Te mau mana‘o opaniraa
Ua faauruhia tatou e ua umehia hoi i te hoê faito teitei a’e no te faaiteraa i te mauruuru no teie evanelia nehenehe mau.
Te faaoti nei tatou i te hoê amuiraa nehenehe roa. Ua faateiteihia tatou e ua haamaitaihia hoi. Ua faauruhia tatou e ua umehia hoi i te hoê faito teitei a’e no te faaiteraa i te mauruuru no teie evanelia nehenehe mau. E mea faahiahia mau te mau himene e tae noa’tu i te mau aoraa.
I teie nei, e hoi atu tatou i to tatou mau ti‘ahapa. Mai te mea e, na tatou e faahoro ra te pereoo, a haapa’o maitai ïa. Eiaha hoi te hoê ati ia haere mai e faaino i te mea tei fariihia e tatou.
E itehia te taato‘araa o te tereraa o teie amuiraa i roto i te Ensign e te Liahona i muri nei. Te faaitoito atu nei matou ia outou ia tai’o faahou i te mau a’oraa i roto i to outou mau pô utuafare e ia tauaparau to te utuafare taatoa i te reira mau parau. I papa’ihia hoi te reira na roto i te pure e te feruriraa hohonu, e ua ti’a mau ia haapa’o-maite-hia te reira.
I teie nei, te faataimehia nei te amuiraa no te maororaa e ono avae. Te ti‘aturi nei matou e, e ite faahou â matou ia outou i te avae eperera i muri nei. Noa’tu e 97 matahiti to‘u i teie nei, te ti‘aturi nei râ vau e, e tae atoa’tu vau. Ia vai mai te mau haamaitairaa no te rai i ni’a ia outou mai teie atu taime, ta matou ïa pure haehaa, na roto i te i’oa o Iesu Mesia ra, amene.