ʻOku ou ʻiloʻi! Te u lava ʻo ngaohi ha kaati maʻa Sisitā Sēkope pea tā ai ha fakatātā!”
Naʻe tā ʻe ʻOlivia ha ʻumata fakaʻofoʻofa. Naʻá ne tohiʻi ʻeni ʻi loto he kātí, “ ʻOfa ke vave haʻo sai! ʻOfa atu, ʻOlivia.”
ʻI he aʻu atu ʻa ʻOlivia mo hono fāmilí ki he fale ʻo Sisitā Sēkopé, naʻe ʻeke ange ʻe he fineʻeikí pe ʻokú ne ongoʻi fēfē. Naʻe kamata ke tangi ʻa Sisitā Sēkope.
“Ne u toki ʻiloʻi hake pē te u ʻalu ki falemahaki ʻa pongipongi ʻo fai hoku tafa. ʻOku ou kiʻi ilifia.”
Naʻe ʻoange ʻe he fineʻeikí ʻa e foʻi paí kia Sisitā Sēkope. ʻOsi ko iá pea ʻoange ʻe ʻOlivia e kaati naʻá ne ngaohí.
“Mālō ʻaupito, ʻOlivia. ʻOku ʻai au ʻe he kaati fakaʻofoʻofa ko ʻení mo hoʻo malimalí ke u ongoʻi lelei ange.”
Ne ongoʻi ʻe ʻOlivia hangē naʻe ala mai ha taha ki hono mafú. Naʻá ne fiefia naʻe lava ke ne tokoni kia Sīsū ʻi hono fafanga ʻEne fanga sipí.