Te Aau Tatarahapa e te Varua Mărû
Te hinaaro nei te feia aau tatarahapa e te hoê varua mărû i te rave i te tahi noa’tu mea o ta te Atua e ani mai ia ratou.
Ua here roa vau ia Elder Joseph B. Wirthlin ! Ua papa‘i te rohi pehe ra o Rudyard Kipling i te mau parau i muri nei i te matahiti 1899, ei fa‘aararaa i te Hau Emepera Peretane no ni‘a i te te‘ote‘o:
E pohe te arepurepuraa e te pupuhiraa ;
E horo te mau tapena e te mau arii.
E vai â, te tusia o tahito ra,
Te hoê aau haehaa e te mărû.
(« God of Our Fathers, Known of Old », Hymn, no. 80).
I to Kipling papa‘iraa no ni‘a i te aau mărû ei « tusia i tahito ra », penei a‘e ua vai te mau parau a te Arii Davida i roto i to’na feruriraa o te Salamo 51: « O ta te Atua tusia hinaaro ra, o te aau paruparu ra ïa ; o te aau paruparu ra e te oto ra » (irava 17). Te faaite nei te mau parau a Davida noa’tu e no te Faufaa Tahito, ua ite te feia o te Fatu e e mea ti‘a ia horo‘a ratou i to ratou aau i te Atua, area te mau tusia taauahi ana‘e râ eita ïa e rava‘i.
Te mau tusia i horo‘ahia i te tau tuuraa evanelia o Mose, ua faaauhia ïa i te tusia taraehara a te Mesia, o Oia ana‘e o tei faahau i te taata hara nei i te Atua. Mai ta Amuleka i haapii, « E inaha, o te auraa taato‘a teie a te ture, e na te reira atoa hoi e faaite atea i taua tusia rahi e te hopea ra… o te Tamaiti ïa a te Atua » (Alama 34:14).
I muri mai i to’na ti‘a-faahouraa, ua faaite Iesu Mesia i te mau taata o te Fenua Amerika e:
« E ta outou mau tusia, e ta outou mau tusia taauahi, e faaorehia ïa, e ore hoi au e ite faahou ia [ratou]…
« E pûpû mai outou i te aau tatarahapa e te varua mărû ia‘u ei mono i te reira. E o te haere mai ia‘u ma te aau tae e te varua mărû ra… i bapetizohia i te auahhi e te Varua Maitai » (3 Nephi 9:19-20).
Eaha te hoê aau tatarahapa e te hoê varua mărû ? E no te aha te reira i haapa‘ohia’i ei tusia ?
I roto i te mau mea’toa, ua pûpû te oraraa o te Faaora i te hi‘oraa maitai ia tatou: noa’tu aita a Iesu o Nazareta e hara, ua ora Oia i te hoê oraraa e te hoê aau tatarahapa e te varua mărû, i itea i roto i To’na auraroraa i te hinaaro o to’na Metua. « I pou mai nei hoi au mai te ra‘i mai e haapa‘o i to tei tono mai ia‘u nei » (Ioane 6:38). E i ta’na mau pîpî tei Ta’na i parau, « E ia haapiihia outou e au, te măru nei hoi au e te haehaa o te aau » (Mataio 1:29). E i te tae raa mai te taime no te aufau i te tusia hopea ei tuhaa faufaa i roto i te Taraehara, ua hinaaro te Mesia ia ore e inu i te au‘a avaava, area râ, ua auraro i te hinaaro o To’na Metua.
Ua riro te auraroraa maitai roa a te Faaora i te Metua Mure Ore ei hi‘oraa faufaa no te hoê aau tatarahapa e te hoê varua mărû. Ua haapii mai te hi‘oraa maitai o te Meisa ia tatou e, ua riro te aau tatarahapa e te varua mărû mai te hoê taipe mure ore no te huru atuaraa. Ia tatarahapa to tatou aau, ua vai matara noa ïa to tatou aau i te Atua e e ite tatou i to tatou auraroraa Ia’na no te mau mea tei fariihia e tatou e no tatou iho nei. Te tusia e tano no te reira o te hoê ïa tusia no te teoteo i roto i to ratou ra mau huru. Mai te vari paruparu i roto i te rima o te taata aravihi hamani au‘a, e nehenehe te varua mărû e faahoho‘ahia e e hamanihia i te rima o te Fatu ra.
E titau atoa mai te hoê aau tatarahaa e te hoê varua mărû ra i te tatarahapa. Ua haapii Lehi:
« Na roto i te Mesia Mo‘a e tae mai ai te ora…
« Inaha, e pûpû oia ia’na iho ei taraehara, ia faati‘a i te titauraa a te ture i ni‘a ia ratou atoa tei noaa te aau paruparu e te oto ; e ore e ti‘a ia haapee i te titaura a te ture i tei ore i noaa te reira » (2 Nephi 2:6-7).
Ia hara tatou e ia hiaai i te faaore-raa hara, to’na auraa ra, o te hoê ïa aau tatarahapa e te hoê varua mărû oia ïa « te oto hoi e au i te atua ra [o te] faatupu i te tatarahapa » (2 Korinetia 7:10). E tae mai te reira ia hinaaro puai tatou ia tamahia i te hara e i reira to tatou aau e mauiui ai i te oto e e imi tatou ia farii i te hau no o mai i to tatou Metua i te Ao ra. Te hinaaro nei te feia aau tatarahapa e te hoê varua mărû i te rave i te tahi noa’tu mea o ta te Atua e ani mai ia ratou mai te pato‘i-ore e aore râ, ma te tairoiro ore. E faaore ïa tatou i te rave i te mau mea na roto i to tatou iho hinaaro e e haapii ïa tatou i te rave i te reira na roto i te hinaaro o te Atua. Na roto i teie huru auraroraa, e nehenehe te Taraehara e faufaahia ei reira ïa te tatarahapa mau e tupu ai. E ite ïa te taata tatarahapa i te mana faaora o te Varua Maitai, o te faî ia ratou i te hau o te feruriraa e te oaoa no te faahauraa i te Atua. I roto i te faaauraa nehenehe roa o te mau taipe mo‘a, e haapii mai taua Atua ra ia tatou ia haere ma te aau tatarahapa, e e ani manihini ia tatou ia oaoa e ia faaitoito.
Ia farii tatou i te hoê faaoreraa hara, e tavini ïa te hoê aau tatarahapa mai te hoê paruru mo‘a ra i te mau tamataraa. Ua pure Nephi e, « Ia opani-noa-hia te mau uputa o hade i mua ia‘u, no te mea ua taiâ ta‘u aau e ua haehaa hoi ta‘u varua ! » (2 Nephi 4:32). Ua haapii te Arii Beniamina i to’na feia e mai te mea e haere ratou na roto i te faahaehaa o te haehaa roa raa, e oaoa ïa ratou e, « e faaîhia ho‘i ratou i te aroha o te Atua, e vai matara noa ta ratou mau hara » (Mosia 4:12). Ia pûpû tatou i to tatou aau i te Fatu, e hahi ê te faufaa o te mau umeraa o te ao nei.
Te vai atoa ra te tahi huru aau tatarahapa – oia ïa to tatou aau mehara hohonu no to te Meisa mauiui no tatou. I roto i te aua no Getesemane to te Faaora, « pouraa mai i raro a‘e i te mau mea atoa ra » (PH&PF 88:6) a amo ai Oia i te teimaharaa o te hara a te mau taata atoa. I Gologota, ua « manii ia’na to’na varua e tae noa’tura i te pohe » (Isaia 53:12), e ua oto To’na aau i te aroha no te here i te mau tamarii a te Atua. Ia haamana‘o tatou i te Faaora e i To’na mauiui, e oto atoa to tatou aau no te aau mehara no te Mesia tei Faatahinuhia.
Ia faasutia tatou i ta tatou mau tao‘a e ia tatou iho nei No’na, e faaî mai te Fatu i to tatou aau i te hau. E hopoi mai Oia i te « aau mărû » (Isaia 61:1) e e haamaitaihia to tatou oraraa na roto i te here o te Atua, « e ua hau to’na monamona… e ua hau to’na maitai i to te mau mea maitatai atoa ra » (Alama 32:42). Te faaite papû nei au i teie mau mea, na roto i te i‘oa o Iesu Mesia, amene.