1 Karon gipalabihan sa Ginoong Dios ang kagutom didto sa yuta sa Ur, hangtod nga si Haran, ang akong igsoong lalaki, namatay; apan si Terah, ang akong amahan, buhi pa didto sa yuta sa Ur, sa mga taga-Caldea.

2 Ug nahitabo nga ako, si Abraham, nangasawa ni Sarai, ug si Nahor, akong igsoong lalaki, nangasawa ni Milcah, nga anak nga babaye ni Haran.

3 Karon nagsulti kanako ang Ginoo nga: Abraham, palayo sa imong nasod, ug gikan sa imong banay, ug gikan sa balay sa imong amahan, ngadto sa usa ka yuta nga ipakita ko kanimo.

4 Busa akong gibiyaan ang yuta sa Ur, sa mga taga-Caldea, aron moadto sa yuta sa Canaan; ug akong gidala si Lot, anak nga lalaki sa akong igsoong lalaki, ug ang iyang asawa, ug si Sarai, ang akong asawa; ug usab ang akong amahan misunod kanako, ngadto sa yuta nga among ginganlan og Haran.

5 Ug ang kagutom mikunhod; ug ang akong amahan nagpabilin sa Haran ug mipuyo didto, tungod kay adunay daghan nga kahayopan sa Haran; ug ang akong amahan mibalik pag-usab sa pagsimba sa mga dios-dios, busa nagpabilin siya sa Haran.

6 Apan ako, si Abraham, ug si Lot, anak nga lalaki sa akong igsoon nga lalaki, nag-ampo sa Ginoo, ug ang Ginoo mipakita ngari kanako, ug miingon kanako: Tindog, ug dad-a si Lot uban kanimo; kay ako adunay katuyoan sa pagpahilayo kanimo gikan sa Haran, ug sa paghimo kanimo nga tigpangalagad aron mopamatuod sa akong ngalan didto sa lain nga yuta nga akong ihatag sa imong binhi nga mosunod kanimo alang sa walay kataposan nga bahandi, sa panahon nga sila maminaw sa akong tingog.

7 Kay ako ang Ginoo nga imong Dios; nagpuyo ako sa langit; ang yuta mao ang akong tumbanan; akong ituyhad ang akong kamot sa ibabaw sa dagat, ug mosunod kini sa akong tingog; akong himoon ang hangin ug ang kalayo nga akong karwahe; akong sultihan ang mga bukid—Pahawa diha—ug tan-awa, madala kini sa alimpulos, diha-diha dayon, sa kalit.

8 Ang akong ngalan mao si Jehova, ug nahibalo ako sa kataposan gikan sa sinugdanan; busa ang akong kamot magpaibabaw kanimo.

9 Ug buhaton ko ikaw nga dakong nasod, ug panalanginan ko ikaw sa walay sukod, ug himoong bantogan ang imong ngalan sa tanang nasod, ug mahimo kang panalangin ngadto sa imong binhi nga mosunod kanimo, nga sa ilang mga kamot sila modala niini nga pagpangalagad ug Pagkapari ngadto sa tanang nasod;

10 Ug panalanginan ko sila pinaagi sa imong ngalan; kay kutob sa modawat niini nga Ebanghelyo pagatawgon sa imong ngalan, ug pagaiphon nga imong binhi, ug mobarog ug mopanalangin kanimo, isip ilang amahan;

11 Ug panalanginan ko sila nga mopanalangin kanimo, ug tunglohon sila nga motunglo kanimo; ug diha kanimo (nga buot ipasabot, diha sa imong Pagkapari), ug sa imong binhi (nga buot ipasabot, ang imong Pagkapari), kay hatagan ko ikaw og saad nga kini nga katungod magpadayon diha kanimo, ug sa imong binhi nga mosunod kanimo (nga ang gipasabot, ang tinuod nga binhi, o binhi sa lawas) ang tanang pamilya sa yuta mapanalanginan, gani pinaagi sa mga panalangin sa Ebanghelyo, nga mao ang mga panalangin sa kaluwasan, gani sa kinabuhing dayon.

12 Karon, human ang Ginoo mihunong sa pagpakigsulti kanako, ug mipalayo sa iyang nawong gikan kanako, miingon ako sa akong kasingkasing: Ang imong sulugoon nangita kanimo sa dakong tinguha; karon nakakaplag na ako kanimo;

13 Imong gipadala ang imong anghel aron moluwas kanako gikan sa mga dios ni Elkenah, ug labing maayo nga mopatalinghog ako sa imong tingog, busa tugoti ang imong sulugoon nga mobarog ug mobiya nga malinawon.

14 Mao nga ako, si Abraham, mibiya sama sa gisulti sa Ginoo ngari kanako, ug si Lot mikuyog kanako; ug ako, si Abraham, nag-edad og kan-oman ug duha ka tuig sa dihang mibiya ko sa Haran.

15 Ug akong gidala si Sarai, kinsa akong gipangasawa sa didto pa ako sa Ur, sa Caldea, ug si Lot, anak nga lalaki sa akong igsoon nga lalaki, ug ang among tanang katigayonan nga among napundok, ug ang mga kalag nga among nakabig didto sa Haran, ug miadto sa agianan paingon sa yuta sa Canaan, ug nagpuyo sa mga tolda samtang nagpadayon kami sa among panaw;

16 Busa, ang kahangtoran mao ang among panalipod ug ang among bato ug ang among kaluwasan, samtang mipanaw kami gikan sa Haran latas sa Jershon, aron moadto sa yuta sa Canaan.

17 Karon ako, si Abraham, naghimo og altar didto sa yuta sa Jershon, ug mihimo og paghalad ngadto sa Ginoo, ug nag-ampo nga ang kagutom mobiya gikan sa balay sa akong amahan, aron dili sila mamatay.

18 Ug unya miagi kami gikan sa Jershon latas sa yuta ngadto sa dapit nga gitawag og Sechem; nahimutang kini sa kapatagan sa Moreh, ug miabot na kami sa mga utlanan sa yuta sa mga taga-Canaan, ug mihalad ko og sakripisyo didto sa kapatagan sa Moreh, ug mitawag sa Ginoo nga mainampoon, tungod kay miabot na kami sa yuta niini nga nasod nga nagsimba og dios-dios.

19 Ug ang Ginoo mipakita ngari kanako agi og tubag sa akong mga pag-ampo, ug miingon ngari kanako: Nganha sa imong binhi ihatag ko kini nga yuta.

20 Ug ako, si Abraham mibarog gikan sa dapit sa altar nga akong gitukod alang sa Ginoo, ug mipalayo gikan didto ngadto sa usa ka bukid sa silangan sa Bethel, ug mipabarog sa akong tolda didto, sa Bethel sa kasadpan, ug Hai sa silangan; ug didto nagtukod ko og lain nga altar alang sa Ginoo, ug mitawag pag-usab sa ngalan sa Ginoo.

21 Ug ako, si Abraham, mipanaw, paingon gihapon sa habagatan; ug nagpadayon ang kagutom sa maong yuta; ug ako, si Abraham, nakahukom sa pag-adto sa Ehipto, aron mopuyo didto, kay ang kagutom nahimong kuyaw na kaayo.

22 Ug nahitabo nga sa dihang nagkaduol na ako sa Ehipto, ang Ginoo miingon ngari kanako: Tan-awa, si Sarai, ang imong asawa, usa ka matahom kaayong babaye nga tan-awon;

23 Busa mahitabo, kon ang mga Ehiptohanon makakita kaniya, moingon sila—Siya iyang asawa; ug ikaw ilang patyon, apan siya ilang buhion; busa seguroha nga buhaton nimo kini sa ingon niini nga paagi:

24 Pasultiha siya ngadto sa mga Ehiptohanon, nga siya imong igsoong babaye, ug ang imong kalag mabuhi.

25 Ug nahitabo nga ako, si Abraham, misulti kang Sarai, nga akong asawa, sa tanang giingon sa Ginoo ngari kanako—Busa sultihi sila, mohangyo ko kanimo, nga ikaw akong igsoong babaye, aron mamaayo ra ang tanan alang kanako alang sa imong kaayohan, ug ang akong kalag mabuhi tungod kanimo.