Kau Tā Piano ʻa e Palaimelí
“ʻOku ʻikai te u tui au ki ai!”
“ʻOku ʻikai ko haʻo fakamātoato ʻeni!”
“He ʻikai teitei hoko ia!”
Ko e lea ia naʻe mei fai ʻe ʻAnitulia, ʻĒliki, Kulisitofā, Sūseti, mo Iulitia ʻo Polovo, ʻIutaá, kapau naʻá ke talaange te nau tā e pianó he polokalama sākalamēniti ʻa e Palaimelí ʻe hokó. ʻĀsili aí, he ko honau toko taha pē kuo ʻosi tā piano kimuʻa!
Ka naʻe fakatukupaaʻi kinautolu ʻe heʻenau fefine tā piano he Palaimelí, ʻe Sisitā Peuli—pea naʻa nau loto fiemālie ke tali ia.
Naʻa nau ako tā piano takitaha mo Sisitā Peuli, ʻo tuʻo taha he uike, tuku kehe pē ʻa e toko taha kuo ʻosi ʻi ai pē ʻene faiako. Naʻa nau ako ʻi he ngaahi kīpooti ʻuhila ʻi honau ngaahi ʻapí. Taimi nounou pē kuo nau ako ha ngaahi tuʻungafasi faingofua ʻo e ngaahi hiva ki he polokalama sākalamēnití. Naʻa nau akoako tā foki ʻi he Palaimelí kae hiva e fānau kehé.
Faifai pea hoko e ʻaho lahí. Naʻe tā ʻe fānaú takitaha ha foʻi hiva ʻe taha pe ua. Naʻa nau manavasiʻi nai ke tā kae fanongo kotoa e uōtí? ʻIo! Ka naʻe ʻikai taʻofi ai kinautolu.
Naʻe talaange ʻe Kulisitofā, “Naʻá ku ongoʻi manavahē moʻoni, ka naʻá ku kei tuʻu maʻu pē he tuí.”
Mālō muʻa mo ʻenau tuí pea mo e ngāue mālohí naʻe lelei ai e polokalama ʻa e tokotaha kotoa pē. Pea ko e hā leva e meʻa lelei taha kau ki aí?
Ko e pehē ʻe ʻAnitulia, “Meʻa ongo lelei moʻoni ʻete lava ʻo tokoni ʻi he lotú. Ko ha tāpuaki maʻongoʻonga ia kiate au.”
ʻOku lava ʻeni ke tā piano e fānaú ʻi he efiafi fakafāmili ʻi ʻapí, ʻi he ngaahi papitaiso ʻoku fakahokó, mo e taimi ʻoku hiva ai honau ngaahi fāmilí ʻi he houalotu sākalamēnití. Fakaʻofoʻofa ʻaupito!
Ngaahi faitā ʻa Christina Smith